Keluaran 20

Allah en e, “Disogo togu lomup, asogo togu lomup,” oluk wene ebe 10 pam nenesa’go weregei wene

(Ulangan 5:1-21)

1-2Allah en nenesa’go weregei wene, ebe disogo,

“His henebe aphwami Mesir a’ge en eneragam a’ge ’gela’ge tenhentarok oruakma wokhonoboluk liplau wegi a’ge, henaik ’gain Nonuk Logo a’ge Allah anat o.

3His en e,

Nenaik ebe yuat, oluk mu a’ge logon ebam he’berik welat erliktu erlakma en, An henaik Allah nomu nagat erliknobogulom o.

4 # Kel. 34:17; Ima. 19:4; 26:1; Ula. 4:15-18; 27:15 His honu’gwarek paget dogwi asua ’bogorl pam a’ge emin, ’gwiangma a’ge emin, ’gwiang abel opma ik ogola welago a’ge emin, mesik ogut walsogo woru mia o.

5 # Kel. 34:6,7; Bil. 14:18; Ula. 7:9,10 An henaik ’gain Nonuk Logo a’ge Allah anatma re, his en e,

Di a’ge yu a’ge logon at emin hegit, oluk opo modok nebit ai en e, dogwi asua asogo mesik ogut walsogo werik poluk erliktu modok mia o. Aphwami an nebe enebit a’ge ai, an en is enebe emin, is en dogoma a’ge naduk dagagalat, e’berlik dagagalat, pobuk logon dagagalat, hwerli ugan pam dagema a’ge eneminat wene enebam pasu modogat welema o.

6Asogo a’geat de, aphwami logon an nebe enedesogo welat, an en henesa’go weriso a’ge hwelakpoluk togu lorogup a’ge ai nak e, is enebe emin, ye, is en dogo’gwe a’ge ene’balak nin deng ’gobok nan deng ’gobok modok a’bik dagetil laga lema a’ge emin, nedeap enebiso modogat weleik o.

7 # Ima. 19:12 An henaik ’gain Nonuk Logo a’ge Allah en aphwami logon en an nonuk we, ’burlat ogu lema a’ge ai, wene enebam paik ai en e, an nonuk ’burlat u mia o.

8 # Kel. 16:23-30; 31:12-14 Agauwa sabit a’ge re, an henaik ’gain Nonuk Logo a’ge nu’gwarek nowi ai en e, o ai pam henede ebesogo an nebagerat togulom o.

9 # Kel. 23:12; 31:15; 34:21; 35:2; Ima. 23:3 His hene’gik di a’ge yu a’ge wogu lemagoluk agauwa hebarligen wokhentegis o.

10Asogo a’geat de, agauwa sabit a’ge mesigat ai nak e, an henaik ’gain Nonuk Logo a’ge nowiatma re, set hwalogo weat wolom o. Ai erlige re, his henebe emin, heneiyagai logomalik emin, hwelani emin, heneragam a’ge logomalik emin hwelani emin, aphwami ap ’bok a’ge his honowi pam welagai a’ge emin, honuam sapi kuda emin, hene’gik logon wo modok mia o.

11 # Kej. 2:1-3; Kel. 31:17 An henaik ’gain Nonuk Logo a’ge en ’gwiang ebe emin, ’bogorl ebe emin, ik laut omugwe ebe emin, di a’ge yu a’ge ’bogorl ’gwiang pam a’ge emin, ik ogola welago a’ge emin, ’berlegat walhil waga legirik, hwerli agauwa hebarlik hwerli walhegi a’geat de, agauwa mesik sabit ai pam e, set hwalogo weat welegi o. Ai en an henaik ’gain Nonuk Logo a’ge en o agauwa sabit pam welagai ai ebe obap poluk, nu’gwarek nebaget pagathwerlegi ai o.

12 # Ula. 27:16; Mat. 15:4; 19:19; Mrk. 7:10; 10:19; Luk. 18:20; Efe. 6:2-3 His o an en wokhentaikmu eba modok opsogo welat, henebe umur yatsogo welat, togu lorogup en e, henielak henaiklak henedeap onobogu lomup o.

13 # Kej. 9:6; Ima. 24:17; Mat. 5:21; 19:18; Mrk. 10:19; Luk. 18:20; Rom. 13:9; Yak. 2:11 Ap waronobogup o.

14 # Ima. 20:10; Mat. 5:27; 19:18; Mrk. 10:19; Luk. 18:20; Rom. 13:9; Yak. 2:11 ’Babi tenontogulat, tenontuagoluk togulat, togup o.

15 # Ima. 19:11; Mat. 19:18; Mrk. 10:19; Luk. 18:20; Rom. 13:9 Yogorlia wagup o.

16 # Kel. 23:1; Mat. 19:18; Mrk. 10:19; Luk. 18:20 Heniak eseiyat aphwami logon onobok ’balogup o.

17 # Rom. 7:7; 13:9 Aphwami logon onowi werik emin, onugwami emin, eneragam a’ge logomalik emin, hwelani emin, onuam emin, ena’ge di a’ge yu a’ge emin,

Nagai, oluk henede epagup o,”

oluk mo’gulentesi.

Aphwami Israel a’ge modok onogorlok aga wene

18 # Ibr. 12:18,19 At Nenaik ’gain Onuk Logo a’ge en asogo mo’gulentesi ai re, dom ano pam obinal yebeksogo hobu a’bik ligagoma, enil hogulat, orlolu o’borlogouk ’bageselat, ’bi’gong iak inghasulat, tagoma iak enesa’go hologo welat onogorlok emarik onuak lup-lup enebe walekma edik welat ’geksogo welegesa. 19Asogo edik welat, is en e, Musa disogo mo’guligisa,

“Wene hat en mo’gulnentasukhwe nenesa’go holulat o. Holuk e, nis pobuk nenebe waromulno oluk e, Allah en iak mo’gulnonto modok erlak o,” oluk mo’guligisa. 20Asogo mo’gulegisema, at Musa en e,

“Honogorlok hagup o. Allah wagarik mo’gulnentasu ai re, watnenebigoluk puk, erlak o. We, his en wiak tu erlakma en, at iak ai hwelakpoluk hegitsogo togulat his en at erliktugulat, hau worogu lemagoluk henebabut ’baligoluk wagarik egei o,” oluk mo’gulentesi. 21Asogo a’geat de, aphwami ebano enebe walegat eba edik oruakhwe, at Musa emategat at Allah ebe o hena ogola eba modok hiktakma oruakma eba horoksogo ligaga.

Erliktogulom a’ge paget mo’gulentesi wene

22Asogo lasuam e, at Allah en Musa disogo mo’gulesi, “Hat en e, is aphwami Israel a’ge wene yu mo’gulentemin o. An Allah ’bogorl pam en eselegi a’ge ano re, is e enil yetniegesa ani o. 23An oruakhwe perak a’ge emin, emas a’ge emin, ebano a’ge pam enasua ogut mesik heli’gogo pagathorloluk, is an nemin hwediktak poluk erliknobogumu no yo. 24A’geat de, an nebaget wusogo odouk narlogulat togu lemagoluk, ’gwiang mesik wokho hele’gik poluk, ai pam kambing domba emin, sapi emin, wusogo nebaget odouk narlogulat, nemin hwedik tuogoluk, wusogo an woknogulat, togu lemak o. A’geat de, an en tagenebegi a’ge eberogulat, nonuk logo nobogulomok oluk, an en ebale pegimu, heli’gogo pil lagaimu ebano ’berlegat ’gwelagentil lasulat, nede aganhan enebam pil lasu leik ani o. 25#Ula. 27:5-7; Yos. 8:31Is an nebaget wusogo odouk narlogulomma helep pam worogulat holuk e, besi wa’gun a’ge pam ’gagalogo poluk woru holuk e, wene ’belak oruakhweat de, sagalogo poluk woruama re, yogunat ’gagalogo poluk worogumu no yo. At e, helep ’gagalak erlak a’ge ebesik a’ge pam nak worogu lemak o. 26Nebaget wusogo odouk narlnoum a’ge paget woluk wagalat e, yel’berla yat a’ge petne ligom mia o. Enage telakma onto ebeletak o, oluk,” egei.

Currently Selected:

Keluaran 20: Wul

Highlight

Copy