Johane 12
12
Jesu a ngu todzwa mafura khu Mariya
(Matewu 26:6-13; Marko 14:3-9)
1Na gu nga tshade livbandre na limwedo matshigu, gasi guhodzwa Phasika, Jesu a diya Bhetaniya, iyo a nga bani a gu vbanyela iyo Lazaro, wule a nga mu wusago khu gufani. 2Va di mu girela guhodza. Lazaro a di romo nuye vbamezatunu ni Jesu, gasi Marta a diri uye muphameli wakone. 3Khavbo avbo, Mariya, a di dzega gigasi nya mafura nya gunungele ngudzu, ayo ma nga bani ma gu rengwa khu dzitsapawu nya dzingi, a todza migondro ya Jesu, bwelo khavbo a yi bavbulela khu ndzudzu waye; nyumbani gwatshavbo gu di nungela mafura yale. 4Judha Sikarioti, moyo nya vapizane vaye, wule a nga bani a gu vbweta gu mu ningela, a di khuye: 5“Khu ginani ma ngamba rengiswa mafura yaya khu mazana mararu nya dzitsapawu nya parata, gasi guphasa sisiwana?” 6Khandri a di ganela kharati khu gu thela kota khu sisiwana, aholu, khu kotani nya wuvafa waye, kholu, a diri uye muphari nya gikhwama, a di gutala guba iso si nga bani si gu thedwa umo.
7Jesu a di khuye: “Mu digeni. Uye a ma vegedzide gasi gu nyi tola litshigu nya gudzingwe gwangu. 8#Wona gambe: Dhet 15:11. Sisiwana mu na bani muri naso kala gupindruga; gasi eni kha nyi na khala nanu gikhati gyatshavbo.”
9Vajudha nya vangi, na va dzitide gukhavo Jesu womo vbale, va di mu yela, nasiri khu kotani yaye basi, aholu ni guya wona Lazaro, wule a nga mu wusago khu gufani. 10Vakhongolo nya vaphasi nya mhamba va di hunga gikungo nya gusonge nuye Lazaro. 11Kholu, khu kotani yaye, Vajudha nya vangi va di gu pambuga ga vahevbudzi vawe, va gu khodwa ga Jesu.
Jesu a ngu bela Jerusalema
(Matewu 21:1-11; Marko 11:1-11; Luka 19:28-40)
12Gandra ni dzimindru, vatshavbo va nga bani va dzude buzotunu, na va pwide nya gupwani Jesu a ngu vbweta gu vboha Jerusalema, 13#Wona gambe: Dzind 118:25-26. va di dzega matamo nya migindru, va mu khinga, na va gu emba, khu lito limwedo, khavo:
“Hosana!
A na rungudzwe uye atago khu lina la Pfhumu!
A na rungudzwe Pfhumu ya na Israyeli!”
14Jesu, na mane giburwana, a di gi khilela, kha nga guganela nya Milowo yi gu, khiyo:
15 # Wona gambe: Zak 9:9. “U nga thavi, nyamahegyane wa Siyoni.
Khu mu woni mufumeli wago;
wule atago na khilede giburwana!”
16Guhegulani, vapizane vaye kha va nga wuti tshamuselo nya satshavbo sesi, aholu gikhati Jesu a nga dhumiswago, va di dundruga gukhavo esi si lovidwe na si gu mu lumba, gumogo ni gu wona gukhavo khiso si nga tadzisega gwaye.
17Gidzemo gi nga mu wonago na gu rana Lazaro thowoni, gumogo ni gu mu wusa khu gufani, gi di ya tivisa mahungu yoyo. 18Gidzemo nya vathu nya vangi gi di mu khinga, kotani gi ngapwago gupwani khuye a nga girago giliwugiso gile. 19Vafarisi va di embeledzelana, khavo: “Mu ngu wonani nya gukhenu gimwalo gilo nya gugire! Vathu vatshavbo va gu landra uye.”
Vagreki va guvbweta gu wona Jesu
20Vbakari nya vale va ngaya Jerusalema gasi guya khozela litshigu lile nya buzo, va diromo navo Vagreki. 21Va diya ga Filipi, givelegwa gya Bhetisayidha gwa Galileya, vaya mu lomba, khavo: “Hi di guvbweta gu wona Jesu.”
22Filipi a diya embela Andreya; khavbo avbo, Andreya ni Filipi va diya tivisa Jesu. 23Uye a di va hakha, khuye: “Gi vbohide gikhati nya gudhumiswe Mwamana wa Muthu. 24Khu lisine, nyi ngu mi embelani, kheni: Mbewu nya tirigu ya gu thega mafuni yi sifi, yi na khala yonga basi; aholu ya gufa, yi na ninga mihandro nya yingi. 25#Wona gambe: Mat 10:39; 16:25; Mark 8:35; Luk 9:24; 17:33. Uye a dzi garadzago ngudzu khu gu sayisa womi waye, a na dzimeledwa khuwo; aholu, uye a nyenyago womi waye a ngu wu vegedza, gasi guya wu mana guvbanyani nya gupindruge. 26Uye a vbwetago gu nyi thumela, a na nyi landre; ni avbo nyi na gu manegago, gi na bani giromo nigyo githumi gyangu. Uye a na nyi thumelago, a na rungudzwa khu Babe wangu.
Jesu a ngu ganela khu mafelo yaye
27“Olu hefemulo wangu womo gutshanisekani. Nyi na kheni ginani? Baba, nyi vbulugise ga gikhati gegi nya sitshaniso? Olu a gu iso nyi nga si telago, ke! 28Baba, dhumisa lina lago!” Khavbo avbo, li dita lito khu Ndzadzini, khilo: “Gale na nyi li dhumiside, gambe nyi nga na gu li dhumisa.”
29Gidzemo gi nga bani giromo vbale, na gi pwide lito leli, gi di, khigyo: “Ndzadzi yi dzumago.” Vambe va di khavo: “Girumwa gya Nungungulu gi nga ganelago naye.”
30Jesu a di khuye: “Lito leli kha la pwala khu kotani yangu, aholu khu kotani yanu. 31Olu gi vbohide gikhati nya gulamudwe litigo leli; ni gututumiswa mufumeli waye. 32Gasi eni, gikhati nyi na khusedzwago vbatshani, nyi na ndrindra vathu vatshavbo vata gwangu.” 33A di ganela esi na guvbweta gu yeyedza mafelo yaye.
34 # Wona gambe: Dzind 110:4; Isa 9:7; Ezek 37:25; Dhan 7:14. Gidzemo gi di mu hakha, khigyo: “Nayo wu ngu hi hevbudza nya gukhuwo Kristo a na vbanya kala gupindruga. Khu ginani u gukhuwe Mwamana wa Muthu a na ni fanelo nya gu khusedzwe? Khu mani Mwamana yoyo wa Muthu?”
35Khavbo avbo, Jesu a di va embela, khuye: “Gikhati gegi mu ngari ni guwonegela; gimbilani na mu ngari ni guwonegela gasi mu si manwi khu gidema. Uye a gimbilago gidemani kha guti umo a yago. 36Na mu ngari ni guwonegela, khodwani guwonegelani, gasi mufela gu khala sanana nya guwonegele.” Jesu, na ganede esi, a di khuga, a gu mwalalega vbakari gwawe.
Gumba khodwa nya Vajudha
37Ambari ulo a nga gira siliwugiso nya singi mahoni gwawe, gima kha va khodwa gwaye, 38#Wona gambe: Isa 53:1. gasi gu tadzisega magana ya muprofeti Isaya, nya gukhayo:
“Pfhumu, khu mani a khodwago khu magana yathu?
Tshivba yaye Pfhumu a yi wonegiside ga mani?”
39Iso si nga va gira va si khodwi, khu magana a nga ganela gambe Isaya, khuye:
40 # Wona gambe: Isa 6:10. “A di va sega maho,
a gu bangisa myonyo yawe,
gasi va si woni khu maho,
ni gumba pima khu myonyo yawe,
gufela gu va si vbindrugedzi mavbanyelo,
nyi va vbanyisa.”
41Isaya ganede esi kholu a di tuledwe gu wona gidhumo gya Jesu. 42Ambari ni vathangeli nya Vajudha va di gu khodwa ga Jesu; aholu, va di gira khu gisihaledza, khu hwanga nya Vafarisi, gasi va si tutumiswi nyumbani nya nombelo. 43Kholu va di gola ngudzu gu dhumiswa khu vathu guvbindra gu dhumiswa khu Nungungulu.
Uye a khodwago ga Jesu a ngu khodwa ga Nungungulu Babe
44Jesu a di khusedza lito, khuye: “Uye a khodwago gwangu, khandri gwangu khodwago, a ngu khodwa ga wule a nyi rumedego. 45Ni wevbini a nyi wonago, a ngu wona uye a nga nyi rumelago. 46Eni nyi dzude tigoni kha nga wenengedzo gasi muthu watshavbo a khodwago gwangu a si khali gidemani. 47Uye apwago magana yangu, a si ma vegisi, khandreni nyi na mu lamulago, kholu kha nya tela guta lamula litigo, aholu guta li vbanyisa. 48Uye a nyi dangago ni gumba hakha magana yangu, a na ni mulamuli waye. Magana nyi hevbudzidego khayo ma na mu lamulago litshigu nya guhegise. 49Kholu esi nyi nga ganela khandri nyi di si khugela. Babe a nga nyi rumelago khuye a nga nyi embela iso si vbwetegago gu ganela ni guhevbudza. 50Eni nyi ngu dziti gukheni nayo waye guvbanya nya gupindruge. Khu kharato, esi nyi ganelago, nya gu landrisa magana ya Babe wangu.”
Currently Selected:
Johane 12: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
