Keluaran 22

Yogot wogwi holuk togulom wene

1Mo’gulesirik, pobuk mesik emin mo’gulontouwak oluk, mo’guleselat, Ap mesik en ap mu a’ge mesik, uam sapi a, domba a, hisakho o’go hwerlasulat, wusogo nasulat, tago holuk, lembu mesigat hisaregei a’ge ano ebalema lembu 5 yat wogeselat, ye, domba mesigat hisariso a’ge ano ebalema domba ugan at wogeselat, tuak o. 2Ye, ap mesik en yogot hisarik oluk, ap mesik owi pam ’goduk hwerisoma ap mesik en hwiogo pasu lomtik werisoam warogo holuk is ap worogwi a’ge ano re, emep e’gik pam welema erlak a’geat de, 3O ’goduk hwerisoma werisoam warago holuk e, o mo pou wagokhwe werak pasu holuk e, at ebalema ap ano at woruak o, emep at e’gik pamat welema o. Ap mesik en ap mu a’ge en a’ge-a’ge yogot wasu holuk ebalema owi yoruak o. Ye, ap mesik en ap mesik a’ge-a’ge hisariso ano o’go wogoum a’ge ilmu erlak holuk e, ap at yogot wasu a’ge ano ebe o’go wogo poluk e, a’ge eiye a’ge ano wok emak o. 4Ye, lembu a, keledai a, hisariso a’ge ano elaluk oruakma hwiak ogwi holuk nak e, at mesigat nak hisariso a’geat de, ebalema uam horlo a’ge ’birenat wogemak o.

5Ap mesik en uam opsogo tenakho wolom erlakma en we ebakhenne ukpasu ano pam ap mu a’ge eniabukmu so’boru a, anggur a, nasu holuk e, ap uam eiye a’ge ano en ebalema gandum e’gen op a’ge holuk ’balogo iabuk eiye a’ge ano wok emak o.

6Ap mesik iabukmu gandum yogo de a yabuk pema owi yogoma de, e’gen owan ’belak erlakma de ’berlegat tawet lioktak pil lasu holuk e, ap yabuk iakma oso a’ge ano en ogo pouwak o.

7Ap mesik en o uang de a, a’ge-a’ge a, are mesik en tenak welemagoluk wogogwiam owi pam tenakho oruakma ap mu a’ge mesik en hisakho yogot wasu holuk e, at ap hisariso a’ge ebe hwiogo poluk we mesik erlige nak hisariso a’geat de, ebalema ’birenamat owi yoruak o. 8Ye, at ap hisariso a’ge ano aphwami en enil ho erlak holuk, ap owi pam pasu a’ge ano ap onuak lol onobogwi a’ge oruakma loluk, Allah il oruakma an nare en a’ge ai, an modok wo erlagat o, oluk, ho’buk ’baluak o.

9Ye, ap mesik en, uam lembu a, keledai a, domba a, osum a, a’ge-a’ge a, erlak agoam heraneselat, a’ge-a’ge ebano ap mesik en tenakho oruakma il hasu lomtik, is e’birek en yu re, an na’ge yu hat ha’ge ogulat, wene ’baluogoluk togwi holuk e, uak lolonobogumu en Allah en e uak lol onobuagoluk, enebei lagai holuk e, hat enat hisarigen o, oluk, ebam lo’bok tago holuk e, mesigat nak hisariso a’geat de, o’go ’birenat owi yoruak o.

10Ap mesik en uam keledai a, lembu a domba a, uam mu a’ge de a, at are en ’gwelakharok welemagoluk wogoso a’ge de warago holuk a, oyuk porlok oso holuk a, aphwami enil erlakhwe ap mesik en hisaruak oluk lebikpasu, holuk a, 11tenakho welaga a’ge ano en uam eiye a’ge ano mo’guleselat, at Allah il oruakma re, an en wo erlagat o, oluk, ho’buk ’baliso holuk e, at uam eiye a’ge ano en, demat hegi, oluk, ebalema owi yaknemin o, oluk, mo’guloum mia o. 12Demat at en hisariso a’ge telakma ’bakoso holuk nak e, ap tenakho welaga a’ge ano en at uam eiye a’ge ano ebalema owi yoruak o. 13A’geat de, uam ano mene orlomene yen nasu a’ge iagado ano wik-wok at uam eiye houwagoluk, wogosu ago holuk, o’go owi yaknemin o, oluk, mo’guloum mia o.

14Ap mesik en are mo’guleselat e, an lodu paget hat huam ai tenakho weleik o, oluk, mo’gulotluk tenakho oruakma at uam ano ebe warogo de a, oyuk porlok oso a, tago holuk e, at uam eiye ebe areng erlakhwe agama re, ebalema owi yoruak o. 15At ap uam eiye a’ge ano e’birek oruakhwe warogo holuk nak e, ebalema owi yoru mia o. Ye, lodu pekharok wolom ano re, o’go wogotluk woluk lagaiam wiak ago holuk nak e, o’go arat pogwimu re, wene erlak o, oluk, ukpouwak o, oluk, mo’gulontouwagoluk, mo’gulesi.

Hwe dogum a’ge mesik wiagap pogwi holuk, togulom wene

16 # Ula. 22:28,29 Mo’gulesirik, wene pobuk nin mesik emin mo’gulontouwak oluk Musa mo’guleselat,

“Hwele mesik ap en ’gonutak erlak a’ge ebe owan dogum oruakma ap mesik en iak a’bosu dep-tak ano pam ne’birek nogouwok o, oluk, e’birek nogogwi holuk, ukpo mia o. Ouangat poluk, at ugwe modogat horlouwak o. 17A’geat de, at aik en agalogo hwele ano ap ai wogoum modok nebit o, oso holuk e, hwelani ap enemin la’bolik erlak owan dogum holuk, enagabi pogwi ’gela’ge, e’birek nogosi a’ge o’go asogoat hegitsogo pouwak o.

18 # Ula. 18:10,11 Hwe mesik hinwok a’ge holuk, elaluk welemagoluk ukpo mia o.

19 # Ima. 18:23; 20:15,16; Ula. 27:21 Ap mesik en wam meneat de, tiselat, ye, wam mene yen hwe tagalat, tago holuk ap ai asogo waremagoluk, modogat wusogo pouwak o.

20 # Ula. 17:2-7 Is aphwami en an Allah nak erliknobu a’geat de, asua erliktugulat, ebaget wusogo, pogwi holuk, is enebe modok wusogo onobou wak o,” oluk, mo’gulontouwak oluk, mo’gulesi.

Aphwami en tak pagathorlo mia holuk, tagonobogulom wene

21 # Kel. 23:9; Ima. 19:33,34; Ula. 24:17,18; 27:19 Mo’gulesirik, pobuk emin mo’gulontouwak oluk, mo’guleselat,

“Is naduk o Mesir ap’bok ’gela’ge oruakhwe, tagonobogu legesa a’ge ebano enalukmu no oluk e, ap ’bok a’ge mesik ene’gerlakma oruak holuk, eniak wiak a’ge mo’gulogulat, sebelogo pogulat, tu mia o. 22Ye, hwami tuge a’ge emin, malik se’bin a’ge emin, enede e’gin welagaimu re, ebenagaikmu, enede e’ginap onobo mia o. 23Enede e’ginap onobogwiam eniak loksogo an mo’gulnogwi holuk, an demat nesa’go hwelak poluk, 24is onugwami tuge onobogulat, enemalik se’bin agalat, tuagoluk, nolot het en ha’boksogo inagalat, nua’gun pam de a, ne’garok pam a, waronobu weik o.

25 # Ima. 25:35-38; Ula. 15:7-11; 23:19,20 Ap mesik en o uang lodu paget ap mu a’ge mesik wogeselat, an no uang wogegis a’ge re, ebam louksogo pobuk mesik woknemak, opoluk wogoso ai ’gela’ge, an neiyagai ene’gik erlakhweat de, asogo tagonobogulom mia o. A’geat de, wogegis a’ge yuat woknemak oluk, ogola epasulat, wogese lemak o. 26-27#Ula. 24:10-13Ap mesik en e, o uang lodu paget tenak weleik oluk are mesik ebam ’gonu laiyogoluk e, at are, muat a’ge mesik osum ’buksogo nogoso a’ge gi’gonu ho uang wokneselat e, sum yu tenakho wolomup o, oluk wogosoam e, ap osum eiye a’ge ano osum we mesik nagatma re, huba’go sogei pam nogouwa no oluk e, o mo obuk ilasu erlakhwe, eriano pamat uak lologo togolik wok emak o. Perlenesogo wogoum erlakma en aregen a’ge tenakho oruak ano pam iak mo’gulnoso holuk e, an e ap di ap yu ap nedeap enebiso welegimu re, ap ai nedeap tiselat, at iak nagat hwelik o,” oluk mo’gulontouwak oluk, mo’gulesi.

Wene ebam elitsogo hundomok tugulom a’ge mo’gulesi wene

28 # Per. 23:5 Mo’gulesirik, Israel a’ge mo’gulontouwak oluk, Musa pobuk emin mo’guleselat,

“At Allah mi-miarak pogulat, ap onue tenentarok welago a’ge ano eniak esegen yagogulat, waremin o, oluk mo’gulogulat, tu mia o.

29Is en so’boru naduk dogo a’ge emin, a’bosu anggur naduk ne’gak a’ge emin, yu re, Allah en a’ge o, oluk, pogulomtik, onowi pam aregen tenakho wolom mia o. Enemalik logomalik naduk dogo a’ge ano nebaget pulogo nobogu lemak o. 30Naduk dogo a’ge holuk, pulogo nobogwi ai ’gela’ge, onuam lembu sapi, emin, kambing domba emin, enemalik dogo erlakma re, naduk-naduk dagagai holuk, enia emin oruakhwe, agauwa 7 pam wolotluk, loruk o’gwe en nebaget pulogo nobogu lemak o.

31 # Ima. 17:15 Is en an na’ge nebaget pulik welemagoluk, pulogo pegimu re, Mene orlomene en onuam mesik iak lebilogo pasu holuk, is en no ai mia o. A’geat de, is mene enat nouwak oluk, wogontogu lemak o,” oluk, mo’gulontouwak oluk, mo’gulesi.

Currently Selected:

Keluaran 22: Wul

Highlight

Copy