Marko 1

Guhevbudza ga Johane Mubhapatisi

(Matewu 3:1-12; Luka 3:1-18; Johane 1:19-28)

1Guphela nya Mahungu nya Yadi ya Jesu Kristo, Mwamana wa Nungungulu,#1:1 Vambe valovi kha va lova gukhavo Mwamana wa Nungungulu. 2#Wona gambe: Mal 3:1. kha nga idzo gu lovidwego khidzo khu muprofeti Isaya, a nga khuye:

“Nyi ngu rumela mwango wangu mbeli gwago,

owu wu na gu dongiselago ndzila yago.”

3 # Wona gambe: Isa 40:3. “Lomo lito li huwelelago mu giwulani, khilo:

Dongiselani ndzila ya Pfhumu,

lulamisani sindzilana saye.”

4Khidzo kharati, Johane Mubhapatisi a di manega giwulani a huwelela gubhapatiswa nya gu dzi sodzise gasi gu ditshedzwa sighoho. 5Va di mu yela vatshavbo va nga bani va gu vbanya tigoni ga Judheya ni dhoropani ga Jerusalema, gasi guya bhapatiswa khuye tsongoni ga Joridhani; na va gu dawulela sighoho sawe.

6Johane a di gu ambala dzingandzu nya mawoya nya dzingameriya, giwununi gwaye a di hunga libhandri nya lidowo; guhodza gwaye a diri dzimbera ni wulombe nya likhabi. 7A di gu huwelela, khuye: “Khu hwane gwangu, a nguta uye a gu ni tshivba gu nyi vbindra, eni nyi gu mwalo fanelo nya gunoge nyi tshula dzingodzi nya silato saye. 8Eni nya gu mi bhapatisani khu mati, gasi uye a nata mi bhapatisa khu Liphuvbo nya Guage.”

Gubhapatiswa ga Jesu

(Matewu 3:13-17; Luka 3:21-22)

9Khu matshigu yale, Jesu a di khuga Nazareta ga Galileya a gu hongola tsongoni wa Joridhani aya bhapatiswa khu Johane. 10Na gu duga khu matini, Jesu a di wona ndzadzi na yi tulegide, Liphuvbo li di mbaka vbatshani Gwaye kha nga lituva. 11#Wona gambe: Mat 12:18; 17:5; Mark 9:7; Luk 9:35; Isa 42:1. Khu Ndzadzini li di pwala lito, li nga, khilo: “Uwe u Mwamana wangu nya gigodwa ngudzu, monyo wangu wu ngu tangadziswa khuwe.”

Gulingwa ga Jesu

(Matewu 4:1-11; Luka 4:1-13)

12Khavbo avbo, Liphuvbo nya Guage li di mu dzega li gu mu yisa giwulani. 13Iyo a ngaya khalago magumana matshigu vbakari nya sirengo nya likhabi na gu lingwa khu Sathane, dzingilozi dza Nungungulu dzi di mu thumela.

Jesu a ngu phela thumo waye tigoni ga Galileya

(Matewu 4:12-17; Luka 4:14-15)

14Hwane nya gu na modwe Johane, Jesu adita Galileya gasi guta hevbudza Mahungu nya Yadi ya Nungungulu, khuye: 15#Wona gambe: Dhan 2:44. “Ma tadzisegide matshigu, Mufumo wa Nungungulu womo vbafuvbi. Vbindrugedzani mavbanyelo, mu khodwe khu Mahungu nya Yadi.”

Vapizane nya guphele

(Matewu 4:18-22; Luka 5:1-11)

16Na gu gimbila bambe nya yiphwa ya Galileya Jesu a di wona Simoni ni ndriyaye Andreya na va gu thesa dzikhoga kholu va diri vagogi. 17Jesu a di va embela, khuye: “Nyi landreni, nyi na mi girani vagogi nya vathu.” 18Va di dzegela gu diga dzikhoga va gu mu landra. 19Na gimbide pfhukanyana, a di wona Jakobe ni ndriyaye Johane, sanana sa Zebhedhewu na va gu sonedzela dzikhoga ngalavani. 20A di va rana, avo va di tshiya babe wawe Zebhedhewu ni sithumi ngalavani, va gu mu landra. 21Va di bela dhoropani ga Kafarinawume. Na li vbohide litshigu nya Sabhadho, Jesu a di bela nyumbani nya nombelo a phela gu hevbudza. 22#Wona gambe: Mat 7:28-29. Vatshavbo va di liwuga khu sihevbudzo saye, kholu a di hevbudza kha nga muthu moyo a gu ni fanelo nya guhevbudze, nasiri kha nga valovi nya Nayo.

23Nyumbani mule nya nombelo, a di romo muthu moyo a nga bani ari ni liphuvbo nya guvivbe, li di ganela khu tshivba, khilo: 24“Ginani hi nga gu ghohelago, Jesu wa Nazareta, wa gu tela guta hi mbembisa? Nyi ngu guti khuwe mani: Khuwe Gihathwa gya Nungungulu.” 25Aholu Jesu a di li kawuka, khuye: “Degula, duga ga muthu yoyo.” 26Khavbo avbo, liphuvbo nya guvivbe li di mu dzudza khu tshivba, li womba huwa, li gu duga. 27Vatshavbo va di liwuga va gu wudzisana, khavo: “Nari ginani egi? Mu ngu wonani gihevbudzo giphya nya gutale khu tshivba! A dzi kodzago gu kawuka maphuvbo nya guvivbe ma gu mu yingisa.” 28Ndruma yaye yi di phalalega gipandrengulu gyatshavbo gya Galileya ni mayigwana yatshavbo ya vbafuvbyana mule.

Jesu a ngu hawulugisa ngogadzi wa Pedro ni vambe vadwali

(Matewu 8:14-17; Luka 4:38-41)

29Na dugide khu nyumbani nya nombelo, a di hongola ndrangani ga Simoni ni Andreya, nari ni Jakobe ni Johane. 30Va diya mana ngogadzi wa Simoni vbadawutunu na gu dwala, va tivisa Jesu. 31Na mu yede, a diya mu phara khu libogo a gu mu wusa. Khavbo avbo, feveri yi di dzegela guvbindra, a gu wuga a va sayisa. 32Na li pfode lidambo, va di mu yisela vadwali vatshavbo ni va nya maphuvbo nya guvivbe. 33Vathu vatshavbo va dhoropani va di tombanide mwanyani nya ndranga yile. 34A di hawulugisa vathu nya vangi madwali yawe nya guhambanehambane, a gu tutumisa maphuvbo nya mangi nya guvivbe, a si ma dzumedzisi gu ganela, kholu ayo ma di gu muti khayo khuye mani.

Jesu a ngu khuga gasi guya lombelela

(Luka 4:42-44)

35Ni mambagugya, a di khuga a gu hongola giwulani, gasi guya gira nombelo. 36Simoni ni ava a nga bani ari navo, va di gimbila va mu vbweta. 37Na va mu mane, va di mu embela, khavo: “Vathu vatshavbo va ngu gu vbweta.” 38Aholu, uye a di va hakha, khuye: “Hongoleni mambe malanga, mudzindranganani dza vbafuvbyana momu, gasi guya hevbudza gambe Ivhangeli, kholu khiso nyi nga si tela.”

39 # Wona gambe: Mat 4:23; 9:35. A di gimbila tigoni gwatshavbo ga Galileya, na gu hevbudza Ivhangeli dzinyumbani gwawe nya nombelo, ni gu tutumisa maphuvbo nya guvivbe.

Jesu a ngu hawulugusa mudwali nya sokono

(Matewu 8:1-4; Luka 5:12-16)

40Mudwali moyo nya sokono a di mu yela aya mu khidzimela, a gu mu lomba, khuye: “Pfhumu, wa gu dzina nyi agise.” 41Jesu a di mu pwela wusiwana a mu handzega mandza, a mu embela, khuye: “Nyi ngu dzina. Agiswa.” 42Na mu embede esi, sokonho yi di dzegela gu diga mudwali wule a agiswa. 43Khavbo avbo, Jesu a di mu laya khu gigurumedza a gu mu diga a hongola na gukhuye: 44“U nga embeli muthu esi nyi gu giredego, aholu indra dzi yeyedza ga muphasi nya mhamba gasi afela gu ningela, khu gu agiswa gwago, esi si rumwago khu Nayo wa Mosi, gasi gu khala wufakazi vbakari gwawe.”

45Aholu, uye, me ni gu khuga khu vbale, a di huwelela ni litigo latshavbo esi si nga giregago gwaye. Khu kharato, Jesu kha nga dzi kodza gubela madhoropani, a di khala mu siwulani. Ambari ulo, vathu va di hongola gwaye na va guta khu malangani yatshavbo.

Currently Selected:

Marko 1: BGG2014

Highlight

Copy