Ekisodha 21

Milayo yi ganelago khu dzikhumbi

(Dhewuteronome 15:12-18; Levhi 25:35-46)

1Esi khu sileletelo u na si vegago vbakari gwawe: 2Wa gu renga khumbi nya Muhebheru, yi na gu thumela livbandre na moyo myaga, aholu khu mwaga nya livbandre na wuvili, yi na tshulega basi nyamba livba gilo. 3Ya gu bani yi dzude avbo gwago na yiri yonga, yi na duga gambe yonga. Aholu, ya gu bani yi dzude ni mwangadzi, yi na duga ni mwangadzi waye. 4A gu bani mune waye a yi ningide nyamayi, nyamayi yoyu a gu velega sanana nya sikhwathana mwendro sagadzyana, nyamayi ni sanana sa gu lumba mune waye, khumbi nya mwama yi na duga yonga.

5Aholu khumbi ya gu ganela, khiyo: “Eni nyi ngu mu gola mune wangu, mwangadzi wangu ni sanana sangu, kha nyi dzini gutshulega nyi hongola.” 6Khu guralo, mune waye a na yi resa mbeli ga Nungungulu,#21:6 A na hidzimela mbeli ga Nungungulu: Kholu Mujudha muthu a lumbago Nungungulu a mu dzegisidego wugumbini ga Faro, Mujudha a gu dzina gu khala khumbi ya mumbe Mujudha gikhat gyatshavbo nya guvbanye gwaye, gu vbwetega Nungungulu a khale fakazi. Khigyo gi gurumedzago mune gu yisa giluvelotunu ga Pafhumu khumbi yeyi yi dzi ningelago gu mu thumela gikhati gyatshavbo. a yi hidzimisa vbafuvbi ni lidimba mwendro avbo nya hasimo; khavbo avbo, mune waye a na yi pola ndzeve khu ndrombo.#21:6 Gupola ndzeve khu ndrombo: A diri giolovedzo gya vagale, gasi gu yeyedza gupwani muthu nya gukari hungegide ga ndranga ya mune waye khu nayo nya wugumbi. Khumbi yeyi yi na mu thumela kala gupindruga.

7Mwama a gu rengisa gyanana gyaye nya gyagadzyana a gi gira khumbi, igyo kha gi na nga duga kha nga idzo dzi dugago khidzo dzikhumbi nya vama. 8Gya gumba tsakisa mahoni ga mune waye gu gi dzega gi khala mwangadzi waye, uye a na dzumedzisa gukhuye gi dzegiswa; aholu kha na dzumedziswa gu gi rengisa ga va nya mayigo, kholu kharato gu bani a gi hosede ngudzu. 9Aholu a gu gi ningela ga mwanaye nya mwama, a na gi phare kha nga gyanana gyaye nya gyagadzyana. 10A gu gi dzegela mumbe nyamayi, a nga vbunguleli guhodza ga oyu nya guphele ambari guambala gwaye, ambari dzifanelo dzaye nya wugadzi. 11#Wona gambe: Levh 25:39-46. Mune waye a gumba gi girela silo sesi sa siraru, nyamayi a ngu kodza gu khuga nyamba livba dzitsapawu.

Milayo yi gimbilelanago ni nandru nya gusonge muthu

12 # Wona gambe: Levh 24:17. Uye a bayisago muthu, a mu songa, fanede gu songwa nuye. 13#Wona gambe: Mit 35:10-34; Dhet 19:1-13; Jos 20:1-9. Aholu a gu bani na sa gira kha gwenye, nari a di ningedwa mandzani gwaye khu Nungungulu, nyi na gu vegela wulanga a yelago gu thavela avbo. 14Aholu muthu a gu wugela muthu kwawe khu khorosa a gira gikungo nya gu mu songe, muthu yoyo ambari na sihade vbagiluvelotunu gwangu, mu dzege aya songwa.#21:14 Musongi a songago khu wughevenga mwalo muemeli mwendro wulanga nya guthavele avbo. Giluvelo gya Pfhumu gi di tidwa kha ngawulanga nya mahegiso nya guthavele avbo, aholu gighevenga kha gi dzumedziswi guya vbanyela avbo.

15Uye a bayisago babe mwendro mayi waye, fanede gu songwa.

16 # Wona gambe: Dhet 24:7. Uye a bago muthu a mu rengisa, mwendro aya manwa naye ndrangani gwaye, fanede gu songwa.

17 # Wona gambe: Levh 20:9; Mat 15:4; Mark 7:10. Uye a valago babe waye mwendro mayi waye, fanede gu songwa.

Milayo yi yelanago ni vathu va gu bayisana

(Mitengo 35:16-34; Dhewuteronome 19:4-13; Josuwa 20:1-9; Matewu 5:38-42)

18vathu vavili va gu dwana, moyo waye a bayisa kwawe khu giwindri mwendro khu suku, nyamba mu songa, aholu a dwala, 19a gu kala a khala tshukwana a kodza gutshetela khu ndronga, wule a nga mu bayisago, kha na ningwa nandru; aholu a na mu livba matshigu yale a luzidego khu gu khala vbadawutunu khu gudwala nyamba thuma, fanede gambe gu mu thumisa kala a halawuga.

20Muthu a gu bayisa khumbi yaye nya mwama mwendro nya nyamayi khu simbo, va gu fela mandzani gwaye, va na phodzedwa; 21aholu a gu vbanya litshigu limwedo mwendro mavili, kha na phodzedwa kholu uye dzitsapawu dzaye.

22Va gu dwana vathu va bayisa nyamayi nya mimba, ya gu ghoheka mimba yaye, aholu uye a sifi, a na livbwa tengo wu na lombwago khu mwama waye, nivbo yoyo wu na livbedwa mbeli ga valamuli. 23Aholu a gufa nyamayi wule a na livbiswa womi khu womi, 24#Wona gambe: Levh 24:19-20; Dhet 19:21; Mat 5:38. liso khu liso, likhwaha khu likhwaha, gyandza khu gyandza, ngondro khu ngondro, 25gu vbiswa khu gu vbiswa, gilondra khu gilondra, phandza khu phandza.

26Muthu a gu veta khumbi yaye nya nyamayi mwendro nya mwama a yi pola liso, a na yi tshula yi hongola khu kotani nya liso laye. 27A gu dusa likhwaha la khumbi yaye nya mwama mwendro nya nyamayi, a na yi diga yi hongola na yi tshulegide khu kotani nya likhwaha laye.

28Mombe ya gu ghumula muthu nya mwama mwendro nya nyamayi, yi mu songa, mombe yoyo, yi na pfarwa khu siwindri, ni nyama yakone kha yi na hodzwa; aholu mune mombe kha na ningwa nandru. 29Aholu mombe yoyo, a gu nari giolovedzo gyaye nya gughumulele vathu, ni mune wakone na embedwe, aholu a si theli kota khu gu yi segela, ya gu songa mwama mwendro nyamayi, mombe yi na pfarwe khu siwindri, ni mune wakone nuye a na songwe. 30A gu dzumedziswa guya khu gu livba, a na ningela tengo watshavbo va na mu lumbago gasi gu dzegisa womi waye. 31Mombe ya gu songa gyanana nya gikhwathana mwendro nya gyagadyana, yi na girwa idzo gu rumwago khu nayo yoyu. 32Mombe ya gu ghumula khumbi nya mwama mwendro nya nyamayi, gu livbwa tengo nya magumararu dzisekeli nya parata ga mune khumbi, mombe yi na pfarwa khu siwindri.

Milayo yi yelanago ni mahungu nya gughohe silo sa vane

33Muthu a gu tula nambo, mwendro a gu kemba liphala a si li segi, ya gu thega umo mombe mwendro buru, 34mune nambo a na livba khu dzitsapawu ga mune girengo, aholu girengo gi fudego gi na lumba uye.

35Mombe ya muthu ya gu paya yi songa mombe ya mumbe muthu, va na rengisa eyi nya guvbanye va gu kabana tengo wakone, ni eyi nya gufe gambe va na kabana. 36Aholu mombe yile ya gu bani yi tidwa khu gale gupwani yi ngu payela sirengo sikwawe, aholu mune wakone a si theli kota khu gu yi hungelela, a na livba mombe khu mombe, eyi nya gufe yi na lumba uye.

Currently Selected:

Ekisodha 21: BGE2014

Highlight

Copy