Zakariya 6
6
Giwoniso nya livbandre na siraru: Dzikareta dzina
1Nyi di engedza gambe nyi khusa maho yangu: Nyi di wona dzikareta dzina na dzi gu duga khu vbakari nya sigomo sivili; sigomo sesi si diri sa sugu. 2#Wona gambe: Gutu 6:4; Gutu 6:5. Kareta nya guhegule yi di gu ndrindrwa khu dzikavalu nya gufuvile; eyi nya wuvili, yi di gu ndrindrwa khu dzikavalu nya gusivbale; 3#Wona gambe: Gutu 6:2. eyi nya wuraru, yi di gu ndrindrwa khu dzikavalu nya guage, gasi eyi nya wu na, yi di gu ndrindrwa khu dzikavalu nya maratarata. Dzatshavbo dzi diri ni tshivba. 4Khavbo avbo, nyi di wudzisa ngilozi yi nga bani yi ganela ni eni, kheni: “Ginani esi, Mune wangu?”
5 # Wona gambe: Gutu 7:1. Ngilozi yi di nyi hakha, khiyo: “Aya khu maphuvbo ya mana ya Ndzadzini, ma dugago khavbo ma nga bani ma emide mbeli ga Pfhumu ya mafuni gwatshavbo. 6Kareta yi ndrindrwago khu dzikavalu nya gusivbale, ya gu hongola phuvbo ga litigo la Wuronga; iyo yi ndrindrwago khu dzikavalu nya guage, ya gulandra khu hwane; iyo yi ndrindrwago khu dzikavalu nya maratarata, ya gu hongola phuvbo ga litigo la Marandzi.”
7Dzikavalu nya tshivba dzi di duga dzi zama gu thanga mbeli gasi gu dzundrulugela litigo. Pfhumu Nungungulu a dzi embela, khuye: “Gimbilani mu dzundrulugela litigo latshavbo.” Idzo dzi di duga dzi dzundrulugela litigo. 8Khavbo avbo, ngilozi yi di nyi rana yi nyi embela, khiyo: “Wona, vale va dugidego va hongola phuvbo ga Wuronga, va hefemudzide Liphuvbo langu tigoni ga Wuronga.”
Gihugu nya wufumu hungoni ga Josuwa. Lithungedwa
9 Pfhumu Nungungulu a di nyi embela, khuye: 10“Hakha miningelo ya vale va guromo wugumbini, a gu ya vathu vava: Helidhayi, Tobhiya ni Jedhaya. U na bela gambe khu litshigu lolo ndrangani ga Josiya, mwamana wa Sofoniya, va widego khu Bhabhiloni. 11Dzega parata ni ndralama, u gire gihugu nya wuzundzo, u gi vega hungoni ga Josuwa, mwamana wa Jozadhaki, muphasi nya khongolo nya mhamba. 12#Wona gambe: Jer 23:5; 33:15; Zak 3:8.Mu embele, khuwe: Pfhumu Nungungulu nya Tshivba Yatshavbo a ngu ganela kharati, khuye: Avba womo mwama, lina laye a gu uye lithungedwa, uye a na bugedza nyaluphye khu wulangani gwaye, a na vbahedza Nyumba ya Pfhumu Nungungulu. 13Uye kamwe khuye a na vbahedzago Nyumba ya Pfhumu Nungungulu, a na ambagiswa wudhumo, a gu fumela vathu na khade khu vbagikhalotunu gwaye nya wufumu, a na bhanya gumogo wuphasi nya mhamba ni wufumeli, gambe gu na manega gupwanana vbakari gwawe va vavili. 14Gihugu nya wufumu gi na vegwa Nyumbani ga Pfhumu Nungungulu kha nga gialakanyiso nya mithumo ya Helidhayi, Tobhiya ni Jedhaya gumogo gambe ni Hemi, mwamana wa Sofoniya. 15Ni avo va guromo hwindzo va nata va ta vbahedza Nyumba ya Pfhumu Nungungulu, khavbo mu na dzitigo gukhenu eni nyi rumedwe gwanu khu Pfhumu Nungungulu nya Tshivba Yatshavbo, isoso si na girega khu lisine mwa gu landrisa khu gutumbega lito la Pfhumu Nungungulu wanu.”
Currently Selected:
Zakariya 6: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
