Keluaran 17

Ik helep lok a’ge ogola en liplau waga wene

(Bilangan 20:1-13)

1 # Bil. 20:2-13 Asogo togu legesarik, pobuk is aphwami Israel a’ge enebe ’berlegat at Nenaik ’gain Onuk Logo a’ge en e,

“Asogo tip,” oluk mo’gulentasu laga hegitsogoat, o leimu aphwami erlakma onuk Sin lei eba ukpoluk e, o e’genma en e’genma wagalat, til wegesa. Agauwa mesik erlige re, o sum owi o Rafidim eba werigisa a’geat de, o eba re, ik no a’ge modok erlakmayat werigisa. 2Asogo werigisarik e, is en ’bousogo Musa disogo mo’guligisa,

“Nis nenegeik nouwagoluk ik mesik woknentemin o,” oluk mo’gulegisema, at Musa en e,

“His e, Allah olot het oruak a? Erlak a, oluk, an nebam ’bou togu legep yema re, nopaget lalnobogu legep,” oluk mo’gulentesi.

3Asogo mo’gulentesimu, is aphwami ik nele modok a’bik agama re, Musa ebam modogat ’bou togulat e, disogo mo’guligisa,

“Nis nenebe emin, neneiyagai emin, nonuam emin, ik nele en o yema waremagoluk, o Mesir en woknonoboluk wegen ai nopaget,” oluk mo’guligisa.

4Asogo mo’gulegisema, at Musa iak loksogoat Nenaik ’gain Onuk Logo a’ge disogo mo’gulesi,

“Yethemin! Naik. Is en an nebe helep pam modok watnobuogoluk togwi ai, an en no’gosogo tik,” oluk mo’gulesi.

5Asogo mo’gulesimu, at Nenaik ’gain Onuk Logo a’ge en Musa disogo mo’gulesi,

“Hat en is aphwami Israel a’ge onuelak ’gain a’ge logon wogonoboluk e, is aphwami Israel a’ge logon pobugap onoboluk e, his naduk laga lomup o. Asogo lagalat e, ho’bouwa’gun o Mesir en ik Nil ’go’bu werigen a’ge ano he’gikmu woluk lu o. 6Asogo lasumu re, an nebe his honorogolema dom Sinai eragam helep lok a’ge ai pam edik weleik o. Eba oruakma loluk, helep ai werip o. Werisoam ik liplau wagoam e, aphwami eba ik elirat nouwak o,” oluk mo’gulesimu, at Musa en is aphwami Israel a’ge onuelak ebano enil oruakhwe asogo ’go’bu weregei.

7Asogo tegeimu re, is aphwami Israel a’ge en Nenaik ’gain Onuk Logo a’ge Allah emin, welege a? Erlak a, oluk, Musa are’ge wusogo ’bou tugulat, lalogulat, Nenaik ’gain Onuk Logo a’ge ebabut baluogoluk tigisa ai en e, o eba onuk mesik e, Masa ogulat, Meriba tualaga.

Aphwami Amalek a’ge enemin weim ebigisa wene

8Is aphwami Israel a’ge ebano o Rafidim eba oruakma, aphwami Amalek a’ge waronobuogoluk wegesa. 9Asogo wegesema, at Musa en Yosua disogo mo’gulesi,

“Ap Israel a’ge aphwami Amalek a’ge enemin weim obuagoluk logon pulogo enebemin o. Asogo pagun holuk an hubet Nenaik ’gain Onuk Logo a’ge en ’bouwa’gun woluk lu, oluk mo’gulnesi a’ge ano woluk dom pam legeiktik tenakho weleik ani o,” oluk mo’gulesi. 10Asogo mo’gulesimu, at Yosua Musa en,

“Asogo tip,” oluk mo’gulesi hegitsogoat tegeirik, at Musa emin, Harun emin, Hur emin, dom pam ligegesarik hwerli duk ebe pam ligagaihwe, at Yosua aphwami Amalek a’ge enemin weim obuogoluk laga. 11Asogo lagarik, weim asogo obogukhwe, at Musa e’gik ’bogorl akhit lagabak poluk oruakhwe re, aphwami Israel a’ge enanni egesa a’geat de, e’gik obokhasuam e, aphwami Amalek a’ge enanni egesa. 12At Musa e’gik senap agarik obokhesi ai en e, Harun Hur emin en, at Musa ebe elirat hweriogo welemagoluk helep mesik wegesarik demak pegesa. Asogo hweriogo pegesarik, at Musa e’gik ’bogorl akhit lagabak modok oruakhwe o mo obuk uagoluk, at Harun en Musa e’gik pema akhit agosogo, ye, at Hur en ogo re, e’gik pema agosogoat welaga. 13Asogo oruakhwe re, aphwami Israel a’ge en aphwami ena’gul onuk Amalek a’ge mabenap enebegesa.

14 # Ula. 25:17-19; 1Sam. 15:2-9 Asogo mabenap enebegesema, at Nenaik ’gain Onuk Logo a’ge en Musa disogo mo’gulesi,

“Is aphwami Israel a’ge enanni egesa a’ge ai enede eberak modok welemagoluk e, pelal wokho pemen o. Ye,

An en aphwami Amalek a’ge modok erlagap enebaik o, is asogo erlagap enebaikmu re, aphwami ado pema en e is Amalek a’ge onopoma ebet aga lema erlak ani o, oluk Allah en egei, oluk Yosua mo’gulomup o,” oluk mo’gulesi. 15Asogo mo’gulesimu, at Musa en di a’ge yu a’ge Allah paget wusogo narlogulomma ebale mesik hele’gegeitik onuk disogo tualegei,

“An no’bogoyum bendera lagabak e, naik ’gain Honuk Logo a’ge hebeat o,” oluk tualegei. 16Asogo tualegeirik, mesik disogo egei,

“Nenaik ’gain Onuk Logo a’ge en aphwami Amalek a’ge enemin weim ebiso modok weleik oluk, at o’bogoyum bendera ano ereiya ’gela’geat lagabak poluk tenak wolomup o,” oluk egei.

Currently Selected:

Keluaran 17: Wul

Highlight

Copy