Genesisi 18

A kulobyiswa ka Sodoma ni Gomora.

1Jehova i lo woneka ka yena le mikuhlwini ya le Mamre; khwatsi hilezi a nga wa tshamile laha nyangweni ya tenda gakwe laha munwini.

2I lo tlakusa a mahlo yakwe i lo cuwuka; languta, madota manharu ma wa yimile kusuhani kakwe, ni laha a nga va wona i lo suka hi laha nyangweni ya tenda a tsutsuma ku va khinga, i lo korama, Maheb. 13:2

3aku ngalo: Hosi yanga, loku nzi kumile thomo mahlweni ka wena u nga hunzi a nanza ga wena.

4Nzi ta neha a mati ma tsongwani, mu hlamba mikonzo ya nwina, mu humula lahasi ka sinya.

5Nzi ta neha xikhenwana xa xibaba, mu tiyisa a ntamu wa nwina; zonake mu ta hunza, kota lezi mu chikeleko ka nanza ga nwina. Vona va te ngalo: Hi zona, maha kota lezi u wulileko.

6Abrahama i lo hatlisa kuya ka Sara lomu ndlwini, a yaku ngalo: Hatlisa u hakasela ziringaniso zinharu za mapa, u maha zibaba.

7Abrahama i lo tsutsuma aya ntlhambini a ya gula a role go Olovana go saseka, i lo nyika nanza; a hatlisa a gi sasisa.

8I lo teka mawomba ni masi, ni role legi a nga wa gi sasisile, i lo zi veka mahlweni kabye; i lo yima mahlweni kabye laha hasi ka sinya, va loga.

9Vona va te ngalo kakwe: I kwihi Sara sati wa wena ke? Yena aku ngalo: I lomu ndlwini.

10Yena i te ngalo kakwe: Hizinene nzi ta wuya ka wena ha nwakani; languta, Sara a sati wa wena i tava ni nisanyana. Sara i lo zizwa na hi laha nyangweni ya yindlu yi nga hi nzhako kakwe.

11Makunu Abrahama na Sara va wa hi vakale, va wa khosahele, ku wa khawule ka Sara a mukhuwo wa vavasati.

12Sara i lo hleka lomu mbilwini yakwe, aku: Lezi makunu nzi khosaheleko nza ha tava ni kunengela xana? Ni hosi ya mina yi khosahele kambe. 1 Ped. 3:6

13Jehova i te ngalo ka Abrahama: O hlekela yini Sara, lezo a nge ngalo, Nweno nza ha ta kuma nwanana na nzi khosahele xana?

14Kasi xi kona xilo xi tsanzako Jehova ke? Hi xikhati xi yimisilweko nzi ta Wuya kambe ka wena ha nwakani, Sara i tava ni nwanana. Lu. 1:37

15Zonake Sara i lo kaneta aku: A nzi hlekangi; hakuva i wa chava. Kanilezi yena aku ngalo: Futsi, u hlekile.

16Ni madota ma lo suka ma komama Sodoma. Abrahama i lo famba navo a va heleketa.

17Jehova i te ngalo: Nzi ta fihlela Abrahama lezi nzi ta nga zi maha ke?

18Lezo Abrahama a ta ngava tiko ga hombe ga ntamu hakunene, a matiko wontihe ya misava ma ta katekiswa hi yena. Ekso. 1:7; Miti. 3:25; Gal. 3:8

19Hakuva nzi mu hlawulile lezaku i ta laya a vanana vakwe, ni ngango wakwe a nzhako kakwe, kasi va hlayisa a ndlela ya Jehova, va maha kululama ni zinene; kala Jehova a mu nyika lezi a mu tsumbisileko zona.

20Jehova i te ngalo: Kota lezi a huwa ga le Sodoma na Gomora gi nga ga hombe, ni lezaku a zionho zabye za tshisa;

21nzi ta relela nzi ya wona lezaku hakunene va mahile zontlhe kota lezi a kurila ku chikeleko ka mina; ni loku zi nga hi lezo, nzi ta ya zi tiva.

22Ni madota ma lo fulara ma komama Sodoma; Abrahama i wa ha yimile mahlweni ka Jehova.

23Abrahama i lo tshinela kusuhani i te ngalo: U ta lovisa a valulamileko ni vangalulamangiko ke?

24Xana loku va hi kona xikari ka muti a 50 wa valulamileko, hakunene u ta wu lovisa, u nga tsetseleli wutshamu hi kota ya valulamileko lavo va 50 xikari kabye ke?

25Ngha lezo zi nga hi ka wena a ku maha lezo, a ku lovisa valulamileko ni vangalulamangiko. A mulamuli wa tiko a nga ta tsema timhaka hi nongameto ke?

26Jehova i te ngalo: Loku nzi kuma le Sodoma a 50 wa valulamileko xikari ka muti, nzi ta tsetselela a wutshamu, lego hi kota ya vona lavo.

27Abrahama i lo hlamula, aku ngalo: Languta, makunu nzi tiyile ku wulawula ni Hosi ya mina, mina loyi nzi nga tshuri ni khuma.

28Kutani ku ta vumaleka a ntlhanu xikari ka lavo va lulamileko va 56; wena u ta lovisa a muti wontihe hi kuvumaleka ka vantlhanu ke? Yena aku ngalo: Nzi nga ta wu lovisa, loku nzi kuma kona a 45.

29I lo engeta a wulawula naye kambe, aku: Ahati loku ku kumiwa lomo va 40? Aku ngalo: Nzi nga ta maha nchumu hi kota ya lavo va 40.

30Yena i te ngalo: Ngha Hosi ya mina yi nga zangari, loku nzi engeta ku wulawula: Ahati loku ku kumiwa lomo 30? Yena i te ngalo: Nzi nga ta maha nchumu loku nzi kuma 30.

31I te ngalo: Languta, nzi tiyile ku wulawula ni Hosi: Kutani loku ku kumiwa 20? Yena i te ngalo: Nzi nga ta wu lovisa hi kota ya va 20.

32Yena i te ngalo: Ngha a Hosi ya mina yi nga zangari, nzi ta wulawula khatiginwe basi: Ahati loku ku kumiwa a va khume? Nzi nga ta wu lovisa hi kota ya lavo va khume.

33Jehova i lo suka a famba laha a nga wa mbhetile ku wulawula na Abrahama; yenawu Abrahama i lo tlhelela kaya kakwe.

Currently Selected:

Genesisi 18: TSC72

Highlight

Copy