Genesi 19

Loti a ngu hakha dzingilozi dzimbili gaya gwaye

1Gupfolani nya lidambo, gikhati dzingilozi dza dzimbili dzi nga vbohago dhoropani gwa Sodhoma, Loti a di khade nyangwani nya lidhoropa. Na wone dzingilozi, Loti a di khuga a dzi khinga aya khidzima a gu tsitsa khovbe vbavbatshi. 2A di ganela, khuye: “Nyi ngu mi lombani dzipfhumu dzangu! Belani nyumbani ga githumi gyanu, nyi na mu handza mawundru gasi mu hefemule wutshigu wowu; mindru mu na vindrugela gu bela ndzilani gwanu.” Aholu avo va di hakha, khavo: “Ahihi. Ethu ha gu vbweta gu khala vbavbandze.”

3Aholu Loti a di va gurumedza kala avo va dzumela gu bela nyumbani gwaye. A di va dongisela guhodza, a va girela sibaba nyambana mela, va hodza.

4Na va si gu hongoli va ya lala, nyumba yi di randredwa khu vama va dhoropani, vathu va Sodhoma, gukhugela madzaha kala sikhosane, vathu vatshavbo nyamba tshala ni moyo. 5Va di rana Loti va mu wudzisa, khavo: “Vomo evbini vama va dzudego ndrangani gwago wutshigu wowu? Va rese eno hita va lala.”

6Loti a di duga vbavbandze a gu sega lidimba, hwane gwaye, 7a va embela, khuye: “Nyi ngu mi lombani wuhindzi wanu, vandruye, mu nga girini guvivba gogo! 8Upwani: Nyi na ni sanana sivili nya sagadzyana si ngarigo makendzi, nyi na mi ninga avo mu gira guhaladza gwanu, aholu mu nga girini guvivba ga vama vava kholu va hakhidwe ndrangani gwangu.”

9Aholu avo va di mu hakha, khavo: “Ndreya avbovbo! Uwe u dzude kha nga muwuyi tigoni momu, olu wa gu vbweta gu dzi gira mulamuli avbo gwathu. Wa gu vbweta kharato, hi na gira gwago guvivba nya gukhongolo guvbindra avbo gwawe!” Va di reda Loti va hidzimela vbalidimbatunu gasi gu li ghwawula. 10Aholu vama va di thawuludza libogo va gu ndrindra Loti va mu bedza nyumbani va sega lidimba. 11Vathu va nga bani vari vbavbandze va di khala sikhumu, vakhongolo ni ava nya vadugwane, va si woni ndzila nya gu bele khiyo.

Loti a ngu vbuluga gumbembiswa

12Vama va vavili va di wudzisa Loti, khavo: “U na ni mumbe muthu nya nongo tigoni momu, gani? Vamwane vago, sanana sago esi nya vama nesi nya sagadzyana, valongo vago vatshavbo va vbanyago dhoropani momu, va duse ga wulanga wowu. 13Kholu ha gu vbweta gupfhungumula wulanga wowu, kholu huwa yi vbohidego ga Pfhumu Nungungulu yikhongolo ngudzu khu kotani gwawe, Pfhumu Nungungulu a hi rumede guta va mbembisa.”

14Loti a di ya ganela ni vamwane vaye va nga bani va vbweta gu dzega sanana saye, khuye: “Khugani mu duga ga wulanga wowu, kholu Pfhumu Nungungulu a ngu vbweta gu mbembisa lidhoropa.” Aholu, avo va di mu wona kha nga muthu nya sithenga mbeli gwawe.

15Na wu nga gu khuga Wuronga, dzingilozi dzi di gurumedza Loti, khidzo: “Khuga! Vbiredza gu dzega mwangadzi wago ni sanana sago si guromo avba, gasi u si mbembi gutsayiswani nya lidhoropa.”

16 # Wona gambe: 2 Ped 2:7. Kha nga a nga bani a gu kanakana, dzingilozi dzi di mu phara khu mandza, uye gumogo ni mwangadzi waye ni sanana saye sa sivili nya sagadzyana, khu kotani nya gisiro Pfhumu Nungungulu a gu nagyo khu uye. Dzi di mu dusa, dzi ya mu vega vbavbandze nya lidhoropa. 17Na dzi gu mu dusa vbavbandze, dzi di mu embela, khidzo: “Vbanyisa womi wago! U nga khedzisi hwane gwago, gambe u nga emi wulanga panini, thavela gigomoni gasi u si mbembi!”

18Loti a di hakha, khuye: “Ahihi, Pfhumu yangu, gu nga giregi kharato! 19Nga wona githumi gyago gi manide wuhigo mahoni gwago. U nonedzide wuhindzi nya wukhongolo ga eni githumi gyago, khu gu vbanyisa womi wangu. Aholu kha nyi dzi kodzi gu thavela gigomoni nyi ya vbanya iyo, kholu nyi nga manwa khu libango leli ndzilani nyifa nyi si gu vbohi. 20Nyi ngu wona lidhoropa lile vbafuvbi, nyi ngu dzi kodza gu thavela umo; gambe li dugwana. Nyi dzumedzise nyi thavela umo, (Ina khandri lidugwana gani)? Nyi naya vbanya umo!”

21A di hakha, khuye: “Nyi na gu girela gambe wuhindzi wowo; kha nyi na pfhungumula lidhoropa u li thulago. 22Olu, vbiredza gu thavela iyo, kholu kha nyi dzi kodzi gu gira gilo uwe nu si gu vbohi iyoyo.” Khidzo kharato lidhoropa lolo li nga ranwago khu lina nya gupwani Zowari.

Gupfhungumudwa ga Sodhoma ni Ghomora

23Gukhugani nya lidambo, Loti a di gu bela dhoropani ga Zowari. 24#Wona gambe: Mat 10:15; 11:23-24; Luk 10:12; 17:29; 2 Ped 2:6; Judh 7. Khavbo avbo, Pfhumu Nungungulu a di wisa madhoropani ga Sodhoma ni Ghomora, ndzadzi nya sulufa ni nilo nya gute khu ga Nungungulu. 25A di pfhungumula madhoropa yale, ni lipani latshavbo, gumogo ni vathu vatshavbo va dhoropani ni satshavbo si velegwago mafuni. 26#Wona gambe: Luk 17:32. Aholu mwangadzi wa Loti a di khedzisa hwane, a vbindrugedza a khala githombe nya munyu.

27Ni dzimindru, Abrahama a di wuga a hongola wulanga wule a nga bani a emide mbeli ga Pfhumu Nungungulu. 28A di khedzisa a wona Sodhoma, Ghomora ni panini gwatshavbo, a wona wutshi na wu gutuviga tigoni kha nga wutshi nya nilo nya wukhongolo.

29Avbo Nungungulu a nga bani a gu khungumula madhoropa ya panini, a di alakanya Abrahama, a gu vbulugisa Loti gumbemba, madhoropa a nga bani a gu vbanya umo ma khungumudwa.

Gutumbuluga ga Vamowabhi ni Vaamoni

30Loti a di khuga dhoropani ga Zowari, aya vbanya sigomoni ni sanana saye sa sivili nya sagadzyana, kholu a di si tiyeli guvbanya dhoropani ga Zowari. A di ya vbanya phalani nya giwindri gumogo ni sanana saye sa sivili.

31Khavbo avbo, nyamahegyane nya koma a di embela nandra waye, khuye: “Babe wathu gumbide, ni gu gambe mwalo mwama tigoni momu nya gute hi ta patana naye kha nga tumbunugo nya litigo latshavbo. 32Delu, hongole hi sedza wadwa babe a leva ethu hi lala naye; hi na wusa kharato livelego la babe wathu.”

33Avo va di levisa babe wawe, ni wutshigu wowo, nyamahegyane nya koma, a di ta lala ni babe waye. Uye gima kha nga pima gilo gikhati a nga lalago ni gikhati a wugidego khigyo.

34Khu mindru gakone, koma a di embela nandra waye, khuye: “Vbanova ni wutshigu eni nyi lade ni babe; hongole hi mu levise gambe gasi u hongole nuwe u ya lala naye wutshigu wa muhuno; khu magirelo yaya hi na wusa livelego la babe wathu.” 35Va di sedza wadwa babe wawe ni wutshigu wowo gambe, nyamahegyane nya nandra a di ya lala ni babe waye a ngamba pima gilo gikhati a nga ta lala ni gikhati a wugidego.

36Vanyamahegyane va vavili va Loti va di khuriswa dzimimba khu babe wawe. 37Oyu nya koma a di velega gyanana nya gikhwathana a nga gi riyago lina nya gupwani khu Mowabhi, babe wa na Mowabhi #19:37 Mowabhi gu tshamusela gupwani: “Dugide khu ga nyehe waye”, mwendro pwani gyanana gya babe wangu. kala na muhuno. 38Oyu nya nandra wakone a di velega nuye gyanana nya gikhwathana a gi riya lina la Bheni-Ami;#19:38 Bheni-Ami (Ben'Ammi) gu tshamusela gupwani: Gyanana gya melegi wangu, mwendro pwani, gyanana gya nongo wangu. babe wa va na Bheni-Amoni, kala na muhuno.

Currently Selected:

Genesi 19: BGE2014

Highlight

Copy