Zakariya 7
7
Guhala gu si tsakisigo Nungungulu
1Khu litshigu nya wu na nya ngima nya livbandre na wu na, wu ranwago pwani Kisilewu, nya mwaga nya wu na nya gufume ga mufumeli Dhariyo. Magana ya Pfhumu Nungungulu ma di rumedwa ga muprofeti Zakariya. 2Vathu va Bheteli va rumedwe Sarezeri ni Regemi-Meleki gumogo ni vathu vawe, gasi guya lomba sikategiso mbeli ga Pfhumu Nungungulu, 3ni guya wudzisa ga vaphasi nya mhamba va nga bani va romo Nyumbani ga Pfhumu Nungungulu nya Tshivba Yatshavbo ni ga vaprofeti, khavo: “Ina hi ngu yela gu lila ni gu hala khu ngima nya livbandre, kha nga idzo hi tago na hi gu gira myaga yatshavbo, gani?” 4Khavbo avbo, Pfhumu Nungungulu nya Tshivba Yatshavbo a di nyi embela, khuye: 5“Nga wudzisa ga vathu vatshavbo va tigoni momu ni ga vaphasi nya mhamba, khuwe: Avbo mu nga lilani ni gu hala khu ngima nya livbandre ni oyu nya livbandre na mivili, ndrani nya myaga yeyi nya livbandre na mavili magumi, ina mu di hala khu kotani gwangu, gani? 6Ahati gikhati mu nga bani mu hodza ni gu sela, mu di si dzi hodzeli ni gu dzi selela enu mwabune, gani? 7Kha mwa ma pwani magana ya Pfhumu Nungungulu a nga ma tivisago khu magana ya vaprofeti va gale, matshiguni yale Jerusalema gu nga bani gu vbanya vathu khu gurula gumogo ni madhoropa yaye ma mu randredego, gikhati sipandre nya mayigo ya Negebhi ni Sefela ma nga bani ma tade khu vathu, gani?”
8 Pfhumu Nungungulu a di ganela nyaluphye ga Zakariya, khuye: 9Pfhumu Nungungulu nya Tshivba Yatshavbo a ngu ganela kharati, khuye: “Lamulani khu gululama ni lisine, nonedzani wuwadi ni wuhindzi, moyo ni moyo a na pwele wuhindzi ndriyaye. 10Mu nga tshanisini dzinoni ni sigulungu, valuveli ni sisiwana ambari gu luga makungo myonyoni gwanu nya gutshanisane khu gyanu.
11Aholu, avo kha va dzina gu nyi yingisa, va di hatha gu nyi pfhurarela, va nyi wugela, va tshika dzindzeve dzawe gasi va sipwi magana yangu. 12Va di bangisa myonyo yawe kha nga giwindri nya gutiye, gasi va si yingisi Nayo ambari magana ya Pfhumu Nungungulu nya Tshivba Yatshavbo, ma rumedwego khu Liphuvbo khu kanani ga vaprofeti va gale; khu kotani nya isoso Pfhumu Nungungulu nya Tshivba Yatshavbo a di va wugela khu likhulo nya likhongolo ngudzu.
13Avbo nyi nga va ranago, avo kha va nyi yingisa, avo navo va di nyi rana, Eni neni nyi si va yingisi; a ngu ganela Pfhumu Nungungulu nya Tshivba Yatshavbo. 14Uye a di va phalalegisa khu phuvbo nya gingulu vbakari nya mayigo yatshavbo va nga bani va si mati; hwane gwawe, litigo li di tshala li phangwa khu gu avo na va dugide, mwalo muthu a na vbindrago, mwendro gu bela ni gu duga gambe khumo. Kholu va dzegide litigo nya ladi nya wurendra va li vbindrugedza li khala giwula.
Currently Selected:
Zakariya 7: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
