Matewu 4

Gulingwa gwa Jesu

(Marko 1:12-13; Luka 4:1-13)

1Khavbo avbo, a di dzegwa khu Liphuvbo, li mu yisa giwulani, gasi aya lingwa khu Sathane. 2Na hade magumana matshigu, wutshigu ni mihani. Jesu a di pwa ndzala. 3Khavbo avbo, mulingi a di ta, khuye: “Wa gu bani uri Mwamana wa Nungungulu, ruma siwindri sesi si vbindrugedze si khala guhodza.” 4#Wona gambe: Dhet 8:3. Jesu a di mu hakha, khuye: “Gu lovidwe gupwani: Muthu kha vbanyi khu guhodza basi, aholu, khu mahungu yatshavbo ma dugago khu ga Nungungulu.”

5Khavbo avbo, Sathane a di mu dzega a gu hongola naye dhoropani nya gukatege; aya mu emisa gikolitunu nya Nyumba ya Nungungulu, 6a di mu embela, khuye: Wa gu bani uri Mwamana wa Nungungulu, nga dzi digeledza khavba, kholu gu lovidwe, pwani: “Nungungulu a na ruma dzingilozi dzaye dzi gu hakhe, gasi u si bayiswi migondro khu siwindri.” 7#Wona gambe: Dhet 6:17. Jesu a di mu embela, khuye: “Gu lovidwe gambe gupwani: U nga lingi Pfhumu Nungungulu wago!” 8Sathane a di mu dzega nyaluphye a hongola naye gigomoni nya gulaphe ngudzu, avbo a ngaya mu leyedza mifumo yatshavbo nya mafu ni dzithomba dzakone, 9a gu mu embela, khuye: “Nyi na gu ninga satshavbo sesi, wa gu khidzima u nyi khozela.” 10Khavbo avbo, Jesu a di mu hakha, khuye: “Suka, Sathane, kholu gu lovidwe, gupwani: U na khozela Pfhumu Nungungulu wago; khuye basi u na gu mu thumelago.” 11Khavbo avbo, Sathane a di mu diga a hongola; dzingilozi dzi dita dzita mu thumela.

Jesu a ngu phela thumo waye tigoni ga Galileya

(Marko 1:14-15; Luka 4:14-15)

12 # Wona gambe: Mat 14:3; Mark 6:17; Luk 3:19-20. Na pwide nya gupwani Johane khothedwe pasoni, Jesu a di bwelela Galileya; 13#Wona gambe: Joh 2:12. a diga, kharati, Nazareta, aya khala Kafarinawume, a gu lidhoropa li manegelago siwoni ga Galileya, litigo la Zebhuloni ni Nafitali. 14Gasi gu di tadzisega kharati magana ya muprofeti Isaya, nya gukhayo:

15“Litigo la Zebhuloni ni litigo la Nafitali,

vbafuvbi ni ndzila ya phwani

wa tshatugo ga Joridhani,

Galileya wa va nya mayigo.

16 # Wona gambe: Isa 9:1-2. Vathu va nga bani va gu vbanyela mugidemani,

va wonide wenengedzo nya wukhongolo

ni avo va nga bani va gu vbanyela mugusivbalani nya lufu,

va tumbulugedwe khu wenengedzo.”

17 # Wona gambe: Mat 3:2; Dhan 2:44. Khavbo avbo, Jesu a di phela gu hevbudza, na gu ganela, khuye: “Vbindrugedzani mavbanyelo, kholu Mufumo wa Ndzadzini womo vbafuvbi.”

Jesu a ngu rana vapizane

(Marko 1:16-20; Luka 5:1-11)

18Na gu gimbila siwoni ga Galileya, a di wona Simoni, a ranwago pwani khu Pedro, ni ndriyaye Andreya, va nga bani va thesa dzikhoga, kholu va diri vagogi. 19Jesu a di va embela, khuye: “Nyi landreni, nyi na mi gira vagogi nya vathu.” 20Khavbo avbo, va di dzegela gu diga dzikhoga, va mu landra. 21Na gimbide pfhukanyana, a di wona Jakobe ni ndriyaye Johane, sanana sa Zebhedhewu, va nga bani va andza dzikhoga ngalavani. A di va rana navo. 22Va di dzegela gu tshiya babe wawe ngalavani, va mu landra.

Jesu a ngu gimbilagimbila tigoni ga Galileya

(Luka 6:17-19)

23 # Wona gambe: Mat 9:35; Mark 1:39; Luk 4:44. Jesu a di gimbila tigoni gwatshavbo ga Galileya, na gu hevbudza mudzinyumbani nya nombelo, gumogo ni gu tivisa Mahungu nya Yadi nya mufumo, na gu hawulugisa vathu dzingumbe dzawe dzatshavbo, ni madwali. 24Ndruma yaye yi di phalalega ni Siriya gwatshavbo. Va di mu resela vatshavbo avo va nga bani vari ni madwali ni dzingumbe nya dzingi ni simbe sigaradzo; avo va nga bani vari ni maphuvbo nya guvivbe, va nya guhandruga ni va nya sitshira, ni sikhurubwa. A di va hawulugisa vatshavbo. 25A di landrisedwa khu mwandra nya vathu, nya gute khu Galileya, khu Dhekapoli, khu Jerusalema, khu Judheya ni tshatugo ga Joridhani.

Currently Selected:

Matewu 4: BGG2014

Highlight

Copy