Ekisodha 22

Milayo yi yelanago ni gu emela silo sa vane

1Muthu a guba mombe mwendro nvuta a songa mwendro gu rengisa, a na livba livbandre dzimombe khu mombe mweyo ni dzinvuta dzina khu nvuta mweyo.

2Mbafa ya gu manwa na yi gu pandra nyumba yiba, ya gu songwa avbovbo, mwalo nandru wule a yi songidego. 3Aholu ya gu songwa na gugide, novba waye wu fanede gu livbwa.

Mbafa yi fanede gu livba; ya gu hamuga nya gulivbe khigyo, yi na rengiswe, gasi gu livba wuvafa waye. 4Girengo gi bidwego gya gu manwa mandzani ga mbafa na gi nga gu vbanya, gani mombe, gani buru, gani nvuta, mbafa yi na livba guvili.

5Muthu a gu havisa sifuyo saye thembweni nya sivbila mwendro nya miwuvha, aholu a diga sirengo si ya hodza thembweni ga vane, a na hatha esi nya sadi a fanyidego thembweni gwaye aya livba khiso.

6Muthu a gu rotha nilo a vbisa likhabi, luvbya li thapela li ya vbisa dzimbewu thembweni ga vane, oyu a nga vbisa luvbya fanede gu livba satshavbo si ghohekidego khu kotani nya luvbya.

Milayo yi yelanago ni gulivba mangava ni milandru

(Levhi 5:20-26)

7Muthu a gu vega dzitsapawu mwendro silo saye ga mumbe muthu, silo sesi si bidwa ndrangani mule, mbafa ya gu manwa yi na livba guvili. 8Ya gumba manwa mbafa, mune ndranga a na reswa a ta sambanya mbeli ga Nungungulu gukhuye khaba silo sa muthu kwawe. 9Ga gu manega gu dwanisana khu silo nya gukari, nya nga mombe, buru, mwendro gifuyo gya phandroni, guambala mwendro ni gimbe gilo gi dzimedego, mahungu ma na bikedwa mbeli ga Nungungulu, wule a na ningwago nandru khu Nungungulu a na livba guvili muthu kwawe.

10Muthu a gu fiseta muthu kwawe buru, mombe mwendro nvuta ni gimbe gifuyo a gu lelisa, girengo gyogyo gifa mwendro gu fanyega litundru, mwendro gu dzegwa nyamba wonwa khu muthu, 11avbovbo gu na vbwetega va vavili va ya mbeli ga Pfhumu Nungungulu, va ya sambanya gasi gu tidwa pwani khaba gifuyo gya muthu kwawe; mune gifuyo a na dzumela gusambanya gogu, kha na mu livbisa gilo. 12Aholu gya gu bani gi bidwe ndrangani gwaye, uye a na livba ga mune girengo. 13Gya gu bani giri gi di hodzwa khu sirengo nya likhabi, oyu a lelisidwego a na resa sipandre si tshadego gasi gu ta nonedza a tiyisa lisine laye. Kharato, kha na nga livba egi gi hodzidwego khu sirengo nya likhabi.

14Muthu a gu lomba girengo ga muthu kwawe, gi ta fanywa litundru mwendro gufa, nari mwalo vbafuvbi mune wakone, a na livba. 15Aholu mune girengo a gu bani nari vbafuvbi, kha na livbwa. A gu bani nari a di lombisa khu dzitsapawu, a na livbwa tengo va nga dzumelanago.

Milayo nya giwuthu ni wukhodwa

16Mwama a gu sengedzela gyagadzyana nya likendzi gi si gu tumbiswigo, a gu lala nagyo a na dusa gyuma nya lowolo a gi dzega gi khala mwangadzi waye. 17#Wona gambe: Dhet 22:28-29. Aholu babe wa nyamahegyane a gu bomba gu mu ninga gyanana gyaye, mwama a na livba khu dzitsapawu tengo nya gyuma wu ninganago lowolo nya makendzi.

18U nga digi ndroyi yi vbanya.

19 # Wona gambe: Levh 18:23; 20:15-16; Dhet 27:21. Muthu watshavbo a lalago ni gifuyo a na songwe.

20 # Wona gambe: Dhet 17:2-7. Oyu a phaselago vambe vanungungulu vbavbandze ga Pfhumu Nungungulu basi, a na fuviswe.

21 # Wona gambe: Eks 23:9; Levh 19:33-34; Dhet 24:17-18; 27:19. U nga vengeli muluveli a vbanyago vbafuvbi gwago mwendro gu mu tshanisa, kholu enu nenu mu diri valuveli tigoni ga Egipito.

22Mu nga tshanisi noni mwendro khulungu. 23Kholu mwa gu va tshanisa, avo va womba huwa avbo gwangu, Eni nyi na va yingisa gulila gwawe; 24Likhulo langu li na vbisa, nyi mi songa khu matshari, gasi vagadzi vanu va khale dzinoni ni sanana sanu si khala niso dzikhulungu.

25 # Wona gambe: Levh 25:35-38; Dhet 15:7-11; 23:19-20. Wa gu lombisa dzitsapawu moyo nya gisiwana a lumbago vathu vangu u vbanyago naye u nga giri khu gu mu livbisa bhindzu, u nga lombisi khu gufela gukhuwe dzi velegele. 26#Wona gambe: Dhet 24:10-13. Muthu kwanu a gu gu pharisa libhadzi laye gasi gu livba nandru nya gukari a gu nawo avbo gwago, u fanede gu li bweledza gwaye na li si gu pfoli lidambo, 27kholu khigyo basi gifenengelo a gu nagyo gasi guvhikela girame mili waye. A gu lala a na fenengela ginani? A gu lila avbo gwangu Eni nyi na mu yingisa, kholu Eni nyi ngu pwela wusiwana vathu.

28 # Wona gambe: Mit 23:5. U nga nyenyi Pfhumu Nungungulu wago, gambe u nga vali muthangeli wanu.

29U nga hweli gu dusa hwengo nya mihandro ya thembweni gwago ni ya gikhwatini gwago.

U na nyi ninga matiwula nya sanana sago. 30U na gira idzosaye ni matiwula nya mombe yago ni dzinvuta dzago. Matiwula ma fanede gu khala livbandre na mavili matshigu ni mayi waye, khu eli nya livbandre na mararu matshigu, mu na ta gira ningelo avbo gwangu.

31 # Wona gambe: Levh 17:15. Enu mu vathu mu agisedwego Eni. Gima mu nga hodzi nyama nya girengo gi songidwego khabini khu sirengo nya likhabi. Nyama nya guralo rinyelani dzimbwa.

Currently Selected:

Ekisodha 22: BGE2014

Highlight

Copy