Genesisi 19
19
1A tingelosi ti lota Sodoma laha gambyeni; Loti i wa tshamile laha nyangweni ya le Sodoma. Laha na a ti wona i lo suka a ti khinga; a korama lahasi.
2I te ngalo: Langutani, tihosi tanga, ma nga hambukani mu enghena ndlwini ya nanza ga nwina, mu tshama kona wusiku legi, mu hlaza milenge ya nwina; mu ta vuka ni mixo mu khoma ndlela ya nwina mu famba. Tona ti te ngalo: Ahihi, hi ta tshama laha handle.
3Yena i lo ti khongotela nguvu, zonake ti lo hambukela ka yena, ti enghena lomu ndlwini yakwe. I lo ti mahela zakuga, a bhika xibaba xi nga hiko na comelo, tiga.
4Kanilezi na va nga se etlela, a vavanuna va muti, a vanhu va le Sodoma, va lota ranzela a yindlu, vatsongwani ni vahombe, na vata hi matlhelo wontihe:
5va lo vitana Loti vaku kakwe: Va kwihi a vavanuna lava va enghenileko ka wena wusiku legi ke? va humese kasi ha va tiva ba. Isa. 3:9; Rom. 1:27
6Loti i lo huma aya ka vona le nyangweni, i lo vala livati lenzhako kakwe.
7Aku ngalo: Vamakabye, mu nga onhi kota lezi.
8Langutani, nzi na ni vanhwana vambiri lava va nga tivangiko wanuna; ngha mina nzi humesa vona, mu maha kuranza ka nwina ha vona; kanilezi ka lava vanhu mu nga mahi nchumu ka vona; kota va tileko nzhutini wa langwa la yindlu ya mina.
9Va te ngalo: Suka! Va engeta vaku: Loyi munhu i tile ku ta luvela laha, i lava ku hi lamula, makunu hi ta xanisa wena nguvu ku hunza vona. Va lo tsimbeketa Loti, na va tshinela ku tshova livati.
10Kanilezi a madota ma lo nawuluta a mandla yabye, va lo enghenisa Loti lomu ndlwini, va vala livati.
11Va lo vaba hi wukhumu a vanhu lava va nga hi laha nyangweni ya yindlu, a vatsongwani ni vahombe; kasi va karala hi ku lava nyangwa.
12A madota ma ku ngalo ka Loti: Mbamani u nga navo laha kusuhani ke? vamwane va wena, ni vana va wena, ni vanhwana va wena, ni vontlhe lavo va nga va wena va humese ka legi wutshamu.
13Hakuva hi ta lovisa legi wutshamu, hi kota ya huwa ya hombe yi mahiwako hi kota ya vona mahlweni ka Jehova; Jehova i hi rumile akuva hi lovisa legi wutshamu.
14Loti i lo huma a ya wulawula ni vamwane vakwe, aku ka vona: Sukani mu huma ka legi wutshamu; hakuva Jehova i ta lovisa lowu muti. Kanilezi a so khwatsi mutseketseli mahlweni ka vamwane vakwe.
15Laha gi nga cile a tingelosi ti lo mu hatlisisa Loti tiku: Suka, u teka sati wa wena, ni vanhwana va wena va vambiri lava va nga laha u nga taku u lobyiswa zionhweni za muti.
16Kanilezi na a ha rivateka, a madota ma lo mu khoma hi canja, ni canja ga sati, ni canja ga vanhwana vakwe va vambiri, hakuva Jehova i wa hi ni tipswalo ka yena, i lo mu humesa a mu yisa lahandle ka muti.
17Laha na va va humesile lahandle ka muti, munwani i te ngalo: Tsutsuma u ponisa wutomi ga wena, u nga cuwuki nzhako, u nga yimi lomu livaleni leli; chavela xitsungeni, u nga taku u loviswa.
18Loti i te ngalo: Ngha zi nge nghaho, Hosi yanga.
19Languta, a nanza ga wena gi kumile a thomo mahlweni ka wena, u kulisile a tipswalo ta wena hi ku hlayisa a wutomi ga mina; a nzi na ku chavela xitsungeni, ku nga taku a khombo gi nzi kamanyeta nzifa.
20Languta, a muti lowuya wu kusuhani ka kuva nzi chavela ka wona, wona wu tsongwani, ngha nzi chavela ka wona, nzi hanya; a hi wu tsongwani ke?
21Yena i te ngalo: Languta, nza ku vumela ka mhaka leyo, nzi nga ta lovisa a muti lowu u wu wulako.
22Hatlisa u chavela ka wona, hakuva nzi nga ta maha nchumu na u nga se chikela kona. Hikwalaho a vito ga muti gi lo vitanwa ku Zoare.
23Gi te gi tsuwuka gambo ka tiko lego na Loti a enghena Zoare,
24zonake Jehova i lo nisa a solufa ni nzilo hehla ka Sodoma ni Gomora, zita hi ka Jehova le tilweni. Deut. 29:23; Isa. 13:19; Lu. 17:29
25I lo hetisa leyo miti ni nkova wontihe, ni vontlhe va akileko ka leyo miti, hi lezi zi kulako misaveni.
26Kanilezi a sati wakwe loyi a nga mu lanza, i lo cuwuka nzhako, a su maha ruka ga munyu.
27Abrahama i lo vinzuka ni mixo, aya ka wutshamu lego a nga wa yimile na Jehova;
28i lo cuwuka a Sodoma ni Gomora, ni tiko gontlhe ga le nkoveni, i lo wona a musi wa tiko na wuya hehla kotisa a musi wa phingo.
29Lezo laha Nungungulu a nga lovisa a miti ya lomu mikoveni, i lo alakanya Abrahama, a vumela Loti ku pona kuhahlulweni loko, laha a nga lovisa a miti leyi Loti a nga wa akile ka yona.
30Loti i lo suka Zoare, a ya tshama xitsungeni ni vanhwana vakwe va vambiri, hakuva i lo chava ku tshama le Zoare. Yena i lo ya aka le mhakweni, yena ni vanhwana vakwe va vambiri.
31A nʼwana wa matewula i te ngalo ka nzisana yakwe: Dadani ngwa kale, ni lomu tikweni a ku kona a wanuna a ta nga enghena ka hina kota mukhuwo wa tiko gontlhe;
32ngona hi ta mu nwisa a vinya dadani, kasi hi fela ku etlela zinwe naye, kasi hiva ni tinyimba ha dadani.
33A wusiku lego va lo nwisa a raru wabye a vinya; loyi wa nhonzwa i lo enghena, a etlela ni raru wakwe; na yena a nga tivangi nchumu laha a nga etlela ni laha a nga vuka.
34Zonake hi manziko wa kona loyi wa nhonzwa i te ngalo ka loyi wa nzisana: Languta, nzi etlele na dadani matolo; a hi engete kambe hi mu nwisa vinya wusiku legi, u enghenawu u etlela naye, kasi hiva ni tinyimba ha dadani.
35Va lo mu nwisa vinya raru wabye wusiku lego; i lo sukawu loyi wa nzisana a ya etlela naye; i wa nga tivangi nchumu laha a nga etlela ni laha a nga vuka.
36Zinghaho a vanhwana va Loti va vambiri va lo xuriswa tinyimba hi raru wabye.
37Zonake loyi wa nhonzwa i lo beleka nisanyana, a chula vito gakwe ku hi Moabi; loye hi yena a raru wa maMoabi kala nyamutlha.
38Yenawu loyi wa nzisana i lo beleka nisanyana, a chula vito gakwe ku hi Benammi; loye hi raru wa vana va Amoni kala nyamutlha.
Currently Selected:
Genesisi 19: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
