Johani 8
8
A wasati a kumilweko kurembeni.
1Kanilezi Jesu i lo famba xitsungeni xa maOliva.
2Hi manziko wa kona i lo tlhela aya tempeleni ni mixo, ni vanhu vontlhe va lota ka yena; i lo tshama hasi a va gonzisa.
3A vatsali ni vaFarisi va lo neha a wasati loyi a kumilweko kurembeni. Laha na va mu veka xikari,
4vaku ngalo ka Jesu: Mugonzisi, loyi wasati i khomilwe na a kari a remba.
5Makunu Mosi i hi layile lomu nayweni a ku gandla hi maribye a va kunghahi; xana wena u wula yini ha yena ke? Levi 20:10; Deut. 22:22
6Va lo wula lezo kasi ku mu ringa, lezaku va fela ku kuma xilo xo mu kecara ha xona. Kanilezi Jesu i lo korama, a tsala misaveni hi litiho lakwe.
7Zonake laha va nga nonohisa va mu wutisa, i lo ti ololoxa, aku ngalo kabye: Loyi wa nwina a nga hiko na kuonha, a range a mu hoxa hi ribye. Deut. 17:7; Rom. 2:1
8I lo korama kambe, a tsala misaveni hi litiho.
9Laha vona na va zi zwile, va lo huma ha munwe-munwe, ku sangula hi lava va kale, ku kala Jesu a siyiwa yece ni wasati loyi a nga yimile xikari. Rom. 2:22
10Jesu i lo tlakusa mahlo yakwe, aku ka yena: Wasati, makunu va kwihi ke? A ku na munhu a nga ku kona ke?
11Yena aku ngalo: A nga kona, Hosi. Jesu aku ngalo: Na minawu, a nzi ku koni. Ti fambele, u nga ha onhi kambe. Lu. 9:56; 12:14; Xip. 5:14
Jesu hi kuwonekela ka tiko.
12Zonake Jesu i lo engeta a kanela ka vanhu, aku: Mina nzi kuwonekela ka tiko. Loyi a nzi lanzelako a nga ta ha famba munyameni; kanilezi i tava ni kuwonekela ka wutomi. Xip. 1:5, 9; 9:5; 12:35, 46
13A vaFarisi vaku ngalo ka yena: U ti mahela wukustumunyu wena nwinyi; a wukustumunyu ga wena a hi ginene.
14Jesu i lo va hlamula, aku: Hambu loku nzi ti mahela wukustumunyu mina nwinyi, a wukustumunyu ga mina gi nene; hakuva nza ku tiva laha nzi humako kona, ni laha nzi yako kona; kanilezi nwina a mu ku tivi laha nzi humako kona, ni laha nzi yako kona. Xip. 7:28; 9:29
15Nwina mu lamula hi ka nyama; mina a nzi lamuli munhu. Xip. 7:24; 12:47
16Hambu loku nzi wa ta lamula, a kulamula ka mina ku nene; hakuva a nzi tshami nzoce, kanilezi nzi na Dadani loyi a nzi rumileko.
17Ni lomu nayweni wa nwina ku tsalilwe ku ngalo: A wukustumunyu ga vanhu vambiri gi nene. Maheb. 10:28; Deut. 17:6; 19:15; Mat. 18:16
18Mina loyi nzi ti mahelako wukustumunyu nzi munwe, ni Dadani loyi a nzi rumileko wa nzi mahela wukustumunyu na yenawu. Xip. 5:37
19Vona vaku ngalo kakwe: I kwihi a Raru wa wena? Jesu i lo hlamula, aku: Mina a mu nzi tivi, hambu ni ku tiva Dadani wa mina. Loku mu wa nzi tivile mina, ngha na mu tivile ni Dadani. Xip. 14:7; 16:3
20A timhaka leti i lo ti kanela laha ka bhako ga minyikelo, na a kari a gonzisa tempeleni. Ku wa nga hi kona munhu a nga mu khoma, hakuva a xikhati xakwe xi wa nga se ku chikela. Xip. 7:8, 30
21I lo engeta aku ngalo kabye: Mina nza famba, zonake mu ta nzi lava, kanilezi mu ta fela kuonheni ka nwina; ni laha nzi yako kona, a mu zi koti kuta, Xip. 7:34; 13:33; Vesi 24
22A vaJuda vaku ngalo: I ta ti daya ke, lezi a nge ngalo: Laha nzi yako kona, a mu zi koti kuta?
23Aku ngalo kabye: Nwina mu huma hi lahasi, mina nzi huma hi le hehla; nwina mu va misava, mina a nzi wa misava leyi. Xip. 3:31; 15:19; 17:16; 1 Joh. 4:5
24Hikwalaho nzi mu byelile, lezaku mu ta fela zionhweni za nwina; hakuva loku mu nga kholwi lezaku nzi mina yena, mu ta fela zionhweni za nwina. Vesi 21; Mar. 16:16
25Vaku ngalo ka yena: Hi wena mani? Jesu aku ngalo kabye: Nzi zona lezo nzi wulawulileko ha zona ka nwina hi le kusanguleni.
26Nzi na ni timhaka to tala ku wulawula ni ku ti lamula hi tlhelo ga nwina; ahemba-lokoke, loyi a nzi rumileko wa tsumbeka; ni lezi nzi zi zwileko ka yena, hi zona lezi nzi wulawulako tikweni. Xip. 3:32; 7:28; 15:15
27Va wa nga zi tivi lezaku i kanela kabye hi Dadani.
28Hikwalaho Jesu aku ngalo: Loku mu tlakusile Nʼwana wa munhu, zonake mu ta zi tiva lezaku nzi mina yena, ni lezaku a nzi mahi nchumu ha nzoce, kanilezi nza kanela kota lezi a nzi gonzisileko Dadani. Xip. 3:14; 12:32; Rom. 1:4
29Loyi a nzi rumileko i zinwe na mina, a nga nzi siyangi nzoce; hakuva xontlhe xikhati nzi maha lezi zi mu xalalisako. Xip. 4:34; 5:30; 14:10; Vesi 16
30Lal a a nga kanela timhaka leti, a vanyingi va lo kholwa ka yena.
A vana va Abrahama.
31Jesu i te ngalo ka vaJuda lava va kholilweko ka yena: Loku mu simamisa kugonziseni ka mina, zonake mu vapizani va mina hakunene;
32zonake mu ta tiva zinene, ni zinene zi ta mu tlhatlhisa. Rom. 6:14, 18, 22; 8:2; Jak. 1:25
33Va lo mu hlamula, vaku: Hina hi pswalo wa Abrahama, cima a hi na ngava tikhumbi ta munhu. Hi yini u wulako wena, uku: Mu ta tlhatlhiswa? Levi 25:42; Mat. 3:9
34Jesu i lo va hlamula, aku: Hizinene nziku ka nwina: Loyi a mahako kuonha, i tshama khumbi ya kuonha. Rom. 6:20; 2 Ped. 2:19
35A khumbi a yi tshami ndlwini xontlhe xikhati, kanilezi a nʼwana i tshama kona xontlhe xikhati. Gal. 4:30
36Hikwalaho loku Nʼwana a mu tlhatlhisa, mu tava mu tlhatlhekile futsi. Rom. 8:2; Gal. 5:1
37Nza zi tiva lezaku mu pswalo wa Abrahama; kanilezi mu ranza ku nzi daya, hakuva a mhaka ya mina a yi kumi wutshamu ka nwina.
38Mina nza mu byela lezi nzi zi wonileko ka Dadani, na nwina mu maha lezi mu zi zwileko ka raru wa nwina. Xip. 3:32; 5:19, 30; 14:10, 24
39Va lo mu hlamula, vaku: A dadani wa hina hi Abrahama. Jesu aku ngalo kabye: Loku mu wa hi vana va Abrahama, ngha na mu maha mitiro ya Abrahama. Mat. 3:9; Rom. 2:28; Gal. 3:7, 29
40Kanilezi makunu mu lava ku nzi daya, mina nzi nga munhu loyi a mu byelileko a zinene, lezi nzi zi zwileko ka Nungungulu; Abrahama a nga mahangi lezo.
41Nwina mu maha a mitiro ya raru wa nwina. Vaku ngalo kakwe: A hi pswalwangi hi wubhayi; hi na ni Dadani munwe, yena Nungungulu.
42Jesu aku ngalo kabye: Loku Nungungulu a wa hi Raru wa nwina, ngha na mu nzi ranza; hakuva nzi humele nzita hi le ka Nungungulu; hakuva a nzi ti telangi hi wutsumbu ganga, kanilezi yena i lo nzi ruma. Xip. 5:43; 16:27; 1 Joh. 5:1
43Hiyini mu nga pimiko a xuxela ga mina ke? I hakuva a mu na ku ingisa a mhaka ya mina.
44Nwina mu vana va raru wa nwina a nga Satani, mu ranza ku maha a kunavela ka raru wa nwina. Yena i wa hi mudayi hi kusanguleni, a nga yimi zineneni, hakuva ku hava zinene ka yena. Loku a wulawula mawunwa, i wulawula hi za wutsumbu gakwe; hakuva hi muhembi, i raru wa mawunwa. Mat. 13:38; 1 Joh. 3:8; Juda 6
45Kanilezi mina, lezi nzi wulako zinene, a mu nzi kholwi.
46Hi wihi ka nwina a nzi konako hi kuonha ke? Loku nzi wula zinene, hikuyini mu nga nzi kholwiko ke?
47Loyi a nga wa ka Nungungulu, wazwa a timhaka ta Nungungulu; nwina a mu ti ingisi, hakuva a mu va ka Nungungulu. Xip. 10:26; 1 Joh. 4:6
48A vaJuda va lo hlamula, vaku kakwe: Kasi a hi wulangi zona, laha hi nge ngalo, lezaku u muSamaria, ni ku u na ni dimoni?
49Jesu i lo hlamula, aku: A nzi na dimoni; kanilezi mina nzi dzunza Dadani, kasi nwina ma nzi kanyisa.
50A nzi ti laveli a wudzunzo ga mina nwinyi; i kona munwe loyi a gi lavako, hi yena a lamulako. Xip. 5:41; 7:18
51Hizinene nziku ka nwina: Loku munhu a hlayisa mhaka ya mina, cima a nga tazwa kufa. Xip. 5:24; 11:26
52A vaJuda vaku kakwe: Makunu ha zi tiva lezaku u na ni dimoni. Abrahama i file, ni vaprofeti kambe; na wena u ngalo: Loku munhu a hlayisa mhaka ya mina, cima a nga tazwa kufa. Zak. 1:5; Maheb. 11:13
53Wena u wa hombe ku hunza a dadani wa hina, loyi a ngafa ke? Ni vaprofeti va file; u ti maha mani wena ke?
54Jesu i lo hlamula, aku: Loku nzi ti dzunza, a wudzunzo ga mina a hi nchumu, kanilezi hi Dadani a nzi dzunzisako, loyi ha yena mu nge ngalo, i Nungungulu wa nwina; Xip. 5:31, 41; 16:14; 17:1
55kasi a mu mu tivangi, kanilezi mina nza mu tiva; ni loku nzi wa ta wula nziku: A nzi mu tivi, nzi tava muhembi kota nwina. Kanilezi nza mu tiva, nzi hlayisa a mhaka yakwe. Xip. 7:28, 29
56A raru wa nwina Abrahama i lo tsaka lezaku i wa ta ngha a wona a siku ga mina; i gi wonile a nengela. Lu. 10:24; Maheb. 11:13
57A vaJuda vaku ngalo kakwe: A ku se kuva nawo a 50 wa malembe, kasi u mu wonile Abrahama ke?
58Jesu aku ngalo kabye: Hizinene nziku ka nwina: Nzi wa hi kona Abrahama na a nga se ku pswaliwa. Ekso. 3:14; Isa. 43:13; Kuv. 1:8
59Hikwalaho va lo rola maribye, a kuva va mu cukunyetela ha wona; kanilezi Jesu i lo ti fihla a huma tempeleni. Lu. 4:30; Xip. 10:31, 39; 11:8
Currently Selected:
Johani 8: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
