Luka 5

Jesu a ngu ruma gu thesa dzikhoga

(Matewu 4:18-22; Marko 1:16-20)

1Kha nga olu Jesu, a nga bani na romo siwoni nya yiphwa ya Jenezare, vbakari nya vathu va nga bani va gu mu gundra, gasi gu pwa mahungu ya Nungungulu, bambe nya litsiva la Genezareta 2a di wona dzingalava dzimbili dzi nga bani dzi tshegemide siwoni, vagogi vakone na va tshigide vaya andza dzikhoga. 3#Wona gambe: Mat 13:1-2; Mark 3:9-10; 4:1. A di bela ngalavani nyo kari, yi nga bani yi gu lumba Simoni. Khavbo avbo, a di mu ruma gu yi hidzimisa matini. Uye, khu ngalavani, a di hevbudza gidzemo.

4Na vbedzide gu ganela, a di embela Simoni, khuye: “Hidzimisani ngalava nondrwani, mu thesa dzikhoga dzanu.” 5Simoni a di hakha, khuye: “Muhevbudzi, hi gogide wutshigu watshavbo, kha ha mana gilo; aholu kha nga ulo u rumago, nyi na thesa dzikhoga.” 6Va di dzi thesa, va goga dzindzandzi nya dzingi kamwe ngudzu, nya gu ni dzikhoga dzi di hadza gu pferuga. 7Va di khweneta vangana vawe va nga bani varomo ga yimbe ngalava, gasi guta va phasa. Va dita tadza navo ngalava yawe. Dza dzimbili dzi di vbweta gu rika khu gutala. 8Na wonide esi, Simoni Pedro a di dzi thesa migondroni ga Jesu, khuye: “Leya uya hwindzo gwangu, Pfhumu, kholu nyi gighohi!”

9Simoni ni vatshavbo avo a nga bani ari navo va di tala khu guliwuga, khu kotani nya dzindzandzi nya dzingi va nga molago; 10ni vangana vaye, Jakobe ni Johane, sanana sa Zebhedhewu, va di liwuga navo. Khavbo avbo, Jesu a di embela Simoni, khuye: “U nga thavi; gukhugela muhuno u na bani uri mugogi nya vathu.” 11Va di dusa dzingalava vbavbandze, va diga satshavbo, va mu landra.

Guhawulugiswa nya muthu nya sokono

(Matewu 8:1-4; Marko 1:40-45)

12Avbo Jesu a nga bani na romo dhoropani nya gukari a dita muthu moyo a nga bani a gu dwala khu sokono. Uye, na wonide Jesu, a di dzi thesa migondroni gwaye, a mu lomba, khuye: “Pfhumu, wa gu dzina, nyi agise.” 13Jesu a di mu handzega mandza, na gukhuye: “Nyi ngu dzina, aga” Khavbo avbo, sokono yi di dzegela gu duga gwaye. 14#Wona gambe: Levh 14:1-32. A di mu laya gu a si embeli muthu, bwelo khavbo a mu embela, khuye: “Indra dzi yeyedza ga muphasi, gasi uye a ningele, khu gu agiswa gwago, iso si rumwago khu Mosi, gasi gu khala nari wufakazi vbakari gwawe.” 15Ndruma yaye yi di phalalega ni litigo, vathu nya vangi va di ya mu randrela, gasi gupwa sihevbudzo saye ni gu hawulugiswa madwali yawe. 16Aholu uye a di thava a gu hongola giwulani, aya gira nombelo.

Guhawulugiswa nya gilima

(Matewu 9:1-8; Marko 2:1-12)

17Tshigu mwedo, Jesu, a di gu hevbudza, vbakari nya vathu va nga bani va mu yingisa. Va diromo navo vafarisi ni vahevbudzi nya Nayo va nga tago khu Galileya, khu Judheya ni Jerusalema. A di gu hawulugisa madwali khu tshivba ya Pfhumu. 18Va di vboha vama va nga bani va rwade gilima khu lithatho. Va di vbweta ndzila nya gu gi vbohise ga Jesu. 19Na va yi hamugide khu kotani nya talo nya vathu, va di lita vbatshani nya nyumba, a nga bani a romo Jesu, vaya tshula vbamwambatunu. Na va giride isoso, va di reledza lithatho nya gilima, va li tshisa vbakari ni vbakari, mbeli ga Jesu. 20Na wonide gukhodwa gwawe, Jesu a di ganela, khuye: “Amasawu, sighoho sago si tsetseledwe.”

21Vahevbudzi nya Nayo ni vaphasi nya mhamba va di phela gu ngurangura, khavo: “Khu mani oyu a hembululago Nungungulu? Khu mani a dzi kodzago gu tsetselela sighoho vbavbandze ga Nungungulu basi?” 22Aholu Jesu, na tugude maalakanyo yawe, a di khusedza lito a gu va wudzisa, khuye: “Mahingigedzo muni mu gu nawo myonyoni gwanu? 23Khu gevbini gi vbevbugidego gu ganela: Gukheni sighoho sago si tsetseledwe, ni gukheni khuga u gimbila? 24Gasi mi dzitini nya gukhenu Mwamana wa Muthu a na ni tshivba nya gutsetselele sighoho mafuni momu,” a di embela gilima, khuye: “Nyi ngu gu ruma khuga u eme, dzega lithatho lago u hongola gaya gwago.” 25Khavbo avbo, gilima gi di dzegela gu khuga gi ema mahoni ya vathu vatshavbo, gi dzega lithatho laye gi gu hongola gaya, na gi gu dhumisa Nungungulu. 26Vatshavbo va di liwuga ngudzu ni gu tala khu githawo, gumogo ni gu dhumisa Nungungulu, khavo: “Muhuno hi wonide siliwugiso.”

Guranwa ga Levhi

(Matewu 9:9-13; Marko 2:13-17)

27Khavbo avbo, Jesu a di duga. A diya mana muhengisi nya khupho nya gupwani khu Levhi, na khade vbagikhalotunu gwaye nya thumo, a di mu embela, khuye: “Nyi landre.” 28A di diga satshavbo, a khuga a mu landra. 29Khavbo avbo, Levhi a di rana Jesu ndrangani gwaye, a gu mu girela buzo nya khongolo. Vbamezatunu va diromo vambe vahengisi nya khupho nya vangi ni vambe vathu. 30Vafarisi ni vahevbudzi nya Nayo va di ngurangura, va gu wudzisa vapizane va Jesu, khavo: “Khu ginani mu hodzago ni gu sela gumogo ni vakhuphisi ni sighohi?” 31Jesu a di hakha, khuye: “Khandri vale va gu ni womi va vbwetago nyanga, aholu, vadwali. 32Eni kha nya tela guta rana avo va nya gululama aholu, nyi tede guta rana sighohi gasi si dzi laye si wuya ndzilani nya lisine.”

Guhala

(Matewu 9:14-17; Marko 2:18-22)

33Khavbo avbo, va di mu embela, khavo: “Vapizane va Johane ni vapizane va vafarisi va gu tala gu hala gikhati nya gingi, ni gu gira milombelo, gasi avo vago va gu hodza ni gu sela!” 34Jesu a di va hakha, khuye: “Ina gu ngu kodzega vabangaladzi va mwane va hala mwane na ngari navo, gani? 35Ma nguta matshigu va na gu dzegedwago mwane. Gikhati gyogyo va na hala!”

36A di va embela gambe gipimaniso gegi: “Mwalo a pferulago mwendra nya muphya gasi gu gira giziva vbamwendratunu wa gale. Wa gu gira kharato, u na luza mwendra nya muphya, gambe giziva gyakone kha gi na yelana ni mwendra wa gale. 37Kha nga gambe, mwalo a thelago wadwa nya givhayi malowoni ya gale. Wa gu gira kharato, wadwa nya givhayi wu na pola malowo. Gu luzega, kharati, wadwa ni malowo. 38Aholu, wadwa nya givhayi gu vbwetega wu thedwa malowoni nya maphya. 39Mwalo muthu nya gu na sede wadwa nya guvile gwadi a wuya a lomba wadwa nya givhayi, kholu wari, khuye: ‘Uwo nya guvile gwadi khuwo wu gu wadi.’ ”

Currently Selected:

Luka 5: BGE2014

Highlight

Copy