Ekisodha 16

Nungungulu a ngu rumela manaha

(Mitengo 11:1-15,31-34; Dzindzimo 78:23-29; Gutuledwa 16:20-21; Joba 6:26-30)

1Na va khugide khu Elimi, tshangano watshavbo nya sanana sa Israyeli, khu litshigu nya likhumi na livbandre nya ngima nya wuvili hwane nya gu na va khugide khu Egipito, va di vboha giwulani gya Sini, gi khalago vbakari nya ndzila yi khugago khu Elimi yi hongola Sinayi. 2Tshangano watshavbo wa Israyeli wu di phela gu wugela Mosi ni Aroni giwulani. 3Sanana sa Israyeli si di ganela, khiso: “Adiri tshukwana nari pwani hi di fede mandzani ga Pfhumu Nungungulu tigoni ga Egipito, iyo hi nga bani hi tshelega mabhota nya nyama, hi khala hi hodza wusa hi khura. Aholu enu mu hi dusideni mu hi resa giwulani momu, mu di fela gu ta songa khu ndzala rengo watshavbo wowu nya vathu!”

4 # Wona gambe: Joh 6:31. Khavbo avbo, Pfhumu Nungungulu a di embela Mosi, khuye: “Wona, nyi na mi rumelani guhodza, gu na tshiga khu ndzadzini kha nga ndzadzi. Vathu va na duga litshigu ni litshigu va rolela esi si ninganago gu hodza litshigu limwedo. Esi nya gu girela gu va linga, gasi nyi wona mwendro va na landrisa milayo yangu. 5Aholu khu litshigu nya livbandre na limwedo, gikhati va dongiselago esi va nga rolelago, si na tala gu ningana ni esi va rolelago matshigu mavili.”

6Khavbo avbo, Mosi ni Aroni va di embela sanana satshavbo sa na Israyeli, khavo: “Gupfolani nya lidambo, mu na dzitini gukhenu khu Pfhumu Nungungulu a nga mi dusa khu tigoni ga Egipito. 7Vbadzimindrutunu, mu na wonani wugulu wa Pfhumu Nungungulu, kholu Uye pwide edzi mu nga mu bhongela khidzo. Gasi ethu hi vamani, gu kala mu hi wugelani?” 8Mosi a di ganela gambe, khuye: “Pfhumu Nungungulu gupfolani nya lidambo a na mi ningani nyama mu hodza, dzimindrudzile, a na mi ningani guhodza mu hodza mu khura, kholu Pfhumu Nungungulu pwide gu mu bhongela gwanu. Gasi khethu vamani ethu? Enu khandri mwa gu wugela ethu; khu Pfhumu Nungungulu mu Mu wugelago.”

9Khavbo avbo, Mosi a di embela Aroni, khuye: “Ganela ga tshangano watshavbo wa na Israyeli, khuwe: Hidzimelani mbeli ga Pfhumu Nungungulu, kholu Uye pwide gubhonga gwanu.”

10Aroni na nga guganela ga tshangano watshavbo nya sanana sa Israyeli, avo va di khedzisa giwulani, va wona wudhumo wa Pfhumu Nungungulu na wu ngangamela lipfhini.

Nungungulu a ngu rumela sikenya

11 Pfhumu Nungungulu a di ganela ga Mosi, a mu embela, khuye: 12“Nyi pwide gubhonga ga sanana sa Israyeli. Ganela u va embela, khuwe: Gupfolani nya lidambo mu na hodzani nyama, vbadzimindrutunu mu na khurani khu sibaba. Mu na dzitini gukhenu Eni kheni Pfhumu Nungungulu wanu.”

13Gupfolani nya lidambo, gu di duga sikenya nya singi, si ta fenengedza talala watshavbo. Vbadzimindrutunu gu di manega mumya bambe nya talala. 14Avbo yi nga bangago thondrwane, gu di wonega vbavbatshi nya mafu ya giwulani, silo nya nga sinamu nya dzitshege. 15Avbo sanana sa na Israyeli, si nga wona esi, si di wudzisana khu gyawe, khiso: “Ginani egi?” Kholu va di si giti ginani. Mosi a di va embela, khuye: “Ogu khu guhodza a mi ningago Pfhumu Nungungulu gasi mu hodze.” 16Pfhumu Nungungulu a di va laya gukhuye: “Muthu ni muthu a na rolele gupima khu mavhalo yaye. Mu na pima ghomeri,#16:16 Ghomeri a diri pimo va nga bani va pima khuwo silo nya gubange. mweyo khu muthu, gukhedza khu tengo nya vathu. Muthu ni muthu a na rolela gupima khu tengo nya vathu a gu navo gaya gwaye.” 17Sanana sa Israyeli si di gira kharato, vambe va di rolela nya singi, vambe va rolela nya sidugwana. 18Avbo va nga pimelago khu ghomeri, si di si tshali ga wule a nga bani a rolede nya singi, gambe si di si keneleli ga wule a nga bani a rolede nya sidugwana. Moyo ni moyo a di rolede gupima khu mavhalo yaye.

19Mosi a di va embela, khuye: “Gu nga manege ni moyo nya gu si tshiye kala mindru.”

20Aholu vambe kha va nga yingela Mosi, va di tshiya kala vbadzimindrutunu; aholu si di tala khu siwungu si nunga, khavbo avbo, Mosi a di goroga khu kotani gwawe.

21Va di rolela matshigu yatshavbo vbadzimindrutunu, muthu ni muthu gupima khu mavhalo yaye, gikhati li vbisago lihani, si di nyiviliga.

Nayo nya Sabhadho

(Levhi 23:3-4; 25:1-7)

22Khu litshigu nya livbandre na limwedo, va di rolela nya guningane matshigu mavili, dzighomeri dzimbili khu muthu; madhota yatshavbo nya tshangano ma di ta bikela ga Mosi. 23#Wona gambe: Eks 20:8-11. Uye a di va embela, khuye: “Eyi khu milayo a nyi ningidego Pfhumu Nungungulu. Mindru litshigu nya guhefemule. Sabhadho nya guage ya Pfhumu Nungungulu, esi mu vbwetago gu phula, phulani muhuno; ni esi mu vbwetago gu gadzinga, gadzingani muhuno, satshavbo esi si tshalago si sayiseni kala mindru.”

24Avo va di si sayisa kala vbadzimindrutunu, kha nga idzo a nga rumago khidzo Mosi, aholu kha sa nga nunga mwendro gu mana siwungu. 25Mosi a di khuye: “Hodzani esi muhuno, kholu muhuno litshigu nya guhefemule, Sabhadho yi phasedwego Pfhumu Nungungulu. Muhuno kha mu na si mana vbavbandze. 26Mu na si rolelani livbandre na limwedo matshigu, aholu khu eli nya livbandre na mavili, si na bani siri mwalo.”

27Khu litshigu nya livbandre na mavili, vomo vambe va nga dugago gasi gu ya rolela, aholu kha va nga ya mana gilo. 28Khu guralo, Pfhumu Nungungulu a di embela Mosi, khuye: “Mu na kala lini, enu na mu bomba gu landrisa sirumo ni milayo yangu? 29Wonani nya gukhenu Pfhumu Nungungulu a mi ningide Sabhadho, khu kotani nya ugo, a ngu mi ningani khu litshigu nya livbandre na limwedo, guhodza gu ninganago matshigu mavili. Khu litshigu nya livbandre na mavili, muthu ni muthu a na khale wulanga waye, mwalo a dzumedziswago gukhuga wulanga waye, litshigu lolo nya livbandre na mavili.”

30Vathu va di hefemula khu litshigu nya livbandre na mavili. 31Vathu nya nyumba ya Israyeli va di rana guhodza gule khavo manaha,#16:31 Manaha; gu tshamusela gupwani “ginani egi?” gu di wonega kha nga dzitshege, na si agide, si lombela gukhwatshi si di thedwa wulombe. 32Mosi a di khuye: “Pfhumu Nungungulu rumide gukhuye: Sayisani ghomeri nya gutale khu manaha ndrangani gwanu, gasi situgulwana sanu si ta wona guhodza nyi mi wundzidego khugo giwulani gikhati nyi mi dusidego khigyo khu tigoni ga Egipito.”

33Mosi a di embela gambe Aroni, khuye: “Dzega gifugo u thela ghomeri nya gutale khu manaha, u vega mbeli ga Pfhumu Nungungulu gasi gu sayisela vatugulu vanu.”

34Kha nga idzo Pfhumu Nungungulu a rumidego khidzo Mosi, Aroni a di vega gifugo mbeli nya Wufakazi#16:34 Wufakazi khu Gihebheru, guthudwa sivatu nya Nayo si vegidwego Tshatshani nya Tshangano. gasi gi sayisega avbo. 35#Wona gambe: Jos 5:12. Sanana sa Israyeli si hodzide manaha gipimo nya magumana myaga, kala va gu vboha tigoni va vbanyago vathu. Va hodzide manaha kala va gu vboha vbinganoni nya litigo la Khanani. 36Ghomeri gipandre nya likhumi nya Efa.#16:36 Efa pimo wa gale wu ninganago hatha mwendro miphatha miivili, khu gupwani yi ninganago magumavili mwendro magumana dzilitro.

Currently Selected:

Ekisodha 16: BGE2014

Highlight

Copy