Mithumo 16

Pawulo ni Silasi va ngu gimbila ni Thimoti

1Va di vboha madhoropani ya Dheribhe ni Listra. A diromo mupizane moyo a ranwago pwani khu Thimoti, gyanana gya nyamayi moyo nya Mujudha nya mukhodwa, ni babe nya Mugereki. 2Vandruye va Listra ni Ikoniya va di gu ninga wukustumunyu nya wadi khu uye. 3Pawulo a di vbweta gukhuye a gimbile naye. Pawulo a di mu dzega a mu bedza wugwera khu gu thava Vajudha va malangani yale, kholu vatshavbo va di gu muti khavo babe waye Mugereki. 4Madhoropani va nga vbindrago khumo, va di ningela sileletelo sa vapostoli ni madhota ya Jerusalema, va gu va khongotela gu si landrisa. 5Khu magirelo yoyo, mabandla ma di tiyisedwa gukhodwani, tengo nya vathu wu di engedzelana litshigu ni litshigu.

Pawulo a ngu woniswa muthu wa Makedhoniya

6Va di gimbila tigoni ga Firijiya ni Galatiya; va di himbedzwa khu Liphuvbo nya Guage gu tivisa mahungu ya Pfhumu tigoni ga Aziya. 7Na va vbohide vbinganoni ga Misiya, va di vbweta gu hongola Bhitiniya, aholu, Liphuvbo la Jesu li di va himbedzela. 8Khavbo avbo, va di tsemakanya Misiya va gu relela Trowade. 9Ni wutshigu, Pawulo a di wona giwoniso: Mwama moyo wa Makedhoniya na emide a di mu lomba, khuye: “Delu Makedhoniya u ta hi phasa” 10Khu hwane nya giwoniso gile, hi di khuga hi phara ndzila hi gu hongola Makedhoniya na hi gu tumba gukhethu Nungungulu a di hi rana guya tshumayela iyo Ivhangeli.

Pawulo a ngu vboha dhoropani ga Filipi

11Na hi khilede ngalava khu Trowade, hi di hongola kala dhoropani ga Samotarasiya, khu limbe litshigu hi di vboha dhoropani ga Neyapoli. 12Khu vbale hi di vboha Filipi, lidhoropa nya likhongolo la tigoni ga Makedhoniya gu nga bani gu fumwa khu Roma. Hi khade matshigwana nya gukari dhoropani mule. 13Khu litshigu nya Sabhadho hi di duga khu dhoropani hi hongola vbavbandze vbafuvbi ni tsongo avbo hi nga alakanya gukhethu womo wulanga va girelago avbo nombelo Vajudha. Na hi khade, hi di ganela ga vanyamayi va nga bani va tshanganide. 14Nyamayi moyo nya gupwani khu Lidhiya, murengisi nya myendra nya siwunguwungu, wa dhoropani ga Tiyatira, a nga bani ari ni githawo ga Nungungulu, a di hi yingisa. Pfhumu a di tula monyo waye afela gu hakha magana ya Pawulo. 15Hwane nya gu bani a bhapatisidwe uye ni ndranga yaye yatshavbo, a di hi lomba, khuye: “Mwa gu wona gukhenu eni nyi muthu a khodwego ga Pfhumu, belani nyumbani gwangu mu khale.” A di hi gurumedza gu bela.

Gumodwa ga Pawulo ni Silasi

16Tshigu mwedo, na hi gu hongola nombelotunu, hi di khingwa khu nyamahegyane moyo nya khumbi, a nga bani ari ni mandriki nya wutumbe; uye a di fumisa ngudzu vaphari vaye khu gulola gwaye. 17A di phela gulandrisela Pawulo ni ethu, na gu huwelela, khuye: “Vathu vava sithumi sa Nungungulu a guromo vbatshani ngudzu, va gu mi tivisa ndzila nya guvbanyise.” 18A di gira esi matshigu nya mangi. Khavbo avbo, Pawulo khu gu garala a di thendregedza a ganela ga liphuvbo, khuye: “Khu lina la Jesu Kristo nyi ngu gu ruma: Diga nyamahegyane yoyo.” Khu gikhati gyogyo gikwembu gi di mu diga. 19Aholu, vaphari vaye na va wone gukhavo va vbeledwe khu thomba va nga bani va gu yi lirela khavbo gwaye, va di mola Pawulo ni Silasi va gu va ndrindrandrindra kala phathani, va gu va ningela ga dzindruna: 20Va gu va yisa ga vafumeli nya vakhongolo, khavo: “Vama vava Vajudha, aholu va gu wusa pfilupfilu dhoropani gwathu; 21Va gu hevbudza mavbanyelo ethu hi si yeligo gu ma hakha ni gu ma landrisa, kholu hi varoma.” 22Gidzemo gyatshavbo gi di va wugela, dzindruna dzi va pferulela dzingandzu, va ruma gu va kwamula khu dzimboma. 23Na va va kwamude ngudzu va di va bedza pasoni, va gu laya nyakasane gu va ghadha gwadi. 24Na hakhide nayo yoyu, a di va dzega a va thela pasoni, a va hunga liphili mawundruni. 25Ni vbakari nya wutshigu, Pawulo ni Silasi va di gira nombelo, va embelela dzindzimo nya gurungudze Nungungulu, simbe sibotshwa si di va yingisela. 26Khu githugedza gu di manega girevareva, gi nga kutsunga lipaso, ma tulega malimba yatshavbo, ma pilegela makhetshe ya vatshavbo.

Gukhodwa ga ghadhi

27Na yi khendzugide ghadhi yi wona malimba nya lipaso na ma tulegide yi di dzega litshari yi vbweta gu dzi songa, khiyo mwendro sibotshwa si thavide. 28Aholu, Pawulo a di khusa lito a gu ganela, khuye: “U nga dzi songi, hatshavbo hi womo avba.” 29Khavbo avbo, ghadhi yi di lomba kandriya yi gu bela khu guvbiredza na yi gu ndrendremela, yi ya khidzima mawundruni ga Pawulo ni Silasi. 30Na yi dugide navo vbavbandze yi di va wudzisa, khiyo: “Madhota, ina ginani nyi yelago gu gira gasi nyi mane guvbanyiswa.” 31Va di mu hakha, khavo: “Khodwa ga Pfhumu Jesu u na mana guvbanya uwe gumogo ni ndranga yago.” 32Va di mu embela mahungu ya Nungungulu uye ni ndranga yaye yatshavbo. 33Ni wutshigu wowo, ghadhi yi di va dzega yi va handza silondra, khavbo avbo yi gu bhapatiswa iyo ni vatshavbo va ndrangani gwaye. 34Yi di va dzega yi bela navo nyumbani gwaye, yi va girela guhodza, yi nengela ni ngamu yaye yatshavbo khu kotani nya gukhodwe ga Nungungulu.

Gutshudwa ga Pawulo ni Silasi

35Na gugide, vafumeli va di rumela dzindruna ni lidangalila ga ghadhi, khavo: “Tshulani vama vovo va hongole.” 36Khavbo avbo, ghadhi yi di embela Pawulo, khiyo: “Vafumeli va gu ruma gu mi tshula, dugani mu hongole khu gurula.” 37Pawulo a di embela dzindruna, khuye: “Va hi kwamude vbakari nya vathu, nyamba hi lamula, va hi thela pasoni, ethu hi gu sivelegwa sa Varoma. Olu va guvbweta gu hi dusa khu gisihaledza! Ahihi! Kha si giregi isoso, va nate avo wurumba wawe va ta hi tshula.” 38Dzindruna dzi di yisa magana yaya ga vafumeli. Avo, na va dzitide gukhavo sivelegwa sa Varoma, va di khala hwanga. 39Va di ta va lomba divalelo, va duga navo vbavbandze, va gu va khongotela gu duga khu dhoropani. 40Na va dugide khu pasoni, va di hongola ndrangani ga Lidhiya, va di wona vandruye, va gu va tiyisela, va phara ndzila va hongola.

Currently Selected:

Mithumo 16: BGE2014

Highlight

Copy