Genesi 17

Gidzumeledzwano ni wugwera

1Abrama a diri ni livbandre na mama magumi ni livbandre na mina (99) myaga nya guvelegwe gwaye, Pfhumu Nungungulu a di dzi wonegisa gwaye a gu mu embela, khuye: “Eni kheni Nungungulu nya Tshivba Yatshavbo. Gimbila mbeli gwangu nu lulamide. 2Nya gu vbweta gu gira pwanano nago nyi dandrisa tengo nya situgulwana sago si tala nyambana pimo.”

3Abrama a di noga, a tsitsa khovbe vbavbatshi, Nungungulu a mu embela, khuye: 4“Pwanano nyi girago nago khoyu: U na khala babe nya mahundzu nyambana tengo. 5Gukhugela olu khu na ranwa gambe pwani Abrama, aholu va na pwani Abrahama, kholu nyi na gu gira nyapandre nya mahundzu nyambana tengo. 6Nyi na gu ninga livelego nya lingi; nyi na gu gira u velega mayigo, ga situgulwana sago gu na duga dzipfhumu. 7#Wona gambe: Luk 1:55. Nyi na hunga gidzumeledzwano nago ni situgulwana sago gambe khu mimela ni mimelana; wu na khala pwanano kala gupindruga; khu tshivba nya pwanano wowu, Eni nyi na khala Nungungulu wago ni Nungungulu wa situgulwana sago. 8#Wona gambe: Mith 7:5. Nyi na gu ninga uwe ni situgulwana sago litigo leli u vbanyago umo olu kha nga muwuyi; litigo latshavbo la Khanani li na khala thomba yago kala gupindruga, Eni nyi na khala Nungungulu wawe.”

Wugwera

9Nungungulu a di embela Abrahama, khuye: “Khu guralo, uwe u na sayisa gidzumeledzwano gyangu, uwe ni situgulwana sago nya mimelana yi nga gutago. 10#Wona gambe: Mith 7:8; Rom 4:11. Owu khu pwanano nyi wu girago nanu, ni situgulwana sago, gu vbwetega mu wu sayisa; mwama watshavbo vbakari gwanu a na hane wugwera. 11Mu na pilani misutu kha nga giwonegiso nya pwanano wangu nanu. 12Mu na hanisa wugwera sanana sanu satshavbo nya sikhwathana avbo si tshanganisago livbandre na mararu matshigu nya guvelegwe gwawe. Mu na girani kharato vama vatshavbo va na velegwago vbakari gwanu, avo va na velegwago ndrangani, ambari ni valombo gambe mu na gu va rengago khu tengo nya dzitsapawu na siri va lifumbu lanu. 13Gu vbwetega a hana wugwera oyu a velegwago ndrangani ni oyu nya gurengwe khu dzitsapawu dzago. Kharato, gidzumeledzwano gyangu gi na lowa milini gwanu kha nga gidzumeledzwano nya gupindruge. 14Oyu nyamba hana wugwera, mwama a na gumba pidwa lidowo nya wama waye, a na fuviswa vbakari nya valongo vaye, kholu ndragide milayo nya gidzumeledzwano gyangu.”

Nungungulu a ngu vbindrugedza lina la Sarayi

15Nungungulu a di embela Abrahama, khuye:

“Gukhugela olu khu na rana gambe mwangadzi wago

khuwe khu Sarayi,

aholu, u na mu rana khu lina nya gupwani Sara.

16Kholu nyi na gu kategisa khavbo gwaye;

nyi na gu ninga gyanana nya gikhwathana;

nyi na mu kategisa,

a na khala mayi nya mayigo,

khu ndrani gwaye gu na velegwa dzipfhumu nya mayigo.”

17Abrahama a di noga a dzi thesa vbavbatshi a hega, kholu a di gu ganela khu monyoni gwaye, khuye: “Ina mwama nya lizana (100) myaga a ngari ni tshivba nya gu dzi kodze guvelega gyanana, gani? Ahati Sara a gu na ni livbandre na mana magumi (90) myaga a na velega gyanana, gani?” 18Abrahama a di embela Pfhumu Nungungulu, khuye: “Oh, Nungungulu wangu, a na vbanye Ismayeli mbeli gwago!”

19Aholu, Nungungulu a di mu hakha, khuye: “Khu lisine, mwangadzi wago Sara a na gu ninga gyanana nya gikhwathana; u na gi riya lina nya gupwani khu Isaki. Nyi na tiyisa naye gidzumeledzwano gyangu, gi khala gidzumeledzwano nya gupindruge, nyi na khala Nungungulu waye ni melego waye, hwane gwaye. 20Nyi pwide gambe nombelo u giridego khu Ismayeli: Nyi na mu kategisa nuye, nyi na mu ninga livelego nya likhongolo ngudzu, a na andra khu tshivba ngudzu. A na velega likhumi na mavili mafumbu. A na khala babe nya litigo nya likhongolo ngudzu. 21Aholu gidzumeledzwano gyangu nyi na hunga ni Isaki a na velegwago khu Sara mwaga wutago, khu matshigu nya nga aya.” 22Na vbedzide gu ganela, Nungungulu a di khuga a tshiya Abrahama.

23Khavbo avbo, Abrahama a di dzega mwanaye Ismayeli, ni vatshavbo va velegedwego ndrangani gwaye, ni vatshavbo a nga va rengago khu dzitsapawu, vama vatshavbo va ndrangani gwaye a gu va hanisa wugwera, litshigu lolo la limwedo, kha nga idzo a nga embedwago khidzo khu Nungungulu. 24Abrahama a di tshanganiside livbandre na mana magumi ni livbandre na mina (99) myaga nya guvelegwe gwaye, gikhati a hanidego wugwera, 25mwanaye Ismayeli a diri ni likhumi na miraru myaga nya guvelegwe gwaye, gikhati a hanidego wugwera. 26Abrahama ni mwanaye Ismayeli va hanide wugwera litshigu lolo la limwedo, 27ni vama vatshavbo va ndrangani gwaye, ni sanana sa ndrangani ni esi nya gurengwe khu dzitsapawu ga va nya mayigo; vatshavbo va di hana wugwera gumogo naye.

Currently Selected:

Genesi 17: BGE2014

Highlight

Copy