Matewu 27

Jesu a ngu yiswa ga Pilato

(Marko 15:1; Luka 23:1-2; Johane 18:28-32)

1Na gugide, vaphasi vatshavbo nya vakhongolo ni madhota va di gira tshangano nya guvbwete lipindru nya gusonge Jesu. 2Va di mu hunga va gu hongola naye vaya mu ningela ga mwamangulu Pilato.

Gufa ga Judha

(Mithumo 1:18-19)

3Khavbo avbo, Judha, a gu uye a nga mu ningelago, na wonide gukhuye lamudwe, a ningwa nandru, a di vetwa khu livhalo, a gu bweledza singerengere sile nya magumararu, a nga ningwago khu vaphasi nya vakhongolo ni madhota, aya va embela, khuye: 4“Nyi ghohide khu gu ningela muthu nyambana nandru.” Aholu avo va di khavo: “Wa guvbweta gukhuwe hi rini? Ahati uwe mune.” 5Khavbo avbo, Judha a di rinya singerengere sile ndrani nya Nyumba ya Nungungulu, a gu hongola aya tshwedza. 6Vakhongolo nya vaphasi va di rolela, singerengere, khavo: “Gu ngu lolela gu si thela gikhwamani nya mihengo, kholu i tengo nya novba.” 7Hwane nya gu bani va pwane, va di renga khidzo wulanga wu nga bani wu ranwa pwani “Lithembwe la muwumbi,” gasi gu dzingela umo va nya mayigo. 8#Wona gambe: Mith 1:18-19. Khu kharato wulanga wule wu ranwago, ni muhuno, pwani “Lithembwe nya Novba.” 9Ma di tadzisega kharati, mahungu ya muprofeti Jeremiya, nya gukhayo: “Va di dzega singerengere nya silivha, khu tengo watshavbo nya magumararu, a gu tengo a nga rengiswago khuwo wule a nga rengiswa khu sanana sa Israyeli, 10#Wona gambe: Zak 11:12-13. va gu renga khiso lithembwe la muwumbi, kha nga idzo Pfhumu a nga nyi rumago khidzo.”

Jesu mahoni ga Pilato

(Marko 15:2-5; Luka 23:3-5; Johane 18:33-38)

11Jesu a di yiswa ga mwamangulu Pilato, a ngaya mu wudzisago, khuye: “Khuwe uwe Mufumeli wa Vajudha?” Jesu a di mu hakha, khuye: “U ganede idzo.” 12Aholu, na gu ketsarwi khu vakhongolo nya vaphasi ni madhota, kha nga hakha gilo. 13Khavbo avbo, Pilato a di mu wudzisa, khuye: “Khupwi dziketso dzatshavbo dzedzi va gu girelago, gani?” 14Aholu uye kha nga phindrula gilo kala mwamangulu a gu liwuga ngudzu. 15Mibuzoni yatshavbo nya Phasika, Pilato a diri ni giolovedzo nya gutshule gibotshwa gimwegyo, gile va nga bani va gi lomba. 16Gikhati gyogyo gi diromo gibotshwa gimwegyo gi nga bani gi zivizwa; lina laye nya gupwani khu Bharabhasi. 17Pilato a di wudzisa gidzemo gyatshavbo gi nga bani gi tshanganide, khuye: “Khu wevbini mu vbwetago gukhenu nyi mi tshulelani: Bharabhasi, mwendro Jesu, a ranwago pwani khu Kristo?” 18A di gu dziti nya gukhuye va di mu ningela khu kotani nya lidiwo. 19Na khade phathani, a lamula, pfhumugadzi yaye yi di mu rumela lito, khiyo: “U nga dzi bedzi mahunguni ya muthu yoyo a lulamidego, kholu vbasilambo nyi sanisekide ngudzu khu dzindroro; khu kotani gwaye.” 20Gasi vaphasi nya vakhongolo ni madhota va di kutsedzela gidzemo gu va lomba gu tshudwa Bharabhasi, a gu songwa Jesu. 21Khavbo avbo, mwamangulu Pilato a di va wudzisa, khuye: “Khu wevbini, nya ava va vavili, mu vbwetago gukhenu nyi mi tshulelani?” Avo va di hakha, khavo: “Bharabhasi!” 22Pilato a di va wudzisa, khuye: “Ahati Jesu, a ranwago Kristo, nyi na mu gira kharini?” Vatshavbo va di hakha, khavo: “A na khokhothedwe!” 23Pilato a di simamisa gu wudzisa, khuye: “Gighoho muni a giridego?” Aholu avo va di gulumela guvbindrisa, khavo: “A na khokhothedwe!” 24#Wona gambe: Dhet 21:6-9. Pilato, na wonide khuye kha gu phasi gilo gu ganedzisana navo, bwelo khavbo, na wonide khuye ligwaha li diya na li engedzelana, a di ranisa mati, a gu hamba mandza mahoni nya gidzemo gyatshavbo, na gukhuye: “Nyi mwalo nandru vbalufutunu nya muthu yoyu nya ndruda! Ahati enu vamune.” 25Gasi gidzemo gyatshavbo gi di hakha, khigyo: “Nandru yoyo nya lufu laye wu na thegele ethu ni sanana sathu!” 26Khavbo avbo, a di va tshulela Bharabhasi; gasi Jesu, a di ruma gu mu kwamula a mu ningela va mu khokhothela.

Jesu a ngu ambagiswa gihugu nya miba

(Marko 15:16-20; Johane 19:2-3)

27Khavbo avbo, masotshwa ya mwamangulu Pilato ma di dzega Jesu ma gu hongola naye nyumbani nya wufumu, avbo ma ngaya tshanganago yatshavbo, ma mu randrela. 28Va di mu tshulela dzitshalu, va mu fenengedza giwunguwungu; 29va di luga gihugu nya miba va mu ambagisa, va mu pharisa sengele khu libogo la nyamudye. Va di vbindra khu khovbeni gwaye, va mu khidzimela, va mu kasuwari, khavo: “Sewe, Mufumeli wa Vajudha!” 30Va di mu hetshela khovbeni, gumogo ni gu mu wandrela sengele wule va mu veta khuye hungoni. 31Hwane nya gu bani va mu kasuwaride, va di mu funungula giwunguwungu, va mu ambagisa dzingandzu dzaye, va mu dzega va gu hongola naye gasi guya mu khokhothela.

Gukhokhothedwa ga Jesu

(Marko 15:21-32; Luka 23:26-43; Johane 19:17-27)

32Avbo va nga bani va duga, va di tshangana ni mwama moyo wa Sirene, nya gupwani khu Simoni. Va di mu gurumedza gu rwala gihambano gya Jesu. 33Na va vbohide naye wulanga wu ranwago Goligota, gu tshamusago, pwani: “Wulanga nya girwarwa,” 34va di mu ninga wadwa nya gupatwe ni nyongwe gasi gu a sele; aholu, na wu lingide, a di wu bomba. 35#Wona gambe: Dzind 22:18. Hwane nya gu bani va mu khokhothede, va di kabana dzingandzu dzaye, vaya khu gu gira nyatumbatumbane. 36Va di khala vbale va mu ghadha. 37Vbagihambanotunu khu vbatshani nya hungo waye va di vega milowo yi nga bani yi tshamusela givangelo nya lufu laye. Yi di gu khiyo. “OYU KHU JESU, MUFUMELI WA VAJUDHA.” 38Gumogo naye gu di khokhothedwa dzimbafa dzimbili, mweyo khu nyamudye, yimbe khu nyambade. 39#Wona gambe: Dzind 22:7; 109:25. Vavbindri nya ndzila va di mu vala, na va gu khiniga mihungo, khavo: 40#Wona gambe: Mat 26:61; Joh 2:19. “Ah! Nga tshiga, na! Uwe u dzi kodzago gu khungumula Nyumba ya Nungungulu, u yi vbahedza khu matshigu mararu! Nga dzi vbanyisa, u tshiga khu vbagihambanotunu vbovbo, wa gu bani uri gyanana gya Nungungulu!” 41Khongolo nya vaphasi, gumogo ni vahevbudzi nya Nayo ni madhota va di mu vala navo, khavo: 42“Vbanyiside vakwawe, aholu kha kodzi gu dzi vbanyisa! A gu ba nari uye Mufumeli wa Israyeli, a na tshige khu vbagihambanotunu, hi na khodwa gwaye. 43#Wona gambe: Dzind 22:8. Tumbide Nungungulu; a na vbulugiswe khuye a gu bani a mu gola, kholu ganede, khuye: ‘Eni nyi gyanana gya Nungungulu!’ ” 44Gu di dzega ni dzimbafa dzi nga bani dzi khokhothedwe naye dzi mu vala nidzo.

Gufa ni gudzingwa ga Jesu

(Marko 15:33-41; Luka 23:44-49; Johane 19:28-30)

45Gukhugela midiya kala ni silambo gu di manega gidema tigoni gwatshavbo. 46Ni silambo, Jesu a di khusedza lito, khuye: “Eli, Eli, lema sabaktani?” Gu tshamusago, pwani “Nungungulu wangu, Nungungulu wangu, khu ginani u nyi digidego?” 47Na va mu pwide, vambe nya vale va nga bani varomo vbale, va di khavo: “A gu rana Eliya!” 48Moyo wawe a di tutuma khu guvbiredza, aya nega gipuryana nya wuluva umo nya ginageri, a gi tshomega vbatshavatunu, a mu ninga a sela. 49Aholu vambe va di khavo: “Mu digeni, ha guvbweta gu wona mwendro Eliya a nata mu vbanyisa!” 50Na wombide gimima, a difa.

51Khavbo avbo, mwendra nya makhuvi nya Nyumba ya Nungungulu wu di pferuga khu vbakari gukhugela vbatshani kala vbavbatshi; gi di manega girevareva, si gu pandrega siwindri; 52ma di tulega marowo, sirumbi nya singi sa va nya ndruda si di wuswa; 53na va dugide khu marowoni, hwane nya gu bani a wugide Jesu, va di bela dhoropani nya gukatege, va wonega ga va nya gutala. 54Muthangeli nya gikwata nya lizana masotshwa, gumogo navo a nga bani a gu ghadha navo Jesu, na va wonide girevareva gile, gumogo niso si nga bani si dugelela, va di tala khu hwanga, va ganela, khavo: “Khu lisine oyu a diri Gyanana gya Nungungulu!” 55Va diromo khu hwindzo, va khedzisela, vanyamayi nya vangi, va nga landrisela Jesu ni gu mu sayisa gukhugela Galileya. 56#Wona gambe: Luk 8:2-3. Vbakari nya vanyamayi vale, a di romo Mariya wa Madhalene, Mariya, mayi wa Jakobe ni Josefe ni mayi wa sanana sa Zebhedhewu.

Gudzingwa ga Jesu

(Marko 15:42-47; Luka 23:50-56; Johane 19:38-42)

57Na li hwide, a di ta mwama moyo nya gitetema, nya gupwani khu Josefe wa Arimateya. Uye nuye a di dzi giride mupizane wa Jesu. 58A diya ga Pilato aya lomba girumbi gya Jesu. Pilato a di ruma gukhuye va mu ninge. 59Josefe a di dzega girumbi gya Jesu a gi fumbela khu mwendra nya lasoli nya guage, 60a mu dzinga lithowoni nya liphya, a nga bani a li kembide mu giwindrini. Khavbo avbo, a di wumbulusa giwindri nya gikhongolo a tshika khigyo mwanya wakone, a gu hongola. 61Mariya wa Madhalene ni mumbe Mariya va diromo vbale, na va khade bambe nya lithowo.

Dzighadhi nya lithowo la Jesu

62Gandra ni dzimindru dzakone, a nga bani ari litshigu nya gudongisele Phasika, vakhongolo nya vaphasi ni Vafarisi va di ya tshangana ga Pilato, vaya, khavo: 63“Mwamangulu, hi ngu dundruga nya gukhethu mukanganyisi wule na nga gu vbanya a di nga ganela, khuye:

‘Nyi na wuga hwane nya matshigu mararu.’

64Khu kharato, rumela vathu vaya ghadha lithowo kala ma vbindra matshigu yaya ya mararu, va ngata vapizane vaye vata mu ba, va kodza gu embela vathu, khavo: Wugide khu gufani. Malipha yaya ma na khala makhongolo guvbindra ayo nya guphele.” 65Pilato a di va phindrula, khuye: “Masotshwa khayo aya. Indrani nawo muya ghadha kha nga idzo mu wonago khidzo.” 66Khavbo avbo, va di ya sega gwadi giwindri nya lithowo, va gu vega gitambo vbagiwindritunu gumogo ni gu vega vaghadhi.

Currently Selected:

Matewu 27: BGG2014

Highlight

Copy