Keluaran 16

So’boru manna a’ge emin, tue yemalmal ’gela’ge emin, wogentesi wene

1Aphwami Israel a’ge o Mesir ukpoluk liplau wegesa eria pam e, dugwi mesik obuk egeitik, pobuk mesik poloksogo tanggal 15 pam, o Elim en waga legesarik e, eba en ho’gorlakma, dom Sinai en ho’gorlakma, ’burl o leimu aphwami erlakma onuk Sin eba wegesa. 2O leimu aphwami erlakma eba welat, aphwami Israel a’ge enebe ’berlek en Musa Harun emin enebam ’bou tigisa. 3Asogo ’bou tigisarik, disogo mo’gulentigisa,

“Nenaik ’gain Onuk Logo a’ge en nis nenebe o Mesir eba watnonobuagoluk wolom a’ge o. Nis o Mesir welat e, wam no’gulat, so’boru roti a’ge no’gulat, nonogumsogo no’gu lege a’geat de, o yema di a’ge yu a’ge erlakma nele en nenebe ’berlegat waremagoluk woknonoboluk wegep yema re!” oluk mo’gulentigisa.

4 # Yoh. 6:31 Asogo mo’gulentigisema, at Nenaik ’gain Onuk Logo a’ge en Musa disogo mo’gulesi,

“An en his ’berlegat henebaget so’boru modok a’bik ebam louksogo no’gu lorogup en moru ’gela’ge ’bogorl pam en ’belebak honobou weik o. Asogo ’belakhonobou weikmu o agauwa mesik erlige nagup a’ge elitsogoat odoktogu lomup o. Asogo ’belaphentau wagoam odoktogu lorogup ai pam, is en e, an en enesa’go wusogo,

Disogo tip, asogo tip, oluk mo’gulentaik a’ge ai hegitsogo tua ya? Erlak a, oluk enebabut ’balik o. 5Agauwa huaben wolotluk agauwa mesik pam en e, honso’boru wokhentaik a’ge ai agauwa o ’birenam soru a’ge ’odoktu ’gela’ge, mesik eminsogoat odoktogulom o,” oluk mo’gulesi.

6Asogo mo’gulesimu, at Musa Harun emin en aphwami Israel a’ge ’berlegat disogo mo’gulentigisa,

“O yogodak hopmu ya re, nis nenebe Nenaik ’gain Onuk Logo a’ge en o Mesir en woknonoboluk liplau waga, oluk henaluk ema o. 7Sono hubet siaksogo, at Nenaik ’gain Onuk Logo a’ge ebe nenemin welege a’ge ai e’bak-’bage enil ’bin-’ban u a’ge houwa o. Wene nis en his mo’gulhontogu lege ai re, Nenaik ’gain Onuk Logo a’ge en nenesa’go wusogo.

Disogo tip, asogo tip, oluk mo’gulnentasu a’ge nak mo’gulhontogu lege ai en e, his en honolot het otluk ’bou togu legep ai, nis nenebam ’bou togu legep puk. We, Nenaik ’gain Onuk Logo a’ge pamat ’bou togu legep a’ge esa’go arat hwelegei o. 8His honolot het otluk nenebam ’bou togu legep ai, demat e, Nenaik ’gain Onuk Logo a’ge pam ’bou togu legep o. ’Bou togu legepma re, Nenaik ’gain Onuk Logo a’ge arat esa’go hwelegei ai en, at en his no a’ge paget hopmu akhit e, tue wokhentasulat, hubet siaksogo re, so’boru roti ’gela’ge wokhentasulat, tisokhwe honogum ningsogo no’gu lorogup o, oluk demat mo’gulhentige o,” oluk mo’gulentigisa.

9Asogo mo’gulentigisarik, pobuk at Musa en Harun disogo mo’gulesi,

“Is en ’bou togwi a’ge, at Nenaik ’gain Onuk Logo a’ge, arat esa’go hwelegei ai en, is enebe ’berlegat Nenaik ’gain Onuk Logo a’ge e’bek wemagoluk, mo’gulontomup o,” oluk mo’gulesi. 10Asogo mo’gulesimu, at Harun en is enebe ’berlegat mo’gulentasukhwe, is enil o leimu aphwami erlak o’gwe hegitsogo yethegesa ’gal e, Nenaik ’gain Onuk Logo a’ge e’bak-’bage enil ’bin-’ban u a’ge o hena ogola en hebarligen agoma enil yethegesa. 11Asogo yethegesema, at Nenaik ’gain Onuk Logo a’ge en Musa disogo mo’gulesi,

12“Aphwami Israel a’ge en ’bou togwi ai an arat nesa’go hwelegis o. An en wogentasuam, o hopmu akhit e, tue no’gulat, hubet e, so’boru roti ’gela’ge no’gulat, onogumsogo no’gu lema o. Asogo wogentasuam, an is enaik ’gain Nonuk Logo a’geat Allah nebe pobi nobua o,” oluk mo’gulesi.

13Asogo mo’gulesirik hopmu akhit e, tue yemalmal ’gela’ge onuk puyuh ai a’ge modok a’bik is aphwami Israel a’ge o tabo sum owi werigisa o’gwe ebano ’berlegat is tue nak sebelogo modok duklau wagalat, ye, hubet o’gwe re, lil ’bogorl pam en o tabo sum owi werigisa o’gwe ebano eragam o’gwe ’buagalat, tegei. 14Lil ano o leimu oruakma, o aganhan en a’ge libagarik e, e’gen wei a’ge ebano sep-sep agarik ’geli-’geli ’gela’ge agarik oruakma o lei o’gwe eba enil yethegesa. 15#1Kor. 10:3Asogo agarik oruakma, aphwami Israel a’ge enil yethegesarik e, yu no’gwe, oluk enede nalagama mo egesa. Asogo enede nalagarik, is logon en logon mo’gulontogulat disogo egesa,

“Eba no’gwe opogu legep,” oluk hin wok-wok ogu legesa. Hin wegesema, at Musa en e, disogo mo’gulentesi,

“Eba re, Nenaik ’gain Onuk Logo a’ge en his nouwagoluk wokhentesi a’ge o. 16Ap enebe lo’bok eneiyagai enemin no a’ge hegitsogo nak enebe lo’bok enebaget sogoluak ogola 3 setengah liter a’ge yagaruagoluk wokhentesi a’ge o,” oluk mo’gulentesi.

17Asogo mo’gulentesimu, is aphwami Israel a’ge asogo odoktigisa a’geat de, is logon onomuat paget 7 liter yagarogulat logon emin mangnosogo yagarogulat, is nin logon wei nak yagathorlogulat, tigisa. 18#2Kor. 8:15Asogo odoktigisarik yagathegeik sogoluak ogola walhegesa a’ge re, is nin pema a’biksogo logon emin ebam louksogo yagasogo po erlagat, ye, is nin pema we weiyat yagasogo pegesa a’ge re, we hegitsogonagat, jagathegeik pegesa, a’ge re emin hegit nagat aga. 19Asogo tigisema, at Musa en e, is disogo mo’gulentesi,

“Yagarigep a’ge ai, his logon en hubet a’ge paget logon pagup modok erlak o. We, perlengsogoat monup o,” oluk mo’gulentesi.

20Asogo mo’gulentesi a’geat de, is logon en Musa iak hologo tu erlakma en sagalogo ukpoluk hubet no a’ge logon pagathwerlegesayat. Pagathwerlegesa a’ge ebano hubet ’gwelakhegesa ’gal e, ’bomo pesirik e’ben agama hegesa. Asogo tigisema, at Musa olot het agarik wene yagentesi.

21Is en, nin hwedik nan hwedigat hubet sialogo manna ano a’ge odoksogo yagarogu legesa. Ye, manna pema ’gwiangma ukpogu legesa a’ge ebano o aganhan agoam e, a’bosu lekholuk erlak aga laga.

22O agauwa hebarlik a’ge pam nak e, enebe lo’bok enebaget manna odoksogo agauwa o ’biren a’ge paget sogoluak ogola 7 liter yagarogu legesa. Asogo yathe’gik poluk e, is aphwami Israel a’ge onuelak en wene Musa mo’gulosu aga legesa. 23#Kel. 20:8-11Mo’gulosu aga legesema, at Musa en e, disogo mo’gulentesi,

“Nenaik ’gain Onuk Logo a’ge en nenesa’go wusogo disogo togu lomup egeimu re,

O hubet agauwa sabit a’ge pam e, henaik ’gain Nonuk Logo a’ge nowi o. Holuk e, an nebaget set hwalogo wolomup o. His yogodak werakhorlo a’ge holuk e, werakhorlogulat, sakhorlo a’ge holuk, sakhorlogulat, togulat e, pobuk no a’ge holuk, hubet paget ematekma pogu lomup o, oluk egei,” oluk mo’gulentesi. 24Asogo mo’gulentesimu, at Musa en,

Disogo tip, oluk mo’gulentesi hegitsogoat, dedilaga a’ge hubet paget pagathwerlegesa. Asogo pogwiam e, e’ben otluk ’bomo po erlakma en op welaga. 25Asogo op oruakma, at Musa en e,

“O yogodak yu re, Nenaik ’gain Onuk Logo a’ge owi, at erliktogulat set hwalogo wolomma o. Holuk e, his en manna odipmu o tabo sum owi werik o’gwe eragam yema logon oruakma hagup erlak ai en e, honso’boru yogodak nagup a’ge re, eba o. 26Agauwa hebarlik pam e, honso’boru no a’ge odoksogo pagathorlogu lomup o. Asogo a’geat de, agauwa sabit a’ge pam nak e, set hwalogo oruakhwe, manna logon ’buma modok erlak o,” oluk mo’gulentesi.

27Asogo mo’gulentesi a’geat de, aphwami Israel a’ge logon agauwa sabit a’ge pam set hwalogo welarat de, manna odoktuogoluk libaga legesa a’ge re, logon enilmu aga laga modok erlak. 28Asogo togu legesema, at Nenaik ’gain Onuk Logo a’ge en Musa disogo mo’gulesi,

“Hwerli ’ga pam en, an en henesa’go wusogo,

Disogo tip, asogo tip, oluk mo’gulhentasu legi a’ge ai, niak hwelakpoluk tu erlakma en wolom no. 29Henede eberak welemis o. An en e, agauwa mesigat nak set hwalogo welemagoluk wokhentegis ai en e, agauwa sabit a’ge pam honso’boru agauwa ’birenam nagup a’ge paget elitsogo wokhentasu leik o. Ye, agauwa sabit pam e, henebe lo’bok mesigat nak holuk logon o seli’gwe lobom erlakma en honowi pam modok wolomup o,” oluk mo’gulesi. 30Ai en, agauwa sabit a’ge pam e, ene’gik akhen yabuk logon togu legesa erlagat weat welegesa ai o.

31 # Bil. 11:7,8 So’boru ai is aphwami Israel a’ge en e, onuk manna, oluk ogu legesa. Ebe re, e’gen modok wei-wei a’ge en il e, ’gut ’a’ge, oduk e, kue duktak a’ge en de, ’gin a’bosu emin worogo a’ge oduk ’gela’ge. 32At Musa en e,

“Allah en e, heneiyagai dogoma a’ge hene’balak en e,

Nene’balak Nenaik ’gain Onuk Logo a’ge o Mesir en wogonoboluk liplau wegesarik, o leimu aphwami erlakma wagalat onso’boru manna wogentesimu nogu legesa a’ge ebe yu a’ge, oluk enil hogu lemagoluk so’boru manna sogoluak ogola 3 setengah liter a’ge yagasogo pomup o,” oluk mo’gulentesi. 33#Ibr. 9:4Asogo mo’gulentesirik Harun disogo mo’gulesi,

“So’boru manna logon 3 setengah liter ’gela’ge nis neneiyagai en dogoma a’ge nene’balak enebaget wik-wok e, sogoluak mesigat nak ogola yagasogo poluk Nenaik ’gain Onuk Logo a’ge il pam pou manup o,” oluk mo’gulesi.

34Asogo mo’gulesimu, at Harun en so’boru manna ano a’ge sogoluak ogola yagasogo re, Nenaik ’gain Onuk Logo a’ge en,

Disogo tip, oluk egei hegitsogoat pouwogoluk e, peti Allah en wene wusogo woknenebegei a’ge oluk hele’gik a’ge ano orogolema pou waga. 35#Yos. 5:12So’boru manna a’ge ai is aphwami Israel a’ge onso’boru agama, 40 tahun ’gela’ge no’gu legesarik, hwerli o Kanaan enebe wolomma ’gumogoluk ’burl hwerlimu enat nogu legesa. 36(Aphwami o page welegesa eria pam e, sogoluak op a’ge emde modok loropsogo yagarogu legesa re, hwerli 3,5 liter pam yagasogo pogu legesa.)

Currently Selected:

Keluaran 16: Wul

Highlight

Copy