Mithumo 17

Pawulo ni Silasi dhoropani ga Tesalonika

1Na va vbindride khu madhoropani ya Anfipoli ni Apoloniya, va di vboha dhoropani ga Tesalonika, umo yi nga bani yi romo nyumba nya nombelo nya Vajudha. 2Kha nga giolovedzo gyaye, Pawulo a di hongola aya va vbweta. Khade gipimo nya dzisabhadho dzitharu na gu ganedzisana navo khu mahungu nya Milowo. 3A di va tshamusela khu gu va pimisela gwadi khuye Kristo a di fanela gu saniseka a wuga khu ga vafudego, a gu ganela, khuye: “Kristo khu Jesu oyu nyi mu tivisago gwanu.” 4Vambe vbakari gwawe va di dzumela, va gu bela tsawani wa Pawulo ni Silasi, gumogo ni gidzemo nya gingi nya vathu nya githawo ga Nungungulu, ni Vagreki ni vanyamayi nya ndruda. 5Vajudha va di tala khu lidiwo va gu ramba sighevenga, va wusa pfilupfilu dhoropani gwatshavbo. Va di bela ndrangani ga Jasoni va vbweta Pawulo ni Silasi gasi gu va yisa vbakari nya vathu. 6Na va va hamugile, va di ndrindrandrindra Jasoni ni vambe vandruye va gu hongola navo ga vafumeli vaya, khavo: “Ava vama va wusidego pfilupfilu tigoni gwatshavbo va vbohide ni omu gwathu gambe, 7Jasoni a va hakha gaya gwaye. Avo vatshavbo va gu ganedza milayo ya Sezari, va tivisa gukhavo Jesu khu mumbe mufumeli.” 8Gidzemo ni vafumeli nya litigo, na va pwide magana yaya, va di hambanega mapimo, 9va di ruma Jasoni ni vambe gu livba dzitsapawu nya gu dzi tshudzise va va diga va gu hongola.

Pawulo ni Silasi dhoropani ga Bhereya

10Ni wutshigu wowo, vandruye va di khiledza Pawulo ni Silasi va gu hongola Bhereya. Na va vbohide va di hongola nyumbani nya nombelo nya Vajudha. 11Vajudha va Bhereya va diri ni myonyo nya yadi guvbindra va Tesalonika. Va di hakha magana khu githawo, va gu khedza Milowo matshigu yatshavbo gasi gu wona, khidzo, khandridzo gani. 12Khu magirelo yoyo, vathu nya vangi va di khodwa. Vbakari nya Vagreki gu di manega vanyamayi nya guthavisege ni vama nya vangi. 13Aholu, Vajudha va Tesalonika na va dzi tide gukhavo Pawulo a ngu tivisa Bhereya mahungu ya Nungungulu, va di hongola vaya kutsedzela vathu gu wusa pfilupfilu. 14Khavbo avbo, vandruye va di dzega Pawulo khu guvbiredza va gu hongola naye siwoni, gasi Silasi ni Thimoti va di tshala. 15Avo va nga vbwelegedza Pawulo va di mu vbohisa kala Atena. Va di wuya ni mwango nya guta embela Silasi ni Thimoti gu hongola khu guvbiredza vaya manana naye Atena.

Magana ya Pawulo dhoropani ga Atena

16Na nga gu va virela dhoropani ga Atena, hefemulo waye wu di garadzega khu gu wona lidhoropa lile na li tade khu sihuru nya miphaso. 17A di ganedzisana nyumbani nya nombelo ni Vajudha ni vambe vakhozeli va Nungungulu. Matshigu yatshavbo a di ganela huwotunu ni vale va nga bani va gu manega avbo. 18Ni vambe vahevbudzi nya gukari, nya gudugele tsawani ga Epikuru ni vale va landrisago sihevbulo sa va na Estoyiku, va di ganedzisana naye. Vambe va gu wudzisa, khavo: “Ginani a ganelago nya libwabwa yoyu?” Vambe, khavo: “Kha nga mutshumayeli nya vambe vanungungulu hi si vatigo,” kholu a di gu ganela khu mahungu ya Jesu ni gu wuga gwaye. 19Va di mu dzega va gu gwela naye gigomoni gya Areyopagu, khavo: “U ngu dzi kodza gu hi embela sihevbudzo sesi nya siphya u hevbudzago, gani? 20Kha nga u tadzago dzindzeve dzathu khu silo hi si sitigo ha guvbweta guti silo muni isoso.” 21Vathu vatshavbo va Atena ni va nya guta va khalago umo, va di si thumi gimbe gilo vbavbandze nya gu ambe ni gu yingisa mahungu maphya. 22Khavbo avbo, Pawulo a di khuga a ema vbakari nya tshangano a gu ganela, khuye: “Nya gu khedza nya gu wona kheni enu, khu maphuvbo yatshavbo mu vakhodwa nya guvbelele. 23Kholu, na nyi gimbide dhoropani gwanu, nyi wona sihuru sanu nya miphaso, nyi di ya mana gimbe gihuru gi lovidwego pwani: ‘Ga Nguluve nyamba tidwa.’ Uye mu mu phaselago nyamba mutini, khuye nyi vbwetago gu mi tivisani. 24Nungungulu a vangidego mafu ni satshavbo esi si guromo mafuni, a gu uye Pfhumu ya ndzadzini ni mafuni. Kha khali dzinyumbani nya gugirwe khu mandza nya vathu. 25Gambe kha thumedwi khu mandza nya vathu nga khwatshi a gu keneledwa khu gilo, kholu khuye a ningago ga vatshavbo guvbanya ni guhefemula ni silo satshavbo. 26Khu ga melegi wa moyo, tumbulugiside mahundzu yatshavbo nya vathu, gasi ma vbahe mafuni gwatshavbo; a kabanisa dzinango, a gu vega mivbingano nya guvbahe umo vathu. 27Gasi va garadzege khu gu vbweta Nungungulu, ambari khu gu mu phuphuthela va mu mane; kholu mwalo hwindzo ga moyo ni moyo nya ethu. 28Kholu gwa uye hi ngu mana guvbanya, ni gu gimbilagimbila, gambe hi womo gwaye. Khiso si nga ganedwago khu vaembeleli vanu, khavo:

‘Kholu ethu nethu hi melego waye.’

29Ha gu bani hiri melego wa Nungungulu hi nga hingigedzi nya gukhethu Nungungulu a ngu fanana ni ndralama, ni silivha, ni giwindri gi vatwago ni gupfhudwa khu dzikhenge ni gu kodza nya muthu. 30Wonani, Nungungulu kha theli kota khu gikhati vathu va nga vbanya gidemani, a ngu tivisa olu ga vathu vatshavbo va malangani yatshavbo gu vbindrugedza mavbanyelo. 31Khaguva vegiside litshigu a na ta lamulago litigo khu gululama, khu ga mwama moyo a nga mu hathago, a mu emisa mbeli nya vathu vatshavbo, khu gu mu wusa khu ga vafudego.” 32Na va mu pwide na gu ganela khu gu wuga ga vafudego, vambe va di mu hega, vambe, khavo: “Hi na gu yingisa gambe limbe litshigu na wu gu ganela khu mahungu yaya.” 33Khu guralo Pawulo a di khuga khu vbakari gwawe. 34Aholu, vama nya gukari va di bela tsawani gwaye va gu khodwa. Vbakari gwawe a di romo Dhiyonisiyo wa Areyopagu ni nyamayi moyo nya gupwani khu Tamarisa ni vambe gambe.

Currently Selected:

Mithumo 17: BGE2014

Highlight

Copy