Keluaran 21

Eneragam a’ge holuk togulom wene

1Mo’gulesirik, wene mesik emin Musa mo’guleselat, Is Israel a’ge en tugulom a’ge wene le’gelogo mo’gulentai lo ano re, yuat o. 2#Ima. 25:39-46Is Israel a’ge en eneragam a’ge welemagoluk mesik o’go ’balonobogwi holuk enebaget yabuk tugukhwe tahun 6 arat takpoluk mesik ago ano pam telakmasogo pogulat, o’go ’balhebegis a’ge o’go woknemin o, oluk mo’guloum erlakma en weat nese lemagoluk lebikpo yo. 3Ugwe erlak a’ge en eneragam a’ge welema holuk e, emategat lebagalat, ye, ugwe oruak a’ge en eneragam a’ge oruak holuk e, ugwe e’biregat lebagalat, tuak o. 4Ye, omu nagat oruak holuk e, aik en ugwe wogosoam e’birek welat, emalik hwe ap dagenebiso holuk e, hwe ano emalik enemin ano re, enaik ano emaligat emma re, enemin oruakhwe ap ano nak emategat lebemak o. 5Asogoat hebilogo ukpasu a’get de, at eragam a’ge ano en aik mo’guleselat, Hat naik emin nugwe malik enemin nede hwedigat oruakma re, herle hebilogo nebe wolom ai re nebit o, oluk oso holuk e, 6at aik ano en eragam a’ge ano woluk Allah owi werikmu pei louwarik, ’godukmu a? ’Goduk esa’goma ya, edikpoluk modok-modok neragam a’geat wolorogun ani o, oluk, esa’goma a’ge sogo pouwak o.

7A’geat de, ap aik mesik en ap mesik mu a’ge mo’guleselat, nagalogo hwele a’ge yu heragam a’geat welemagoluk, o’go ’balhwerlemin o, oluk, mo’guloso holuk e, ap ano en o’go ’balo hwerlasu lemarik eragam a’geat tak pagathwerlasu lemak o. Agauwa eria pam e, 6 tahun aik yabuk tiso welago a’geat de, tahun 7 a’ge pam o’borlma lebikpo yo. Libagalat e, ap a’ge en herle hebilogo o’borlma libagai ’gela’ge re, erlak o. 8Ap mesik ano en e, at u’gwarek ebaget o’go ’balhwerlesirik en at de, welat-welat eriano en e, hwele ano ebiren ukpasuam e, at ap mu a’ge ano u’gwarek aik ano en emin welemagoluk hwele aik ano en togolik o’go ’balhworlouwagoluk mo’gulesi. Ap ena’gul onuk muat ’o’borlma a’ge enebam hwele ano wogonto mia o. Ap ano en hwele ano ebam di tip yu tip oso a’ge ano tiso erlak en e, hwele ano wogonto mia o oluk, obok mo’gulesi. 9A’geat de, ap ai en hwele ano emalik omlogo wogoum a’ge epasu holuk e, at ogolani opsogo tenentarok welagai ’gela’geat tenakho welemak o. 10Pobuk togolik omlogo ano hwe mu mesik wasu holuk e, ugwe naduk hwerlasu a’ge ano ukpo mia o. A’geat de, oso’boru no a’ge emin, osum emin, wogogulat, e’birek nogogu lemak o, wene henagan eria, 11asogo tago erlak holuk e, hwe o’go pesi a’ge ano owi yoru erlakma en weat aik e’bek louwak oluk, ukpouwak o, oluk, mo’gulontouwak oluk, mo’gulesi.

Ap mesik weriso holuk togulom wene

12 # Ima. 24:17 Mo’gulesirik, wene mesik emin mo’gulontouwak oluk, mo’guleselat, ap mesik en ap mesik werisoam warago holuk e, o’go re, at aiat wusogo pouwak o. 13#Bil. 35:10-34; Ula. 19:1-13; Yos. 20:1-9A’geat de, ap ai werik epasu erlakhweat de, Nenaik ’gain Onuk Logo a’ge en eberegei ano pam waraga o, oluk ’gain onuk a’ge en ebale polik pesimu etleba yat hweiye agap delogo louwak o. 14Ye, ap mesik en ap mesik, werik o, oluk, ede eberak poluk werisoam warago holuk e, an watnobuano oluk, hweiye toluk, an nebaget wusogo odouk narlogumu eba louwa a’geat de, e’gik lisogo lebikpoluk ebe waremagoluk, modok ’be’gi wusogoat pouwak o.

15Ap mesik en at ia de a, aik de a, weriso holuk e, o’go at ap ai waremagoluk modok wusogo pouwak o.

16 # Ula. 24:7 Ap mesik en ap mesik uan hisakho ap mu a’ge enebam o’go hwerlasua? Ebe owi pam hisakho poluk welago holuk e, ap hisariso a’ge ai, ebe waremagoluk modok wusogo pouwak o.

17 # Ima. 20:9; Mat. 15:4; Mrk. 7:10 Ap mesik en ia aik hweim enebasu holuk e, ap ai waremagoluk modok wusogo pouwak o.

18Ap mesik en ap mesik e’birek yeik pogulat helep pam de a, e’gik e’gerlik pam a, werisoam warom erlakma en obotut en ou en ebalema ’boutak nak welagoma, nonouk tagalat owi pam wolotluk pobuk nin, 19’bouwa’gun pam libom ’guom eselat, inotluk odipmu libago holuk e, ebe weriso a’ge ano o’go woru mia o. A’geat de, ou welat, yabuk taga laga erlak a’ge o’go emin, at obap obogukhwe o’go wogonto a’ge ano emin, ai nagat o’go wogemak o.

20Ap mesik en at eragam a’ge hwe a? Ap a, e pam ’go’bu worua ano pam warago holuk e, o’go e’gin a’ge ebam pouwak o. 21A’geat de, eragam a’ge weriso a’ge ano agauwa ’biren a? Henagan a, elaluk welat denago ’gela’geat elaluk holuk, aik ouang pam o’go ’balhwerlesirik at eiye atma re, o’go po mia o.

22Ap mesik en ap mesik e’birek yeik pil lagalat, hwe mesik emalik ogum takma re, dagantak worogwiam emalik ogola a’ge ano emin, wusogo pogwiam e, emalik ano ia ogum ogola en warago, a’geat de, hwe ebe warom erlakma en elaluk oruak holuk e, at ogun en o’go re, disogoat pouwak o, oluk, oso a’ge ano is herle hebilogo onobogwi a’ge ano en wene a’bosu ’belakpoluk op ogwi holuk e, hegitsogoat pouwak o. 23Ye, hwe ano ebe warago holuk nak e, o’go at ap weriso a’ge ano ebeat woruak o. 24#Ima. 24:19,20; Ula. 19:21; Mat. 5:38Il togulogo pasu holuk e, at il at togulogo pogulat, iak moluksogo pasu holuk e, at iagat moluksogo pogulat, e’gik ’balogo pasu holuk e, at e’gik at ’balogo pogulat, ye, oyuk ’balogo pasu holuk e, at oyugat ’balogo pogulat, 25At ebe odouk en e’gen wokho pasu holuk, o’go re, at ebeat odouk solum wokho pogulat, at iebil ebetne a’bigat pasu holuk e, o’go re at iebil ebetne a’bigat ebam pogulat, o’go re, at ogo peruak oluk, ’gobu wusogo pogulat, o’go-o’go asogoat togu lemak o.

26Ap mesik en eragam a’ge ap a, hwe a, il ’besilogo pasu holuk e, ap mesik en at mesik ’gobu werisoam periso holuk e, at il ’besilogo pasu o’go eragam a’ge ai telaksogo nese lemagoluk, ukpouwama o, arat eragam a’ge ema erlak o. 27Ye, at eragam a’ge ap a, hwe a, ’go’bu weriselat iak ’boluksogo pasu holuk, iak ’boluksogo pasu ano o’go eragam a’ge ai, we selangsogoat ukpouwak o, arat eragam a’ge ema erlak o.

Onuam en iak lebilenebisoam togulom wene

28Mo’gulesirik, wene pobuk mesik emin mo’gulontouwak oluk, mo’guleselat, “Sapi ierak a’ge iak pam ap de a, hwe de a, iak en lebilogo pasuam warago holuk e, ap sapi eiye a’ge ano woru mia o. A’geat de, sapi ai nak helep pam werak poluk no erlakma en ukpouwak o. 29Ye, sapi mesik en iak pam aphwami hwedik hwadik lebilenebiso oruak holuk e, sapi eiye a’ge ano en opsogo ’gwelakharok welemagoluk mo’gulorogup a’geat de, ’gwelakharok wolom erlakma en ukpasuam ap a, hwe a, iak pam lebilogo pasuam warago holuk e, sapi ano helep pam modok wusogo pogulat, at ap sapi eiye a’ge ano eminat wusogo pouwak o. 30Ye, at uam eiye a’ge ano worua erlak o’go uang wene erlagapsogo po opogulat, nonot werak a’ge o’go uang e, disogoat woknonto yo oluk, ogwi holuk e, is en ogwi a’ge ano hegitsogoat o’go pouwak o. 31Sapi en ap mesik omlogo ap a, hwele a, iak lebilogo pasu holuk wene tak a’ge yu hegitsogoat togu lemak o. 32Sapi ierak ano en ap mesik eragam a’ge ap a, hwe a, iak lebilogo pasu holuk, at sapi eiye a’ge ano en uang perak a’ge pam hele’gik a’ge 30 pam eragam a’ge aik ano wok, emarik, sapi ano helep pam modok wusogo pouwak o.

33Ap mesik en ’gwiang ele delak a’ge emde husogo pasulat ’gwiang delogo ele lerak erlak ukpasu ano pam ap mu a’ge mesik uam sapi a, keledai a, eba ’goboksogo ’bi lasulat warago holuk e, 34at ap ’gwiang paliso a’ge ano en e, at ap uam waraga a’ge ano o’go wogotluk, sapi warago a’ge ano at o’go pasu a’ge enat horlouwak o. 35Ye, ap uam sapi ierak a’ge mesik en, ap mu a’ge uam sapi ierak a’ge mesik werisoam warago holuk e, sapi elaluk oruak a’ge ano o’go ’belakpoluk uang sabut horlogulat, ye, sapi weriso a’ge ano ebe ’balogo hegitsogo so’but hworlogulat, tuak o. 36Asogo a’geat de, sapi ierak ano en, sapi mu a’ge lebiliso oluk enalukhweat de, at sapi eiye ano en opsogo ’gwelakharok wolom erlak ano pam ap mu a’ge mesik uam sapi werisoam warago holuk e, at sapi eiye a’ge ano en weriso a’ge ano ebalema sapi at owi yerise lomtik, werak a’ge ano arat horlouwak o, oluk,” mo’gulontouwak oluk, mo’gulesi.

Currently Selected:

Keluaran 21: Wul

Highlight

Copy