Marko TSHAMUSELO
TSHAMUSELO
Ivhangeli yi nga lowa khu Marko ya gu tidwa kha nga iyo ya gale ni iyo nya guhumbe guvbindra Dziivhangeli dzatshavbo. Libhukuni nya Mithumo ya Vapostoli hi ngu mu mana Marko na gu ranwa khu lina nya gupwani Johane Marko. Adiri mubangaladzi nya ndzila wa Pawulo, liendroni nya guhegule guya tivisa Ivhangeli. Gambe ha gu mu landrisela gwadi, gu gira gukhwatshi khade ni Pedro dhoropani ga Roma. Pima kholu ndrani nya libhuku leli Pedro a manago wulanga nya wukhongolo. Marko lovide Ivhangeli yaye omu nya mwaga nya livbandre na mavili magumi (70) hwane nya guvelegwe ga Kristo. Ivhangeli yaye yi lovedwe ngudzungudzu Vakristo nya gute khu ga va nya mayigo, va si gu Vajudha, va nga bani va si yiti milayo nya tumbunugo ni mavbanyelo nya Vajudha.
Omu nya Ivhangeli yi nga lowa khu Marko mahungu ma sasamedzedwe gwadi. Gu mwalo gukanakana ha gukhethu Ivhangeli yeyi khiyo yi nga khala nga giyeyedzo ga Matewu ni Luka. Dziivhangeli dzedzi dza dzitharu dza gu ranwa pwani “Sinotiku” khu kotani nya gufanane ni gu longoloka nya idzo. Dzatshavbo dza gu gimbila gumogo. Marko a gu thela ngudzu kota khu gu yeyedza mithumo ya Jesu; esi Jesu a nga gira. Khu kharato, kha lovi gilo khu mahungu nya guvelegwe gwa Jesu, gambe kha dzi garadzi khu gu hi ninga longoloko wa vababe nya lihundzu la Jesu.
Gukhugela guhegulani, Marko a gu hi yeyedza Jesu kha nga muthu moyo a tadego khu tshivba ni wudhumo, a palago tshivba ya Sathane. Sigiro saye sa gu liwugisa vathu vatshavbo. Marko a gu wonegisa ngudzu esi Jesu a nga gira, guvbindra esi a nga ganela ni esi a nga hevbudza. Marko a gu ganela ngudzu khu mahungu ma ranwago gupwani “Sihalo wa Mesiya.” Jesu a di si dzumedzisi gukhuye vathu va mu tugule gukhavo khuye Mesiya. Jesu a di himbedzela maphuvbo nya guvivbe nya mandriki a nga bani a gu ma tutumisa, gu mu tivisa vathuni. Vadwali a nga va hawulugisa dzingumbe dzawe, a di va laya khuye va si embeli muthu. Ambari Pedro a nga ganela gukhuye Jesu khuye Kristo a di laywa gupwani a si ganeli gambe khu mahungu yoyo. Marko a gu zama gukhuye mapimo ya vathu ma khedzise ngudzungudzu litshina nya mahungu yatshavbo: Gutshaniseka ni gufa gwa Jesu. Mesiya a na tugudwa basi khu muthu wule a hakhago ni gu mu dzumela Jesu a khokhothedwego vbagihambanotunu. Marko a gu hi ninga nyamba laphisa ngudzu mahungu nya guwuge gwa Jesu khu ga vafudego.
Omu nya Ivhangeli yeyi mahungu ma sasamedzedwe khu sipandre sesi:
Guphela nya Mahungu nya Yadi ya Jesu Kristo: 1:1-13
Thumo wa Jesu tigoni ga Galileya: 1:14—9:50
Gukhugela Galileya kala Jerusalema: 10:1-52
Matshigu nya guhegise ya Jesu dhoropani ga Jerusalema: 11:1—15:47
Guwuga ga Jesu: 16:1-8
Gudziwonegisa ga Jesu ni gu gwela gwaye Ndzadzini: 16:9-20
Currently Selected:
Marko TSHAMUSELO: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.