Keluaran 19

Aphwami Israel a’ge dom Sinai pam wegesa wene

1-2Aphwami Israel a’ge o Mesir ukpoluk liplau wegesarikmu en, dugwi ’biren a’ge pam waga legesarik en, o Rafidim eba ukpoluk wegesarik e, dugwi mesik tanggal 1 a’ge pam o leimu aphwami erlakma onuk Sinai leimu dom Sinai pam wegesarik e, o tabo sum owi dom edipmu ebano werigisa.

3Is o asogo werik poluk oruakhwe, at Musa Allah emin sarlok tuogoluk dom ai pam ligaga. Ligagama at Nenaik ’gain Onuk Logo a’ge ebe dom ai pam en Musa en aphwami Israel Yakub en dogoma a’ge ebano mo’gulenta ’bumagoluk disogo mo’gulesi,

4“His en e, an en aphwami Mesir a’ge tagenebegirik tue lok a’ge onuk rajawali en emalik agapsaburl lekho wogonoboluk wago ai ’gela’ge, an nanni lok a’ge pam his henebe an ne’bek yema honobou wegi ai henil arat hegep o. 5#1Pet. 2:9#Ula. 4:20; 7:6; 14:2; 26:18; Tit. 2:14His yogodak an niak hologo wene wusogo wokhenebegis a’ge ai hegitsogo togup holuk e, his e, an neiyagai henematekma degelogo wokhenebik o. Aphwami ’gwiangma a’ge ’berlek e, enebe an en a’ge o. A’geat de, his nak e, henebe an nede hwedik a’ge ’gela’ge oroguptik e, 6#Wah. 1:6; 5:10henebe an nu’gwarek nebaget eiye welat, an nebaget nak togu lomup o. Wene ’berlegat mo’gulhegis a’ge ai aphwami Israel a’ge ’berlegat mo’gulontomup o,” oluk mo’gulesi.

7Asogo mo’gulesimu, at Musa ’bu agarik e, aphwami Israel a’ge onuelak odoktumagoluk worlentesimu odoktu egesema re, Nenaik ’gain Onuk Logo a’ge en di wene yu wene mo’gulesi a’ge ebano ’berlegat mo’gulentesi. 8-9Asogo mo’gulentesimu, is enebe ’berlek en eniak mesiksogoat disogo egesa,

“Nis en e, Nenaik ’gain Onuk Logo a’ge en di wene yu wene mo’gulnentesi a’ge aiyat tul o,” oluk mo’guligisa. At Musa en e, Nenaik ’gain Onuk Logo a’ge en e’gei a’ge ebano is aphwami Israel a’ge enebe ’berlegat mo’gulentesi.

“An nebe o hena ogolah he’bek ’bu eik o. Asogo ’bu eiktik wene hat mo’gulhosokhwe aphwami en enesa’go holholuk e, hwerli eria pam en, hat en demat ese legen oluk pobi togu lema o. At Musa en e, Nenaik ’gain Onuk Logo a’ge en egei a’ge ebano is aphwami Israel a’ge enebe ’berlegat mo’gulentesi. 10Hat yogodak e, is ene’bek ’bin o. ’Boguntik e, is an erliknobuogoluk o yogodak emin, loruk o’gwe emin, degelogo poluk welemagoluk mo’gulontomup o. Degelogo poluk welat, onosum opsogo emesogo poluk welemak o. 11Ye, hau e, modok degelakma welemak o. O ai erlige re, an nebe dom Sinai pam ’bu agoam e, aphwami ’berlegat enil niouwa o. 12#Ibr. 12:18-20Is ai enebe wemarik dom horoksogo orluma no oluk, enede we’gerlogo dom pam hwerli wali’gogo silorak pomup o. Sa en hwerli werak a’ge eming-eming wago holuk e, ebe modok woruagoluk wene ebam po yo. 13Wene asogo ebam poluk e, ebe ene’gik tenho erlakma en, helep pam de a? Segen pam de a, woru o. Aphwami emin, wam emin, hwerli werak a’ge ai eming-eming holuk, wene enebam poluk waronobumak o. Asogo a’geat de, ’bi’gong iak hwedik oso modok oruak holuk nak e, aphwami ai enebe dom pam perleneat orlumak o,” oluk mo’gulesi.

14-15Asogo mo’gulesimu, at Musa dom pam en ’bu agarik e, aphwami ebano Allah erliktu a’ge paget degeluagoluk disogo mo’gulentesi,

“O hau ’gela’ge re, degelogo modok poluk wolorogup en e, hwami enemin nogogup o,” oluk mo’gulentesimu, is aphwami ebano en enede degelogo welat, onosum opsogo emerogulat, tigisa.

16 # Wah. 4:5 # Ula. 4:11,12 O hau ’gela’ge hubet e, orlolu emin, obinal emin, modok tegei. Asogo tagalat, o hena hik wiak a’ge dom pam en hebarligen agarik e, ’bi’gong iak modok loksogo egei. Asogo egeimu, aphwami ’berlegat o tabo sum owi werikmu welat enesa’go hweligisarik onogorlok modok a’bik en onuak lup’bo pegesa. 17Asogo tigisema, at Musa en e, Allah emin sarlok tuogoluk is wogonoboluk libagarik e, dom edipmu edik welegesa. 18Oruakma, at Nenaik ’gain Onuk Logo a’ge ebe odouk magale e’gerlakma dom Sinai pam ’bu agoam e, dom Sinai ano ’berlegat e, odouk hobu en sebelogo pesi. Odouk hobu ano re, lei pogwiam hobu modok a’bik diptak ligago ai ’gela’ge ligagalat, dom ebe o’borlogouk loksogo tegei. 19’Bi’gong iak il-il ologun pam modok loksogoat egei. Tisoam at Musa en Allah mo’gulosoam e, at en wene o’go orlolu iak pam mo’gulesi. 20At Nenaik ’gain Onuk Logo a’ge ebe dom Sinai pam ’bu agarik, Musa ebe duk ebe pam ligemagoluk worlhesimu, duk pam ligaga. 21Ligagama, at Nenaik ’gain Onuk Logo a’ge en Musa disogo mo’gulesi,

“Hebe ’bi laguntik e, aphwami eba enebe ’berlegat an enil niouwogoluk hwerli werak a’ge ai eming holuk orlu agaimu no yo. Is enesa’go holu erlakma en, orlu agai holuk, enebe logon a’bigat warema o. 22Ye, is ap an nebe eiye a’ge ogo re, enebe modok ’gume wusogo enebe degelogo en nak, an ne’bek horoksogo wemak o. Asogo ’gume werak erlak enebe degelak erlak a’ge wema holuk e, wene enebam paik o,” oluk mo’gulesi. 23Asogo mo’gulesimu, at Musa en Nenaik ’gain Onuk Logo a’ge disogo mo’gulesi,

“Hat en nenesa’go weriselat e,

His honogola en e,

Dom ai at u’gwarek odom, oluk pobirak poluk, eragam o’gwe wali’gogo hwerli werak poluk eming holuk orluom erlakma enat togu lomup o, oluk mo’gulnentigen ai en e, aphwami eba dom pam orluom modok mia o,” oluk mo’gulesi. 24Mo’gulesimu, at Nenaik ’gain Onuk Logo a’ge en e,

“Hat togolik ’bin o. ’Boguntik e, Harun emin orlu manup o. Asogo a’geat de, ap an nebe eiye a’ge emin, aphwami ’berlegat emin, hwerli werak a’ge ai eming holuk an ne’bek orluom modok mia o. Hwerli werak a’ge ai eming hogwi holuk, wene enebam paik o,” oluk mo’gulesi. 25Asogo mo’gulesimu, at Musa ebe ’bu agarik is aphwami ebano Nenaik ’gain Onuk Logo a’ge en wene mo’gulontouagoluk mo’gulesi a’ge ano enebe ’berlegat mo’gulentesi o.

Currently Selected:

Keluaran 19: Wul

Highlight

Copy