Ekisodha 15

Ndzimo ya Mosi

(Valamuli 5:2-32)

1 # Wona gambe: Gutu 15:3. Khavbo avbo, Mosi ni sanana sa na Israyeli va di emba ndzimo yeyi nya gurungudze Pfhumu Nungungulu, khavo:

“Nyi na embelela ga Pfhumu Nungungulu

a wonegisidego gidhumo gyaye nya gikhongolo:

Rinyide phwani kavalu ni mukhileli wakone.

2 # Wona gambe: Dzind 118:14; Isa 12:2. Pfhumu Nungungulu khuye tshivba ni ndzimo yangu.

Khuye muvbanyisi wangu.

Khuye Nungungulu wangu, nyi na mu rungudza;

Nungungulu wa vababe vangu;

khu guralo, nyi na mu khusedza.

3 Pfhumu Nungungulu ndrena nya tshivba,

Lina laye khuye Pfhumu Nungungulu.

4Dzamiside phwani dzikareta nya nyimbi

dza Faro

gumogo ni mabutho yaye nya nyimbi;

ni dzindrena dzaye nya guhathwe

dzi dzamide nondrwani nya Yiphwa

nya Gufuvile.

5Va fenengedzidwe khu mavimbi,

va gu rika nondrwani kha nga giwindri.

6Nyamudye wago, Uwe Pfhumu Nungungulu,

gu wonegiside tshivba;

nyamudye wago, Uwe pfhumu Nungungulu,

gu phalalegiside valala.

7Khu wufumu wago nya wukhongolo,

U ngu pfhungumula avo va gu wugelago,

U rumela likhulo lago li va vbisa

kha nga mavivi nya mwasi,

8khu furugedzo wa dzithonvuni gwago,

mati ma di wungedzedwa;

mavimbi ma di ema ma gira libhiyo;

nondrwa wu di banga vbakari nya yiphwa.

9Nala a di khuye:

Nyi na va tutumisa,

nyi na va mola nyi va phanga;

hefemulo wangu wu na khura khu avo,

nyi na homola litshari langu nyi va mbembisa;

nyi na va songa khu mandza yangu.

10Aholu Uwe u di furugedza khu phuvbo yago,

yiphwa yi ta va fenengedza.

Va di rika kha nga rikiso

nondrwani nya mati nya guete.

11Khu mani a fananago nago,

Uwe Pfhumu Nungungulu

vbakari ga vanungungulu vatshavbo?

Khu mani nya gungangamele gu

fanana ni Uwe,

a fanedego gu thawa ni gu rungudzwa?

U giride siliwugiso.

12U thawuludzide libogo lago la nyamudye;

va gu midzwa khu mafu.

13Khu wuwadi wago u thangede vathu vago

U va dzegisidego,

U di va hetedza khu tshivba yago U va yisa

wulangani gwago nya guage.

14Mayigo ma dipwa esi, ma gu ndrendremela;

vathu va Filisitiya va di tala khu hwanga;

15Vafumeli va Edhomi

va di thuruga;

dzindrena dza Mowabhi

dzi di tala khu rerema;

vathu vatshavbo Vakhanani va di vbela tshivba.

16Va di modwa khu hwanga ni gundrendremela

khu kotani nya tshivba nya libogo lago.

Va emide va banga kha nga siwindri,

kala va vbindra vathu vago,

Uwe Pfhumu Nungungulu!

Kala va vbindre vathu u va dzegisidego.

17Uwe u na va bedza tigoni, u ya va vega

mugigomoni gi gu lumbago;

wulanga u va dongisedego gu ya

va vbanyisa avbo,

Uwe Pfhumu Nungungulu,

wulanga nya miphaso wu giridwego khu

mandza yago, Uwe Pfhumu Nungungulu.

18 Pfhumu Nungungulu a na fuma gikhati

gyatshavbo kala gupindruga.”

19Kholu dzikavalu dza Faro gumogo ni dzikareta dzaye nya nyimbi ni vakhileli nya dzikavalu va bede pwani. Pfhumu Nungungulu a di reda mati ya phwani ma ta va khubhunyeta, kholu sanana sa Israyeli si di gimbila khu mawundru lilondreni nya gubange, vbakari ni vbakari nya yiphwa.

Guhana ga Miriyamu gumogo ni vanyamayi

20Khavbo avbo, Miriyamu, nyamayi nya muprofeti, ndruye wa Aroni, a di phara tandrandra mandzani, vanyamayi vatshavbo va di duga vbavbandze ni mitandrandra yawe, va hana.

21Miriyamu a di va thulela ndzimo, khuye:

“Embani ga Pfhumu Nungungulu,

kholu khu lisine khongolo;

mbembiside phwani kavalu ni mukhileli

wakone.”

II. LIENDRO VBAKARI NYA GIWULA

(Ekisodha 15:22—18:27)

Mati nya guvave ya Mara

(Mitengo 33:8-9)

22Khu hwane Mosi a di thangela va na Israyeli, va khuga khu phwani nya Gufuvile, va bela giwulani gya Suri. Va vbedzide matshigu mararu na va gu gimbila mugiwulani nyamba mana mati. 23Va di vboha Mara, aholu kha va dzi kodza gu sela mati ya Mara, kholu ma di guvava. Khu kotani nya isoso wulanga wule wu di ranwa pwani Mara. 24Vathu va di ngurangura va wugela Mosi, khavo: “Hi na sela ginani?”

25Mosi a di lomba ga Pfhumu Nungungulu, Pfhumu Nungungulu a di mu nonedza simbo. Uye a di wu rinya matini. Mati ma di vbindrugedza ma tshamba. Khavbo vbale Pfhumu Nungungulu a va ningidego milayo ni sileletelo, khavbo gambe a va lingidego, a va embela, khuye: 26“Wa gu yingela lito la Pfhumu Nungungulu khu monyo wago watshavbo, u thuma ogu gu lulamidego mahoni gwaye; wa gu yingela milayo ni sileletelo saye satshavbo, gima kha nyi na rumela gwago mitungu nya nga eyi nyi tshanisidego khiyo Vagipiti, kholu Eni kheni Pfhumu Nungungulu nyi gu vbanyisago.”

27Khavbo avbo, va di vboha wulanga wu ranwago pwani Elimi, gu nga bani guromo avbo likhumi na sivili sifefe nya mati ni livbandre na mavili magumi migindru; va di tsitsa avbo mitshatsha yawe vbafuvbi ni mati.

Currently Selected:

Ekisodha 15: BGE2014

Highlight

Copy