Keluaran 26

’Gain Onuk Logo a’ge owi sabo woru wene

1Mo’gulesirik, pobuk mesik emin mo’guleselat,

“An nowi sabo woruok oluk togulat, herle meinya esi ’gela’ge op a’ge tuelak ano emin, herle ’bogorl lalu iltak a’ge emin, ’borlu ’belak a’ge emin, herle il momi-momisogo tak a’ge tuelak emin, ebano wokho is ap egesogwi modok enaluk a’ge en kain ebak a’ge numen pam at egesogu lemagoluk wogentagunmu egesogulat, malaikat ’gela’ge kerub ogut heli’gogo eminat lo’boktak poluk egesuak o. 2Kain ebak a’ge numen egesu a’ge ebano a’bigat hegitsogo nak ologun-ologun meter yat akhit e, meter 13,6 meter pam egesogulat, ye, horok akhit e, 1,8 meter pam walhogulat, takpoluk ikho pouwak o. 3Asogo egesogu lemarik, kain ebak a’ge huaben egesua a’ge ebano mesik pam ’biren egesogulat, ye, pema huaben ebano ogo asogo nak at mesik pam ’biren diphegeik ikho poluk, 4-5sum kain ebak a’ge huaben diphegeik egeik a’ge ano pam, abel pema ologun petne herle tualak ’borlu a’ge pam ebagase ’bebingsogo ’bungtak po a’ge paget 50 pam ikho pogulat, ye, abel pema nin asogo nagat 50 pam a’ge la’bolik 100 pamat sum ’biren pam diphegeik egeik a’ge eriano pamat ikho pouwak o. 6Takpoluk, o sabo woru ai re, mesik hegit nagat emak oluk, emas a’ge pam pema akhit 50 takpoluk, sum kain ebak a’ge ano pam nagat pema emin diptak pouwak o.

7Ye, an nowi sabo paget sum kain po a’ge ano abel pema akhit oruakhwe, o’borl pam saplisogo pou wagoluk sum ebak a’ge 11 hwerli kambing asu pam ikho pouwak o. 8Sum ebak a’ge 11 ano ’berlegat hegitsogo nak ologun legeik ’belak yat akhit e, 13 setengah meter pam, ye horok ebagakhit e, 1,8 meter pam walhogulat, 9Sum huaben kambing asu a’ge pam egesogwi a’ge ano egesogulat, ye, sum 6 a’ge ano asogoat mesik a’ge pam nak la’bulogo egesogulat, takpogu lemarik, sum 6 oruak a’ge ebano pam nowi sum owi woru a’ge ano selak akhit lo’bok tuak oluk, ologun nak ebagase ’biren sisogo nowi werik a’ge e’berli o’gulogo pouwak o. 10Sum ebak a’ge egesu a’ge mesik ano pam abel pema nak herle pema akhit wai lo wom tuagoluk herle tuelak 50 a’ge pam pogulat, ye, pema akhit asogoat abel pema akhit 50 pamat pogulat, takpoluk, 11Sum kain wam kambing agap pam egeik a’ge ’biren eriano a’ge de, tembaga 50 a’ge pam tigene egeik a’ge dipsogo mesigarap poluk, herle ’borlu werak a’ge ano pam ikho ’gwelebak pouwak o. 12Sum kambing agap ebak a’ge dedelik a’ge ebano o werik o’borlma ’bekhit saplisogo werik pogulat, 13ye, o sum kambing agap ’gela’ge tak a’ge ebak yat egesu a’ge dedil ema a’ge ai ebagase sisogo o’gulogo o sum owi eberli akhit emin, o’borl akhit emin sepnik pouwak o. Yat akhit e, ukuran 45 senti pam nak pouwak o.

14Ye, o woru a’ge ano ebe o’borl pam sum ebak a’ge mesik, domba ierak a’ge agap pam il momi a’ge wusogo poluk e, ikho o’borl pam lo’boktak pogulat, ye, lumba-lumba ik laut ogola welago a’ge ai agap pam saplisogo modok sebelogo pogulat, takpoluk, pouwak o.

15An nowi sabo woru a’ge tenaga’ge e hebat daintak pil lo a’ge e orlobuk a’ge pam heli’gogulat e, 16-17E’gagalak op a’ge onuk orlobuk a’ge ano ebe ’berlek ologun pam en ’bekhit ologunmu yat akhit e, meter 4 setengah meter. Ye, ebak akhit e, meter 67 setengah senti pam woruak o. Ye, e papan ’berlegat ai ologun pam e, paku ’biren lo’bok woru a’ge polik pogu lemak o. Asogo togwiam e e’bet ado pema emin we elit dipsogo woru ’gela’ge emak o. 18-19O Nenaik ’gain Onuk Logo a’ge owi sum a’ge pam woruogoluk abel sogeik akhit e, e e’bet 20 a’ge pam worogulat, ye, e e’bet ologun ’belagakhit 20 a’ge pam e’bet lo’boksogo worogulat, ye, e’bet ’berlegat ai ologun dipsogo poma re perak a’ge ebe ’biren pam woru a’ge ai re, paku ’biren emin dipsogo woru a’geat maben perak a’ge ’biren emin heli’gogo po yo. 20-21Pobuk e, Nenaik ’gain Onuk Logo a’ge owi o erabu akhit hegit eba worogulat, e op a’ge orlobuk a’ge pam worogulat e, oyogut edipmu re, perak a’ge ebe ’biren a’ge pam agosogo oyuk yogo poluk e, paku ebe ’biren emin elit lo’bok tu a’geat wusogo pogu lemak o. 22Ye, o mo obuk ilasu hegit eba o’borl akhit ogo uak asogo nak 6 heli’gogo edik pil-pil lagalat, 23o sum a’ge o’borl akhit e, ogut ugan eriano re papan ’biren edikpoluk, 24edip yakho re, paku ’biren takpoluk, abel likho re, paku ’biren a’ge po ’gela’ge takpogulat, tigene egeik a’ge o’gutmu erlelik a’ge hopsogo werak po yo. Ogut ebe lo’bok e’bet ’biren pam edikpo a’ge pulogo po yo. 25Ai en e, o’gut uganakho e’bet ebe hundomok e, ’biren woru a’ge la’bolik siragen pam eriano re, e e’bet ebe lo’bok e, perak a’ge pam ebe ’biren agosogo, nak la’bolik 16 oyogut perak a’ge emin hele’gik po yo.

26Asogo takpoluk e orlobuk a’ge no’gurlik oboktak po ai re, sogweik akhit o uak abel pema edik oruak a’ge ano pam e orlobuk ebe huaben at no’gurlik ye’gik pogulat, 27uak abel pema edik oruak a’ge ano pam e ano huaben no’gurlik takpogulat, ye, erabu akhit de, o’borl akhit emin o mo obuk ilasu he’git eba uak edik a’ge ano pam e huaben no’gurlik-yi’gogo oboktak pei lagalat, tuak o. 28Uak edikpogwi a’ge ano ede ’burlmu en, e mesik yat a’ge o sabo werik a’ge ano pam en ologun pam en ologunmu hwerliat pei louwak o. 29E uak edikpil lo a’ge emin, e no’gurlik pei lo a’ge ano emin, besi emas a’ge nak lo’boktak pogulat, ye, e no’gorlikpo a’ge ano anni welemagoluk po’gwilo a’ge ano emas pam tigene ikho pogulat, tuak o. 30O ai worogulat, dom yu pam en disogoat worogu lomup o, oluk, mo’gulhegis a’ge yu ’gela’geat hegitsogo worogu lemak o.

31Herle menya ’gela’ge Il op tuelak a’ge emin, herle ’bogorl lalu iltak a’ge tuelak emin, ’borlu ’belak a’ge emin, herle il momi-momisogo tak a’ge tuelak emin wokho is ap modok enaluk a’ge en egesogu lemagoluk sum mesik ebak a’ge egesogu lemagoluk wogentagupmu egesogulat, malaikat ’gela’ge kerub ogut heli’gogo eminat ikho pogwi holuk e, 32-33#Ibr. 6:19; 9:3O sabo werik ogola asuama emin, o ogorli asua ebema emin ’burl ogorlitak welemagoluk, e orlobuk ugan emas a’ge pam, lo’boktak poluk, perak a’ge ugan pam saplisogo oyuk yogo poluk, e ologun ligakhit emas a’ge pam tigene ikho erlelik po yo. Asogo poma sum kain lok a’ge ano sepnogo po’bumagoluk hele’gik pouwak o. Asogo takpou warik, disogo tip, asogo tip, oluk, wene werak poma ebano yagarak pomup o. 34Wene disogo tip, asogo tip, oluk ’belak a’ge ano helep pam ’balogo nowene werak ’balogo poluk yagasogo o asua modok hwerlisogo wolomma wolom a’ge ano, an nemin wene werak yagarak a’ge o’borl pam emdema, peti ai emde o’borl pam e osolup lerak pomup o. 35Sum lok a’ge o’borl akhit ai re, meja roti werakho pogulom a’ge emin, esaga ’gwialogo pogulom a’ge emin, erasogo pogu lemak o. Orogobu akhit e, esaga heberlogo welemak o, erabu akhit e, meja so’boru werakho pogwi a’ge ebale welemak o.

36An nowi woru a’ge ai ’goduk o’gwe kain tepnu ai re, herle modok opsogo tuelak a’ge emin, herle tuelak ’bogorl lalu iltak a’ge emin, ’borlu a’ge emin, ’borlu herle il momi-momisogo tak a’ge emin, wokho is ap sum il yape’gek dape’gek egesogwi enaluk a’ge en egesogwi holuk e, 37sepnik po a’ge paget, e ebale hele’gik a’ge emas pam heli’gogo pogulat, e orlobuk huaben wokho emas pam lo’boksogo pogulat, ye, edikpogulomma tembaga a’ge pam huaben heli’gogo pogulat, takpoluk, e huaben ano edikpoluk, e ebale heli’gik a’ge ano wokho e ano pam lo’boktak poluk. Sum ano e ai pam sepnogo ’belebak po’bumak oluk egei,” oluk, mo’gulontomup o, oluk, mo’gulesi.

Currently Selected:

Keluaran 26: Wul

Highlight

Copy