Keluaran 10
10
Wene sogo en a’ge re Allah en ho’bukhak enebam perakpou waga wene
1Asogo agama pobuk at Nenaik ’gain Onuk Logo a’ge en Musa disogo mo’gulesi,
“Hat hebe at Firaun e’bek lu o. An en, at ’gain osi enemin en pobi tuagoluk, is enil pam elalin a’ge taga leigoluk is enede helep ’gela’ge takpoluk enebegimu o. 2Ye, pobuk e, his en e, hene’balak dogoma a’ge mo’gulontogulat e, An en e, is aphwami Mesir a’ge wene e’gin enebam pasulat, An en o Mesir eba elalin a’ge takpasu legi ani o. Pobuk ogo re, his ene nenaik ’gain ebe demat welago a’ge o, oluk e, henede nebam eberak wolomup o. At ’gain osi enemin enede helep ’gela’ge takpasu legi ai o,” oluk mo’gulesi.
3Asogo mo’gulesimu, at Musa Harun emin at ’gain ano e’bek legesarik e, disogo mo’guligisa,
“At Allah nis aphwami Ibrani a’ge ’gain Onuk Logo a’ge ano en disogo egei,
Hat an neragam sebelogo wolom hebit ai re, hwerli ’ga hwerli en wolorogun? Hebabut sebelogo, An neiyagai en erliknebi louwagoluk peragonobomup o. 4An en, An neiyagai is lo a’ge pa’get perak enebemin o, oluk mo’gulheselegi a’geat de, io lit o, oluk u erlakma en ugenebasu legen ai en e, loruk An en e, hat howi pam o Mesir di owi yu owi ’berlegat ho’bukhak perakpou weik ani o. 5Asogo perakpou wagoam e, o Mesir di owi yu owi ’berlegat e’gela emin, e emin, moru hagarle’gen ano en wiagaru erlak a’ge ebano ’berlegat ho’bukhak ebe modok a’bik wema ai ene modok ’gwiang sebelak poluk perlengsogo nouwa ani o. 6Hat howi pam emin, hosi onowi pam emin, aphwami o Mesir yema a’ge logon ’berlek onowi pam emin, ’berlegat, ho’bukhak nak ’bete ua o. Ho’bukhak a’bik wema ai re, hene’balak oruakhwe wagoam hogu legesa, erlak ai ’gela’ge. We, a’bigat wema o, oluk egei ai o,” oluk mo’gulotluk, at Musa togolik liplau wagarik waga.
7Wagama, at ’gain osi en at disogo mo’guligisa,
“At ap ai en hwerli ’ge hwerli en asogo wiagapnenebiselat modok welema epegen? Pobuk op emagoluk e, aphwami Israel a’ge enebe ’berlegat enaik ’gain Onuk Logo a’ge Allah paget erlikti louwagoluk peragonobomup o. Yethemin, nis nonowi o Mesir yema modok wiak aga ai yethasu legen erlak?” oluk mo’guligisa.
8Asogo mo’guligisarik, is Musa Harun emin ’gain ano e’bek wemagoluk worlontogwiam legesema, at en disogo mo’gulentesi,
“His henaik ’gain Onuk Logo a’ge Allah erlikti lagup o. Asogo a’geat de, his henebe sa-sa lagup no,” oluk mo’gulentesi.
9Asogo mo’gulentesimu, at Musa en e,
“Nue, nis nenebe ’berlegat, malik emin, nenarlue a’ge emin, lul o. Nis Nenaik ’gain Onuk Logo a’ge Allah loksogo erlikti lul ai en e, lagalat, nenemalik ’berlegat emin, nonuam sapi emin, domba emin, kambing emin, wogonoboluk lul o,” oluk mo’gulesi.
10Asogo mo’gulesimu, at ’gain en e,
“An en, hat en honugwami emin, heneiyagai emin, wogonoboluk lu, oluk mo’gulhum e, mia o. Hat en disogo tul, oluk ’gonu mo’gulnigen ai re, an en e,
His henaik ’gain Onuk Logo a’ge en obaphenebise lemak, oluk mo’gulnentelepma re, oluk u ’gela’geat egen o. Hiak egen ai pam en, his wiak ti louwogoluk egen hegi. 11Henebe ’berlegat lagup erlak o. We, his henaik ’gain Onuk Logo a’ge erlikti louwogoluk epegep a’ge ai paget holuk e, his ap nak lu o,” oluk mo’gulentesirik, is Musa Harun emin at ’gain owi pam ebano en mukho lebigonobou waga.
12Asogo tigisema, at Nenaik ’gain Onuk Logo a’ge en Musa disogo mo’gulesi,
“Ho’bukhak wemarik di a’ge yu a’ge owi yogo a’ge moru hagarle’gen en wiagap po erlakma en ado ukpesi a’ge ai ’berlegat nouwagoluk ho’bouwa’gun ai o Mesir eba hegit he’gik ’bilhai lak o,” oluk mo’gulesi. 13Asogo mo’gulesimu re, at Musa o’bouwa’gun ano lekhesimu, Nenaik ’gain Onuk Logo a’ge en sogwei mo orlu ago hegit eba en perakpou wagama, hup erlige puntiso modok oruakhwe, hwerli hubet dakha iogoluk tisokhwe re, ho’bukhak modok a’bik woluk waga. 14#Wah. 9:2,3Woluk wagama, o Mesir di owi yu owi ’berlegat yarluk lau wagarik, modok a’bigat oruakma hegesa. Ho’bukhak modok a’bik asogo re, naduk logon asogo om erlak a’ge o. Ye, pobuk ai ’gela’ge mesik ema erlak a’ge at de, we, ai aga aiat o. 15Asogo agarik, o Mesir di owi yu owi ’berlegat e, ho’bukhak en modok sebelegeimu re, enil yethogwiam e, modok sing nak ’bou osokhwe hegesarik di e’gela yu e’gela emin, e e’gen emin, moru hagarle’gen en wiagap po erlakma en ukpesi a’ge ebano modok perlengsogo ne’gei. Asogo ne’geimu, o Mesir di owi yu owi ’berlegat di e’gela yu e’gela emin, e e’gela emin, un a’ge logon modok ukpo erlak. We, perlengsogo modok ne’gei. 16Asogo agama, at ’gain en e, perleneat Musa Harun emin worlentesimu legesema re, disogo mo’gulentesi,
“An en his emin, henaik ’gain Allah Onuk Logo a’ge emin, henilem wiak tegis o. 17An yogodak ya wiak tegis a’ge yu erlagapsogo ukpoluk e, henaik ’gain Onuk Logo a’ge en nenebe watnenebigoluk wene modok wiak a’ge nenebam pesi ai nenebam a’ge no’gorlogo erlagap pou wagoluk ’gonu mo’gulomup o,” oluk mo’gulentesi.
18Asogo mo’gulentesimu, at Musa en e, ’gain ano ukpoluk wagarik e, se’ban pam Nenaik ’gain Onuk Logo a’ge mo’gulesi. 19Asogo se’ban pam mo’gulesimu, at Nenaik ’gain Onuk Logo a’ge en e, sogwei mo orlu ago hegit en waga a’ge ano togolik egim-agam mo obuk oso akhit en anni a’bik a’ge punhaumagoluk tegeimu re, ho’bukhak ebano o Mesir di owi yu owi ebano a’ge mesik ukpo erlakma en modok perlengsogo sogwei en purak woluk ik Laut Merah omugwe ye’gelak oruakma eba perakpou waga. 20Asogo aga a’geat de, at Nenaik ’gain Onuk Logo a’ge en at ’gain ano ede helep ’gela’ge takpesimu, aphwami Israel a’ge louwagoluk mo’gulonto erlakma enat mo egei.
Wene sirag a’ge re, Allah en o Mesir hik-’bintak pesi wene
21Asogo agama, pobuk Nenaik ’gain Onuk Logo a’ge en Musa disogo mo’gulesi,
“O Mesir o hik-’bin uagoluk e, he’gik ’bogorl akhit pei ligomup o,” oluk mo’gulesi. 22#Mzm. 105:28; Wah. 16:10Asogo mo’gulesimu, at Musa e’gik ’bogorl akhit pei ligagama re, o Mesir di owi yu owi ’berlegat o hik-’bin egeitik hiktak modok oruakhwe agauwa henagan welegesa. 23Asogo oruakhwe, aphwami Mesir a’ge en di a’ge yu a’ge enil mesik modok yetho erlak. Ye, enebe ogo o dawi-yawi laga legesa modok erlagat welegesa. Asogo a’geat de, aphwami Israel a’ge onowi welegesema eba nak e, onowi op dakharak welaga.
24Asogo takpesimu, at ’gain o Mesir ano en Musa worlhasuam lagama re, disogo mo’gulesi,
“His Henaik ’gain Onuk Logo a’ge erlikti louwogoluk hwami emin, malik emin, elit wogonoboluk lo a’geat de, honuam sapi emin, domba emin, kambing emin, woluk lagup modok erlak o,” oluk mo’gulesi.
25Asogo mo’gulesimu, at Musa en e,
“Ai holuk e, nis en Nenaik ’gain Onuk Logo a’ge Allah paget wam di a’ge yu a’ge pogulat, wusogo odouk narlogulat, til lagaihwe re, wam logon hat en woknontoat o, Nue! 26Wam nis en a’ge mesik ukpo erlakma en ’berlegat woluk lul o. Nis en wam eba a’ge pebisogo poluk e, Nenaik ’gain Onuk Logo a’ge Allah paget po a’ge re, ’berlek woluk lul nak o. Woluk loluk e, eba en Allah paget pul a’ge eria aga, oluk nenede we’gerlema o,” oluk mo’gulesi.
27Asogo mo’gulesi a’ge re, at ’gain Onuk Logo a’ge en at ’gain ede helep ’gela’ge takpesimu re, aphwami Israel a’ge louwagoluk mo’gulonto a’ge ebit modok aga. 28Ebit agarik, at Musa disogo mo’gulesi,
“Hat en, an ne’bek ya enat ’bok lak o. Pobuk an ne’bek wagoma horogole nil hio re, modok nebit o. Horogole pobuk yethaik holuk, hebe modok warorogun ani o,” oluk mo’gulesimu, 29at Musa en e,
“Nue, hat e’gen ’gela’geat, an hat he’bek pobuk wagoam, norogole hil niagun modok erlagat ani o,” oluk mo’gulesi.
Currently Selected:
Keluaran 10: Wul
Highlight
Share
Copy
Want to have your highlights saved across all your devices? Sign up or sign in
