Genesi 20
20
Abrahama ni Sara va ngu ya vbanya tigoni ga Gerari
(Genesi 26:1-11)
1Abrahama a di khuga vbale a gu hongola tigoni gwa Negebhi, aya vbaha wulanga nya gu eno a wona lidhoropa la Kadesi, eno na ga wona lidhoropa la Suri. A di ya vbanya tigoni gwa Gerari. 2#Wona gambe: Gen 12:13; 26:7. Abrahama a di rana mwangadzi waye, khuye: “I ndriyangu.” Abhimeleki, mufumeli wa Gerari a di rumela guya dzega Sara.
3Aholu Nungungulu a di embela Abhimeleki khu ndroroni ni wutshigu, khuye: “U nafa khu kotani nya nyamayi u dzegidego, kholu ngadzavane.”
4Abhimeleki a di si gu hengeli lidawu ni Sara, a di ganela, khuye: “Ama Pfhumu yangu, ina u na songa vathu nyambana nandru, gani? 5Gasi khandruye Abrahama a nyi embedego gukhuye: I ndriyangu, gani? Ambari uye mune kha tiyisa nuye gukhuye i ndriyaye, gani? Eni nyi giride esi khu mapimo nya yadi na nyi agide monyoni gwangu.”
6Nungungulu a di mu hakha khu ndroroni, khuye: “Aneni nyi ngu dziti gukheni u giride esi nu agide monyoni gwago, kheni nyi nga gu vbulugisa gu nyi ghohela, nyi gu himbedzela gu mu kuha. 7Gasi olu bweledza nyamayi ga mwama waye kholu uye muprofeti#20:7 Muprofeti gu tshamusela gupwani “muthu wa Nungungulu”, a na ni pwanano ni Nungungulu; esi a lombago ga Nungungulu a ngu si mana. a na gu lombelela gasi u vbanya, aholu wa gumba mu bweledza dziti nya gukhuwe khu lisine furi u nafa, uwe gumogo ni vathu vago vatshavbo.”
8Abhimeleki a di wuga ni dzimindru ngudzu a ramba madhota yaye yatshavbo, a ma embeledzela satshavbo, avo va di tala khu hwanga nya wukhongolo ngudzu. 9Hwane nya ugo, Abhimeleki a di ranisa Abrahama a mu embela, khuye: “Ginani u giridego gwathu? Gihoso muni hi giridego gwago, gu kala u rana nandru nya wukhongolo ngudzu ga eni ni litigo langu latshavbo? Uwe u nyi girede esi si si yeligo gu girwa khu muthu.” 10Abhimeleki a di wudzisa gambe Abrahama, khuye: “Ginani u nga gi wona gu kala u gira kharati?”
11Abrahama a di hakha, khuye: “Eni nyi di pimisa khu monyoni gwangu kheni, khu lisine tigoni momu gu mwalo githawo ga Nungungulu, va na nyi songa khu gufela mwangadzi wangu. 12Gu diga nya isoso, uye i ndriyangu furi khu lisine, gyanana nya guvelegwe khu babe wangu, aholu khandri gyanana gya mayi wangu, nyi di mu dzega gasi gu khala mwangadzi wangu. 13Avbo Nungungulu a nyi dzegidego a nyi gira mulegalegi hwindzo ni valongo vangu, eni nyi di embela mwangadzi wangu, kheni: U na nyi girela wuhindzi nya gu ni wevbini wulanga hi na vbohago, uwe u na khuwe eni nyi ndriyago.”
14Khavbo avbo, Abhimeleki a di dzega dzinvuta ni dzimombe, sithumi nya vama ni vanyamayi a ninga Abrahama, a mu bweledzela mwangadzi waye Sara. 15Abhimeleki a di engedza gambe a ganela, khuye: “Wona, litigo langu lomo mbeli gwago. U ngu dzi kodza guya vbaha avbo gwago u gunago.”
16A di embela Sara, khuye: “Wona, nyi ngu ninga ndriyago likhumi mazana (1.000) singerengere nya parata. Egi gi na khala avbo gwago kha nga gifenengelo mahoni gwa vatshavbo u vbanyago navo, uwe u agisidwe ga satshavbo sesi.”
17Abrahama a di lombelela ga Nungungulu, Nungungulu a di hawulugisa Abhimeleki, mwangadzi waye ni sithumi saye nya vanyamayi, gasi va kodze gu velega sanana.#20:17 Khu kotani ya Sara, Abhimeleki ni vathu va ndrangani gwaye vatshavbo va di beledwa khu madwali nymba velega ni gu vbela tshivba nya wama ni wunyamayi. 18Kholu Pfhumu Nungungulu a di bangisa mahembe ya vanyamayi vatshavbo va ndrangani ga Abhimeleki, va khala sifule khu kotani ya Sara, mwangadzi wa Abrahama.
Currently Selected:
Genesi 20: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
