Zakariya 12
12
Gu tshudziswa ga vathu va Nungungulu
1Mahungu ya Pfhumu Nungungulu khu mahungu ya vathu va na Israyeli; Pfhumu Nungungulu a ladzago Ndzadzini, a wuya a emisa siseketelo nya mafu, a wumba hefemulo ndrani nya muthu, a ngu ganela kharati, khuye:
2Wonani, nyi na gira Jerusalema a khala gikombe nya wadwa gasi gu levisa mayigo yatshavbo ma mu randredego; va na gira idzosaye ga Judha litshigu a na randredwago.#12:2 Mwendro gu randredwa lidhoropa la Jerusalema. 3Litshigu lolo, nyi na gira Jerusalema gu khala giwindri nya gulemele ga mayigo yatshavbo; oyu a na yedzago gu gi khusa, a na vbadzuledwa khigyo; mayigo yatshavbo ya mafuni ma na patana ma wugela Jerusalema. 4Litshigu lolo, a ngu ganela Pfhumu Nungungulu, nyi na wusa pfilupfilu nyi thusa dzikavalu dzatshavbo, nyi handrugisa mapimo ya vakhileli va kone. Nyi na thendregedza maho yangu nyi khedza nyumba ya Judha nyi yi vhikela; nyi na gira dzikavalu dzatshavbo dza va nya mayigo dzi khala sikhumu. 5Khavbo avbo, vathangeli va Judha va na ganela khu monyoni gwawe, khavo: Tshivba ya vathu va Jerusalema yomo ga Pfhumu nya Tshivba Yatshavbo, Nungungulu wawe. 6Khu litshigu lolo, nyi na gira vathangeli va Judha va khala kha nga magala nya gudzure vbakari nya dzikhuni, ni mwenge vbakari nya dzinyandra; va na mbembisa, nyamudye ni nyambade, mayigo yatshavbo ma va randredego. Jerusalema a na wuya a manega ni vathu va vbanyago umo, bwelo khavbo a khala gambe wulangani gwaye.
7 Pfhumu Nungungulu a na vbanyisa guhegula mitshatsha ya Judha, kha nga matshiguni ya gale. Gasi wudhumo wa nyumbani ga Dhavhidhe ni wuzundzo wa vathu va Jerusalema wu si dandri guvbindra wuzundzo wa Judha. 8Khu litshigu lolo, Pfhumu Nungungulu a na vhikela vathu va vbanyago Jerusalema, khu litshigu lolo, oyu nya gusolege vbakari gwawe, a na fanana ni mufumeli Dhavhidhe, gambe nyumba ya Dhavhidhe yi na wonega kha nga Nungungulu, kha nga ngilozi ya Pfhumu Nungungulu yi thangidego mbeli gwawe.
Thumo nya guagise
9Khu litshigu lolo, nyi na mbembisa mayigo yatshavbo ma na wugelago Jerusalema. 10#Wona gambe: Joh 19:37; Gutu 1:7. Aholu nyumbani ga Dhavhidhe ni ga vavbanyi vatshavbo va Jerusalerma nyi na thela Liphuvbo nya wuwadi nilo nya milombelo; va na khedza wule va mu payidego; va na mu lila gukhwatshi va gu lila gyanana gya gimwegyo basi, va garadzega khu uye, gukhwatshi va gu garadzega khu gyanana nya matiwula 11Khu litshigu lolo, gu na pwala huwa nya yikhongolo Jerusalema, kha nga huwa ya Hadhadhi-Rimoni, kovani ga Megidho. 12#Wona gambe: Mat 24:20; Gutu 1:7.Litigo latshavbo li na lila, linyumba ni linyumba li na gira gyaye gililo:
Lihundzu la Dhavhidhe vama khu yawe phuvbo;
ni vanyamayi vakone navo khu yawe phuvbo;
linyumba la Natani, vama khu yawe phuvbo,
ni vanyamayi vakone navo khu yawe phuvbo.
13Lihundzu nya nyumba ya Levi, vama khu phuvbo,
ni vanyamayi vakone navo khu yawe phuvbo;
lihundzu la Simiyoni, khu phuvbo;
ni vagadzi vakone navo khu yawe phuvbo. 14Yatshavbo mambe mafumbo, lihundzu ni lihundzu khu phuvbo, ni vagadzi vakone khu yawe phuvbo.
Currently Selected:
Zakariya 12: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
