Marko 6

Jesu tigoni ga Nazareta

(Matewu 13:53-58; Luka 4:16-30)

1Jesu na khugide khu vbale a di hongola tigoni gwaye gumogo ni vapizane vaye. 2Na li vbohide litshigu nya Sabhadho, adiya bela nyumbani nya nombelo a phela gu hevbudza; nya vangi, na va mu pwide, va di liwuga, va wudzisana, khavo: “A gu siti ni mani satshavbo sesi? Guti gwatshavbo gogu a gu mane hayi? A ha siliwugiso si girwago khu mandza yaye, sa guta khu hayi? 3Ina khandruye oyu hi mu tigo kha nga muvati, mwamana wa Mariya, ndruye wa Jakobe ni Josefe ni Judha ni Simoni, gani? Vandriyaye nya vanyamayi, khandravo hi vbanyago navo tigoni momu, gani?” Va di mu diga nyamba mu thela kota.

4Jesu a di va embela, khuye: Muprofeti kha zundzegi tigoni gwaye, valongoni ni ndrangani gwawe. 5Kha dzi kodza gu gira giliwugiso ni gimwegyo, a di hegela gu handzega mandza vadwali vadugwana va nga bani varomo vbale, a va hawulugisa. 6A di liwuga khu gumba khodwa ga vathu vale. Ambari ulo a di gimbilagimbila mu dzindrangani dza vbafuvbi a gu hevbudza.

Jesu a ngu rumela vapostoli vaye

(Matewu 10:5-15; Luka 9:1-6)

7Jesu a di rana vale nya likhumi na vavili, a va rumela khu thumo vavili vavili, a va ninga tshivba nya gututumise maphuvbo nya guvivbe. 8A di va laya va si phari gilo khu ndzila, vbavbandze nya ndronga basi; khuye va nga dzegi gibaba, mwendro gikhwama, mwendro dzitsapawu mabhandrini. 9A di va embela gambe khuye va ambale masandrazi, aholu va si phari dzingandzu dzimbili. 10A di va embela, khuye: “Ndrangani mu na gu belago, khalani avbo kala mu gu khuga khavbovbo. 11Ni evbini va na gumba mi hakha ni gu mi yingisa, gikhati mu dugago, phuphuthani kudzudzwane vbavbatshi nya migondro yanu gasi gu khala wukustumunyu gwawe.”

12Va di phara ndzila va gu gimbila va hevbudza khavo vathu vatshavbo gu vbwetega va vbindrugedza mavbanyelo. 13#Wona gambe: Jak 5:14. Va di tutumisa maphuvbo nya mangi nya guvivbe, va gu hawulugisa vadwali nya vangi khu gu va todza mafura.

Gufa ga Johane Mubhapatisi

(Matewu 14:1-12; Luka 9:7-9)

14Mufumeli Herodhi pwide na gu ganedwa khu Jesu. Kholu lina laye li di pwade ngudzu ndruma, khavo: Khu Johane Mubhapatisi a wugidego khu ga vafudego, khavbo a manago tshivba nya gugire satshavbo sesi. 15#Wona gambe: Mat 16:14; Mark 8:28; Luk 9:19. Vambe va di khavo “Khuye muprofeti Eliya.” Gasi vambe va di gukhavo: “Uye muprofeti kha nga moyo nya vaprofeti va gale.”

16Aholu Herodhi, na pwide silo sesi, a di ganela, khuye: “Khu Johane nyi nga ruma gu a pidwa ngolo, khuye a wugidego khu ga vafudego.” 17Kholu uye Herodhi, khuye a nga ruma gu mola Johane mubhapatisi a khothedwa pasoni, khu kotani ya Herodhiya mwangadzi wa ndriyaye Filipi; a nga mu dzegago. 18Kholu Johane a di gu mu kawuka, khuye: “Khu yeli gu dzega mwangadzi wa ndriyago.”

19Herodhiya a di gu venga Johane, a vbweta ndzila nya gu mu songe a yi hamuga. 20Kholu Herodhi a diri ni githawo ga Johane khu gu muti khuye muthu nya ndruda a agidego, a di mu vhikela. Uye, khu gu mupwa basi na gu ganela a di hambanega mapimo, aholu, a di mu yingisa khu gunengela.

21Na li vbohide litshigu nya ladi, nya gunengele khu gu dundruga guvelegwa gwaye, mufumeli Herodhi a di gira buzo a rana madhota nya vathangeli nya dzinyimbi ni vakhongolo va Galileya. 22Nyamahegyane wa Herodhiya a di bela vbakari a gu hana, khu mahanelo ma nga tsakisago Herodhi ni vatshavbo va nga bani va rambidwe vbabuzotunu. Khavbo avbo, mufumeli a di embela nyamahegyane, khuye: “Nyi lombe egi u ginago nyi na gu ninga.” 23A di sambanya gwaye, khuye: “Ni gevbi u na nyi lombago nyi na gu ninga, ambari nari gipandre nya mufumo wangu! Nyi na gu ninga.”

24Nyamahegyane a diya wudzisa mayi waye, khuye: “Ginani nyi na lombago?” Uye a di mu hakha, khuye: “Lomba hungo wa Johane Mubhapatisi.” 25A di wuya, a ta bela khu gu vbiredza umo a nga bani a romo mufumeli Herodhi, aya, khuye: “Nya guvbweta gukheni u nyi ninge khu mbiyani, nugunugu olu, hungo wa Johane Mubhapatisi.” 26Mufumeli a di garadzega ngudzu; aholu kha dzi kodza gu mu bombela khu kotani nya gisambanyo a nga girago na gu pwidwa khu vathu a nga va rambago. 27Mufumeli, a di rumela khu gu vbiredza nyakasane moyo nya ghadhi yaye, gu a mu resela hungo wa Johane. Uye a diya pasoni aya mu pila ngolo, 28a gu resa hungo waye khu mbiyani a ningela nyamahegyane, nyamahegyane aya ninga mayi waye. 29Na va dzitide vapizane va Johane, va dita dzega girumbi gyaye vaya dzinga thowoni.

Jesu a ngu hodzisa livbandre magumi mazana vathu

(Matewu 14:13-21; Luka 9:10-17; Johane 6:1-14)

30Vapostoli va di wuya va ta tshangana ni Jesu va gu mu tshamusela iso va nga gimbila va gira ni esi va nga hevbudza. 31Jesu a di va embela, khuye: “Hongoleni giwulani mu ya hefemula vbadugwana.” A di gira kharato kholu va di si mani gikhati nya guhodze khu kotani nya vathu va nga bani va gu bela ni gu duga khu gipitipiti. 32Khu guralo, va di hongola vonga khu ngalava wulangani nya giwula.

33Vathu nya vangi va di va wona na va gu hongola, va di guti avba vayago, khu kharato, va di duga khu mitalalani yatshavbo, va gimbila khu mawundru na va gu duga khu madhoropani gwatshavbo va khinga, va va hegudza gu vboha. 34#Wona gambe: 1 Dzipf 22:17; 2 Dzik 18:16; Mat 9:36. Gikhati Jesu a nga tshiga khu ngalavani, a di wona gidzemo nya gingi, a va pwela wuhindzi, kholu va di khala nga dzinvuta nyambana muhavisi. A di phela gu va hevbudza silo nya singi. 35Na li hwide lidambo, vapizane va di hidzimela ga Jesu vaya, khavo: “Lidambo li hwide, narigu wulanga wowu giwula; 36va dige va hongole va vbindre khu mahangeni ni mitalalani vafela guya dzi rengela gilogyo nya guhodze.” 37Aholu uye a di va hakha, khuye: “Va ningeni enu guhodza.” Vapizane va di khavo: “Ina wa gu pimisa nya gukhuwe khu mazana mavili nya dzitsapawu hi nga dzi kodza gu renga sibaba nya guenedze vathu, gani?” 38Uye a di va hakha, khuye: “Sibaba singani mu gu naso? Indrani mu ya wona.” Vapizane, na va sitide va di hakha, khavo: “Livbandre sibaba ni dzindzandzi dzimbili.”

39Khavbo avbo, a di va ruma gu khala khu sikwata mwasini nya gunyuge. 40Va di khala vbavbatshi khu sikwata nya lizana vathu niso nya livbandre magumi. 41Na dzegide sibaba sile nya livbandre ni dzindzandzi dza dzimbili, a di khusa maho a khedza vbatshani Ndzadzini, a kategisa, a pila sibaba a si ningela ga vapizane vaye gasi gu kabanisela vathu. A di kabanisela gambe vatshavbo dzindzandzi dza dzimbili. 42Va di hodza vatshavbo va khura; 43bwelo khavbo va rolela sipandre nya sibaba ni dzindzandzi si nga thegelago, va di tadza likhumi na sivili situndru. 44Ava va nga hodzago sibaba a diri livbandre magumi mazana (5.000) vama.

Jesu a ngu gimbila vbatshani nya mati

(Matewu 14:22-33; Johane 6:15-21)

45Khu hwane nya iso, Jesu a di ruma vapizane vaye gu bela ngalavani va thanga guya tshatugo ga Bhetisayidha, uye na ngu gu vbanganana ni gidzemo. 46Na va vbanganide, a di gwela gigomoni aya lombelela. 47Na li hwide lidambo, ngalava na yiri vbakari nya mati, Jesu a di tshade enga siwoni. 48Na wonide nya gukhuye va garade khu gu dzuwa makasiya kholu phuvbo yi di bani yi gu veta khu thonvutunu, a di va yela ni mambagugya na gu gimbila khu vbatshani nya mati, a gira gukhwatshi a gu va thangela. 49Na va mu wone na gu gimbila khu vbatshani nya mati, va di pimisa nya gukhavo githusa. Khu kharato, va di womba dzihuwa.

50Kholu va di mu wona vatshavbo va tedwa khu hwanga. Uye a di va embela, khuye: “Tiyani, mu nga thavi! Kheni.” 51Na bede ngalavani, gasi guya khala navo; phuvbo yi di degula. Avo va di liwuga ngudzu, 52kholu va di bani va si gu mani tshamuselo nya giliwugiso nya sibaba, kholu mapimo yawe ma di segegide.

Jesu a ngu hawulugisa vadwali va Genezareta

(Matewu 14:34-36)

53Na va tshatugide va di ya tshigela tigoni ga Genezareta, va rika ngalava siwoni. 54Na va dugile khu ngalavani, vathu va di dzegela gu muti Jesu. 55Va di gimbila tigoni mule gatshavbo; va di resa vadwali khu mathatho, gasi gu va yisa avbo a nga bani a romo Jesu. 56Ni evbini a nga bani a gu bela, mitalalani, madhoropani ni dzindrangani, va di vega vadwali dzindzilani, gasi a va hawulugise, va mu lomba gu va dzumedzisa gu kuha tshoka nya ngandzu yaye. Ava va nga mu kuha, vatshavbo va di hawuluga.

Currently Selected:

Marko 6: BGG2014

Highlight

Copy