Luka 4

Gulingwa ga Jesu

(Matewu 4:1-11; Marko 1:12-13)

1Jesu a di khuga khu Joridhani, na tade khu Liphuvbo nya Guage. Liphuvbo li di mu gimbidzisa a gu hongola giwulani, 2iyo a ngaya khalago magumana matshigu, a gu lingwa khu Sathane. Kha nga hodza gilo matshigu yoyo yatshavbo. Guhegisani a di pwa ndzala. 3Sathane a di mu embela, khuye: “Wa gu bani uri Mwamana wa Nungungulu, ruma giwindri gegi gi vbindrugedze gi khala guhodza.” 4#Wona gambe: Dhet 8:3. Jesu a di mu hakha, khuye: “Gu lovidwe, gu pwani: ‘Muthu kha vbanyi khu guhodza basi, aholu khu magana yatshavbo ya Nungungulu.’ ” 5Sathane a di mu dzega aya naye gigomoni nya gulaphe ngudzu, aya mu yeyedza khu gikhatinyana, mifumo yatshavbo nya mafu, 6a mu embela, khuye: “Nyi na gu ninga wufumu watshavbo wowu ni wudhumo wakone, kholu nyi ningidwe satshavbo, eni neni nyi ngu dzi kodza gu ningela ga uye nyi mu nago. 7Wa gu khidzima u nyi khozela satshavbo si na bani siri sago.” 8#Wona gambe: Dhet 6:13. Jesu a di mu hakha, khuye: “Duga, Sathane, gu lovidwe, pwani: ‘U na khozela Pfhumu Nungungulu wago. Khuye basi u na gu mu phaselago.’ ” 9Khavbo avbo, Sathane adiya naye Jerusalema, aya gwela naye langwetunu nya Nyumba ya Nungungulu. A Mu embela, khuye: “Wa gu bani uri Mwamana wa Nungungulu, nga dzi ditsha khavba, u thega vbavbatshi, 10#Wona gambe: Dzind 91:11. kholu gu lovidwe, pwani: ‘Nungungulu a na rumela dzingilozi dzaye, gasi dzi gu hakhe, 11#Wona gambe: Dzind 91:12. dzi gu khusedza khu mandza, gasi u si dzi bayisi khu siwindri.’ ” 12Jesu a di mu hakha, khuye: “Gu lovidwe, pwani: ‘U nga lingi Pfhumu Nungungulu wago.’ ” 13Nari mwalo mambe mano nya gu mu senge khayo, Sathane a di mu diga a gu hongola, aya lindredza gimbe gikhati.

Thumo wa Jesu tigoni ga Galileya

(Matewu 4:12-17; Marko 1:14-15)

14Na kutsidwe khu tshivba nya Liphuvbo, Jesu a di wuya Galileya. Ndruma yaye yi di pwala tigoni mule gwatshavbo. 15A di gu hevbudza dzinyumbani nya nombelo; vatshavbo va di gu mu zundza.

Jesu kha hakhwi Nazareta

(Matewu 13:53-58; Marko 6:1-6)

16A dita Nazareta, avbo a nga dandrelago avbo. Kha nga giolovedzo gyaye, a di bela nyumbani nya nombelo khu litshigu nya Sabhadho. A di khuga a ema, gasi gu hevbula libhuku. 17Va di mu ninga libhuku la muprofeti Isaya. A di li thawuludza, a kotsana navbo gu lovidwego, pwani:

18“Liphuvbo la Pfhumu li nyi tshigede,

kholu li nyi phasede gasi guya hevbudza sisiwana Mahungu nya Yadi;

li nyi rumede guya tivisa dzikhumbi gutshulega gwawe,

guya tivisa sikhumu guwoniswa gwawe,

ni ga vasaniseki gutshulega gwawe;

19 # Wona gambe: Isa 61:1-2. ni gu tivisa mwaga nya wuhigo wa Pfhumu.”

20Khavbo avbo, a di peta libhuku, a li ningela ga githumi gya nyumbani nya nombelo, a gu khala vbavbatshi. Vathu vatshavbo va nga bani varomo nyumbani nya nombelo va di khusa maho va khedza uye. 21Khavbo avbo, a di phela gu va embela, khuye: “Ma tadzisegide muhuno magana yaya mu ngari gu ma pwago.” 22Vatshavbo va di mu fakazela, gumogo ni gu liwuga khu magana nya gutale khu wuhigo, ma nga bani ma gu duga khu kanani gwaye. Va di wudzisana khu gyawe, khavo: “Ina khandruye oyu mwamana wa Josefe, gani?”

23Gasi uye a di va embela, khuye: “Khu lisine mu na ganelani khu sipinga, na mu gu thula eni, khenu: ‘Nyanga, nga dzi hawulugisa wabune; gumogo ni gu nyi embelani, khenu satshavbo hi si pwidego gupwani u si giride Kafarinawume, nga si gira gambe tigoni momu gwago!’ ” 24#Wona gambe: Joh 4:44. A di engedza gambe, khuye: “Khu lisine nyi ngu mi embelani nya gukheni mwalo muprofeti a hakhwago gwadi tigoni gwawe.

25 # 1 Dzipf 17:1. “Aholu nyi ngu mi embelani gambe, khu lisine, kheni: Matshiguni ya Eliya dzi diromo dzinoni nya dzingi tigoni ga Israyeli, gikhati yi nga segegago ndzadzi myaga miraru ni livbandre na moyo migima, yi manega, ndzala nya yikhongolo tigoni gwatshavbo. 26#1 Dzipf 17:8-16. Aholu yi mwalo noni yi nga rumedwago Eliya, vbavbandze ga noni ya Sarepita ga Sidhoni. 27Va diromo gambe va nya sokono tigoni ga Israyeli matshiguni ya muprofeti Elizewu. Aholu mwalo a nga hawulugiswago vbavbandze ga Nahamani wa Siriya.” 2 Dzipf 5:1-14.

28Na va pwide magana yaya, vatshavbo va nga bani varomo nyumbani nya nombelo va di swireka ngudzu. 29Na va khugide khu vbale, va di mu tutumisa dhoropani mule, va mu dzega va gu gwela naye mahegiso nya gigomo va nga bani va vbahede avbo lidhoropa, gasi guya mu rindrividza khavbo a thega vbavbatshi. 30Aholu Jesu a di vbindra khu vbakari gwawe a gu hongola.

Jesu tigoni ga Kafarinawume

(Marko 1:21-28)

31Khu vbale, Jesu a di relela a gu hongola Kafarinawume, dhoropani ga Galileya, iyo a ngaya simama guhevbudza vathu khu dzisabhadho. 32#Wona gambe: Mat 7:28-29. Avo va di liwuga khu sihevbudzo saye, kholu magana yaye ma diri ni tshivba. 33Nyumbani nya nombelo a di romo muthu a nga bani ari ni liphuvbo nya guvivbe li nga khusedzago lito, li laledza, khilo: 34“Ginani hi nga gu ghohela, Jesu wa Nazareta? Wa gu tela guta hi mbembisa, gani? Eni nyi ngu guti gwadi gukheni: Khuwe Gihathwa gya Nungungulu.” 35Jesu a di li kawuka, khuye: “Degula, duga ga muthu yoyo.” Gasi ilo, na li mu theside vbavbatshi khu tshivba ni tshivba, mahoni ya vathu vatshavbo, li di duga li gu hongola, nyamba mu gira gilo.

36Vatshavbo va di liwuga, va gu wudzisana khu gyawe, khavo: “Sa gutshamusa ginani esi? Nya gu muthu a dzi kodza gu ruma maphuvbo nya guvivbe ayo, ma gu yingela!” 37Ndruma yaye yi di pwala tigoni mule gwatshavbo.

Jesu a ngu hawulugisa ngogadzi wa Pedro ni vambe vadwali

(Matewu 8:14-17; Marko 1:29-34)

38Jesu a di duga khu nyumbani nya nombelo a gu hongola ndrangani ga Simoni iyo a ngaya manago ngogadzi wa Simoni nari ni feveri nya yikhongolo. Va di mu lomba gu a mu khedzise. 39Na nogide a mu khedzisa, a di ruma feveri gu yi mu diga. Yi di mu diga kamwe. Na yi mu digide, a di dzegela gu khuga a va sayisa. 40Na li hwide, vatshavbo avo va nga bani vari ni vadwali nya dzingumbe nya guhambanelane va di va resa gwaye. A di handzega mandza ga moyo ni moyo wawe, a va hawulugisa. 41Ga vangi vakone ma di duga maphuvbo nya guvivbe, na ma gulumela, khayo: “Uwe u Mwamana wa Nungungulu!” Aholu uye a di ma kawuka ni gu ma degudza, kholu ma di gu muti nya gukhayo khuye Kristo.

Jesu a ngu gimbila a hevbudza

(Marko 1:35-39)

42Na gugide, a di duga a gu hongola giwulani. Vathu vatshavbo va di mu landra. Na va mu mane, va diya mu lomba, gasi a si va digi a hongola. 43Aholu uye a di va embela, khuye: “Nyi na ni fanelo nya gutivise gambe ga mambe mayigo Mahungu nya Yadi nya Mufumo wa Nungungulu, kholu khiso nyi nga rumedwago iso.” 44Khidzo kharati a nga bani a gu hevbudza khidzo dzinyumbani nya nombelo dza Judheya.

Currently Selected:

Luka 4: BGE2014

Highlight

Copy