Zakariya 11
11
Tsayiso wa avo nyamba dzi laya
1Tula dzinyangwa dzago uwe litigo la Libhanoni,
gasi wu bele nilo wu vbisa misimbo yago nya misedhari.
2Lilani misimbo nya mipinyu,
kholu yi thegide misedhari,
va nya tshivba va thesidwe vbavbatshi;
lilani miguhu ya Bhasani,
kholu likhabi nya guthise lihagatidwe.
3Gu pwala huwa nya gililo gya vahavisi!
Kholu wudhumo wawe wu pfhungumudwe;
gu pwala gubhonga nya dzinghala,
kholu gu hafumudwe matshandza ya Joridhani.
Gipimaniso nya muhavisi nya wadi
(Ezekiyeli 34)
4 Pfhumu Nungungulu wangu, a ngu ganela kharati, khuye: “Havisa dzinvuta dzi yago gusongwatunu; 5vale va dzi rengago va gu dzi songa, aholu mwalo va tsayiswago khuye. Gasi vale va dzi rengisago va gu ganela, khavo: A na rungudzwe Pfhumu Nungungulu, kholu nyi khade gitetema! Ambari vahavisi vakone kha vapwi wusiwana khidzo. 6Khu guralo, Eni kha nyi na nga tsetselela gambe vathu va tigoni momu, a ngu ganela Pfhumu Nungungulu. Wonani nya gukhenu, nyi na ningela vathu, moyo ni moyo mandzani ga muthu kwawe ni mandzani ga mufumeli wawe; avo va na sasela litigo, aholu eni kha nyi na vbulugisa muthu mandzani gwawe.”
7Eni nyi khade muhavisi nya tshambi wu yiswago gusongwatunu, dzinvuta nya sisiwana nya tshambi; eni nyi di phara mapitso mavili: Limwedo nyi di li rana, kheni: “Wuhindzi” ilo nya wuvili kheni “Pwanano.” Nyi simama gu khala muhavisi nya tshambi. 8Khu ngima moyo basi nyi tutumiside vahavisi vararu, kholu hefemulo wangu wu di garade khu dzinvuta dzangu, idzo nidzo dzi di swihala khu eni. 9Khavbo avbo, eni nyi di, kheni: “Kha nyi na nga khala gambe muhavisi wanu. Eyi yi fago, yi nafe; eyi yi dzimelago, yi na dzimele! Gasi edzi dzi tshalago, dzi na hodzane khu gyawe.”
10Khavbo avbo, nyi di dzega lipitso langu li ranwago pwani “Wuhindzi” nyi yi fanya, gu yeyedza gukheni nyi kavide gidzumeledzwano nyi nga bani nyi giride ni vathu vatshavbo. 11Na gi tshudwe gidzumeledzwano litshigu lolo, sisiwana nya tshambi si nga bani si nyi yingisa, si di dziti gukhiso giyeyedzo gile mahungu ya Pfhumu Nungungulu.
12 # Wona gambe: Levh 27:25; Mat 27:9-10. Eni nyi di va embela, kheni: “Mwa gu wona gukhenu yomo fanelo, nyi livbeni tengo nya thumo wangu, aholu mwa gu wona na yiri mwalo fanelo, basi, digani.” Avo va di pima tengo nya thumo wangu, va nyi livba magumararu (30) singerengere nya parata.
13 # Wona gambe: Mat 27:9-10. Khavbo avbo, Pfhumu Nungungulu a di nyi embela, khuye: “Rumelani ga muwumbi tengo wowu nya wuzundzo nyi nga pimedwa khavo.” Nyi dzega singerengere nya magumararu nyi si rinya ndrani nya Nyumba ya Nungungulu.
14Khu hwane nya ugo, nyi di dzega yimbe ndronga, yi ranwago Pwanano, nyi yi fanya niyo, gasi gu vbedza wulongo vbakari ga Judha ni Israyeli.
Muhavisi nyambasi wadi
15 Pfhumu Nungungulu a di nyi embela, khuye: Dzega gambe sombo sa muhavisi nya gipumbu. 16Kholu nyi na rumela tigoni momu muhavisi a na gumbata thela kota khu gu sayisa dzinvuta dzi dwalago, mwendro gu landra edzi dzi dzimedego ni gu handza silondra edzi dzi bayisidwego, a ngamba khathala khu gu havisa edzi dzi vbanyago. Uye a nata hodza nyama nya edzi nya guene gwadi, a gu dzi dusa ni samba gambe!
17Libango ga muhavisi nya gipumbu,
a si sayisigo tshambi;
a na paywe libogo laye khu litshari,
li mu pole liso la nyamudye;
libogo laye latshavbo li na bange
ni liso laye la nyamudye li na khale gidzogo.
Currently Selected:
Zakariya 11: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
