Matewu 26

Gikungo nya gusonge Jesu

(Marko 14:1-2; Luka 22:1-2; Johane 11:45-53)

1Na vbedzide gu ganela mahungu yaya yatshavbo, Jesu a di embela vapizane vaye, khuye: 2“Kha nga mu dzitigo, gu tshade matshigu mavili gasi gu hodzwa Phasika. Mwamana wa Muthu a na ningedwa gasi a khokhothedwa.” 3Khavbo avbo, vakhongolo nya vaphasi nya mhamba ni madhota va di gira tshangano ndrangani ga Khayifasi, a nga bani ari uye khongolo nya vaphasi vatshavbo. 4Avbovbo, va di hevbula mano nya gumole khayo Jesu va mu songa. 5Aholu va di khavo: “Hi nga mu moli vbakari nya buzo nya Phasika, hi nga wusa ligwaha vbakari nya vathu.”

Jesu a ngu todzwa mafura Bhetaniya

(Marko 14:3-9; Johane 12:1-8)

6Jesu, na romo Bhetaniya, ndrangani ga Simoni, a nga bani na gu ranwa “Nya Sokono,” 7na va khade vbamezatunu, a di vboha nyamayi moyo ni gingotwana nya mafura nya gunungele ngudzu, ma nga bani ma rengwa khu dzitsapawu nya dzingi, ata mu thela yatshavbo hungoni. 8Vapizane, na va wonide esi, va di sola, khavo: “Ma gu haganisedwa ginani mafura yale! 9Nari pwani ma di rengisidwe khu tengo nya wungi, na phaside sisiwana khu dzitsapawu dzakone.” 10Aholu Jesu, na tugude mahingigedzo yawe, a di khuye: “Khu ginani mu garadzago nyamayi yoyu? Uye a nyi girede thumo nya wadi. 11Sisiwana mu na bani muri naso gikhati gyatshavbo; gasi eni kha nyi na pindruga nanu. 12Nyamayi yoyu, khu mafura a nyi todzidego, dongisede gudzingwa gwangu. 13Khu lisine nyi ngu mi embelani: Tigoni gwatshavbo, omu gu na ganedwago Ivhangeli yeyi, nyamayi yoyu a na khumbugwa khu kotani nya esi a ngari gu girago.”

Judha a ngu ningela Jesu

(Marko 14:10-11; Luka 22:3-6)

14Khavbo avbo, Judha Sikarioti, moyo nya vale nya likhumi na vavili, a di ya ga vakhongolo nya vaphasi nya mhamba, aya bhula navo, khuye: 15“Kharini mu na gu nyi livbago nya gu mi ningani Jesu?” Avo va di mu ninga magumararu singerengere nya silivha. 16Gukhugela avbovbo, uye a di gevisela gikhati nya gyadi nya gu mu ningele khigyo.

Phasika ya Pfhumu

(Marko 14:12-21; Luka 22:7-14; Johane 13:21-30)

17 # Wona gambe: Eks 12:1-27. Litshigu nya guphele nya buzo nya sibaba nyambana mela, vapizane va diya ga Jesu, vaya, khavo: “Khu hayini u vbwetago gukhuwe hi dongisele avbo Phasika?” 18A di va hakha, khuye: “Indrani dhoropani, ndrangani ga muthu nya gukari muya mu tivisa, khenu: Muhevbudzi wari, khuye: Gikhati gyangu gi vbohide. Nya guvbweta gu hodza Phasika ndrangani gwago ni vapizane vangu.” 19Vapizane va di gira kha nga idzo Jesu a nga va leletela khidzo. Va di ya dongisela Phasika.

20Na li hwide, Jesu a di khala vbamezatunu ni vapizane vaye vatshavbo nya likhumi na vavili. 21Na va gu hodza, a di khuye: “Khu lisine nyi ngu mi embelani, kheni: Moyo wanu a na nyi ningela.” 22Va di tedwa khu wusiwana nya wukhongolo, muthu ni muthu a di mu wudzisa, khu gipandre gyaye, khuye: “Kheni, gani, Pfhumu?” 23Uye a di va hakha, khuye: “Uye nyi bagago gumogo naye mbiyani, khuye a na gu nyi ningelago. 24#Wona gambe: Dzind 41:9. Khu lisine Mwamana wa Muthu, a na hongola, kha nga idzo yi ganelago khidzo Milowo, aholu libango khya wule a na gu mu ningelago. Dari tshukwana ga muthu yoyo, na sa velegwa!” 25Judha, wule a nga mu ningela, a di wudzisa, khuye: “A na ba nari eni, gani, Muhevbudzi?” Jesu a di mu hakha, khuye: “Khidzo u ganedego.”

Gilalelo gya Pfhumu

(Marko 14:22-26; Luka 22:15-20; 1 Vakorinto 11:23-25)

26Vbakari nya gilalelo, Jesu a di dzega gibaba, na gi kategiside, a di gi kabanisa, a gi ningela ga vapizane vaye, khuye: “Dzegani mu hodza. Egi givili gyangu.” 27Khavbo avbo, a di dzega gikombe, na gi kategiside, a di gi ningela ga vapizane vaye, khuye: “Selani, mu tshiyelana mwatshavbo. 28#Wona gambe: Eks 24:6-8; Jer 31:31-34. Kholu owu novba wangu, novba nya gidzumeledzwano giphya wu na vbaladzedwago va nya gutala, gasi gutsetseledwa sighoho. 29Nyi ngu mi embelani, kheni: Gukhugela olu, kha nyi na sela gambe wadwa nya dziuvha kala litshigu nyi na wu selago nanu nyaluphye mufumoni wa Babe wangu.”

Jesu a ngu tivisa Pedro khuye a na mu danga

(Marko 14:27-31; Luka 22:31-34; Johane 13:36-38)

30Na va embidelede nombelo nya ndzimo, va di duga va gu hongola gigomoni nya Miolivha. 31#Wona gambe: Zak 13:7. Khavbo avbo, Jesu a di va embela, khuye: “Wutshigu wa muhuno mwatshavbo, mu na phalalega mu nyi diga nyenga kholu gu lovidwe, pwani: ‘Nyi na bayisa muhavisi, nyi kodza gu phalalegisa dzinvuta.’ 32#Wona gambe: Mat 28:16. Aholu, hwane nya gu bani nyi wugide, nyi na mu hegudzani gu vboha Galileya.” 33Pedro a di khusa lito, khuye: “Ambari va gu phalalega vatshavbo, eni gima kha nyi na gu diga wenga.” 34Jesu a di mu hakha, khuye: “Khu lisine, nyi ngu gu embela: Wutshigu wa muhuno u na nyi danga nyondro tharu, ni khonge nasi gu embi.” 35Pedro a di khuye: “Ambari gu lomba gufa nago, kha nyi na gu danga.” Vapizane vatshavbo va di ganela navo kharato.

Nombelo wa Jesu Getsemani

(Marko 14:32-42; Luka 22:39-46)

36Khavbo avbo, Jesu a di hongola navo wulanga nya gupwani Getsemani, avbo a nga embelago vapizane vaye, khuye: “Khalani avba, nyi nga guya vbale nya lombelela.” 37Na dzegide Pedro, ni sanana sa sivili sa Zebhedhewu, a di phela gusaniseka ni gu tala khu rerema. 38Khavbo avbo, a di va embela, khuye: “Hefemulo wangu wu tade khu gusaniseka nya lufu; khalani avba gasi gu nyi bangaladza.” 39Na leyide vbadugwana, a di khidzima a gu kuha vbavbatshi khu khovbe, a lomba, khuye: “Baba, gwa gu kodzega, nyi ndreyisele gikombe gegi nya wuvi gi vbindre avbo gwangu. Ambari ulo, gu nga giregi guhaladza gwangu; aholu, guhaladza gwago.” 40Na wide avbo va nga bani varomo vapizane, a dita va mana na va lade, a di embela Pedro, khuye: “Kha mwa dzi kodza gu khala na mu khendzugide wora mweyo basi, gasi gu nyi bangaladza? 41Lirelani na mu gu lombelela, gasi mu si thegeli gusengwani. Hefemulo tade khu tshivba, aholu givili gi mwalo tshivba.” 42A di hongola nyaluphye aya lombelela, khuye: “Baba, gwa gu kodzega, nyi vbulugise ga gikombe gegi. Aholu, gu na girege guhaladza gwago!” 43Na wide avbo va nga bani varomo vapizane, a di ta va mana gambe na va lade, kholu va di tade khu ligovbe. 44A di va tshiya a bwelela nya wuraru aya lombelela, a bweledzela magana ya mamowo. 45Guhegisani, a di wuya avbo va nga bani varomo vapizane, a ta va embela, khuye: “Olu lalani, mu hefemula. Gi vbohide gikhati. Mwamana wa Muthu a na ningedwa mandzani nya sighohi. 46Wugani hi hongola. A ngu vboha uye a vbwetago gu nyi ningela.”

Gumodwa ga Jesu

(Marko 14:43-50; Luka 22:47-53; Johane 18:3-12)

47Na nga guganela, a di bela moyo nya vale nya likhumi na vavili, nari ni libutho nya likhongolo nya vathu, va nga rumedwago khu vakhongolo nya vaphasi ni madhota, na vari ni matshari ni sighomba. 48Muningeli a di va ningide giyeyedzo gegi: “Wule nyi na gu mu bhejarigo, khuye kamwe; mu moleni.” 49A di mu yela khu guvbiredza, aya mu losa, khu besu, khuye: “Sewe, Muhevbudzi!” A mu bhejari. 50Jesu a di mu wudzisa, khuye: “Ama sawena uwe, ginani u dzudego uta gira?” Khavbo avbo, va diya mu mola. 51Moyo nya vale nya likhumi na vavili va nga bani vari ni Jesu a di homola litshari a bayisa khilo githumi gya khongolo nya vaphasi, a gu gi pila ndzeve. 52Aholu Jesu a di mu kawuka, khuye: “Vega litshari wulangani gwaye, kholu vatshavbo va thumisago litshari, va nafa khu litshari. 53Wa gu pimisa nya gukhuwe nya gu tandrwa khu gu lomba ga Babe wangu gu a nyi rumela nugunugu likhumi na sivili sikwata nya dzingilozi, ni gu vbindrisa, gani? 54Yi di vbweta gu tadzisega kharini Milowo yi gu khiyo satshavbo gu vbwetega si girege kharati?” 55#Wona gambe: Luk 19:47; 21:37. Khavbo avbo, a di thendregedza a khedza gikwata gile nya vathu, khuye: “Mu di donga matshari ni sighomba gasi guta nyi mola, gukhwatshi nyi mbafa! Matshigu yatshavbo nyi diromo Nyumbani gwa Nungungulu aholu mwalo a nga nyi mola! 56Aholu satshavbo sesi sa gu girega, gasi gu tadzisega Milowo ya vaprofeti.” Khavbo avbo, vapizane vatshavbo va di mu tshiya enga, va gu thava.

Jesu phathani nya Vajudha

(Marko 14:53-65; Luka 22:54-56,63-71; Johane 18:12-14,19-24)

57Avo va nga mola Jesu, va di mu dzega va gu hongola naye ndrangani ga Khayifasi, Muphasi nya Khongolo, iyo va nga bani va tshanganide vahevbudzi nya nayo ni madhota. 58Pedro a di mu landrisela khu hwindzo kala gu vboha ndrangani ga Muphasi nya Khongolo. Na vbohide, a di ya khala avbo si nga bani si khade sithumi, na gufela gu wona mavbelelo nya satshavbo sile. 59Vakhongolo nya vaphasi ni phatha watshavbo va di zama gu mu singedza malipha, gasi gu kodza gu mu ninga nandru, va mu songa; 60aholu kha va dzi kodza gilo, ambari olu va nga duga nya vangi va nga zama gu mu singedza. Guhegisani va di dugelela vavili va nga mu singedzago, khavo: 61#Wona gambe: Joh 2:19. “Hi mu pwide na gukhuye: ‘Nyi ngu dzi kodza gupfhungumula Nyumba ya Nungungulu, nyi yi vbahedza khu matshigu mararu.’ ” 62Khavbo avbo, khongolo nya vaphasi vatshavbo a di khuga a mu wudzisa, khuye: “Khu phindruli gilo? Wari khuwe ginani khu ketso yeyi?” 63Aholu Jesu a di hodza gikhukhu a degula. Khavbo avbo, Muphasi nya Khongolo a di mu embela, khuye: “Nyi ngu gu ruma khu lina la Nungungulu a vbanyago: Nga nyi embela: Ina kamwe uwe khuwe Kristo, Mwamana wa Nungungulu, gani?” 64Jesu a di mu hakha, khuye: “U ganede. Ambari ulo nyi ngu mi embelani: Tshigu mwedo mu na wona Mwamana wa Muthu na khade nyamudye ga Nungungulu nya tshivba tyatshavbo, na guta khu mapfhini ya Ndzadzini.” 65Khavbo avbo, Muphasi nya Khongolo a di pferula dzingandzu dzaye, na gukhuye: “Hembulude Nungungulu! Wufakazi muni hi wu vbwetago gambe? Mu ngari gu mupwa ni guhembulula Nungungulu. 66Mwari khenu ginani?” Avo va di khavo: “A ngu yela gu songwa.” 67Khavbo avbo, va di mu hetshela khovbeni ni gu mu veta mipama. Vambe va di mu veta sibhakela, na va gukhavo: 68“A ma Kristo wa gu bani uri muprofeti, nga tumba, khu mani a nga gu veta.”

Pedro a ngu danga Jesu

(Marko 14:66-72; Luka 22:56-62; Johane 18:15-18,25-27)

69Gikhati gyogyo, Pedro, na khade vbavbandze, a di vbohedwa khu nyamahegyane a nga bani ari githumi gya ndrangani mule, a mu embela, khuye: “Uwe nuwe u diri ni Jesu, Mugalilewu.” 70Aholu, Pedro a di danga mahoni nya vathu vatshavbo, khuye: “Kha nyi si ti iso u si thulago.” 71Na gu hongola mwanyatunu, a di wonwa khu mumbe nyamahegyane nya githumi nuye, a nga embelago avo a nga bani ari navo, khuye: “Oyu nuye a diri ni Jesu, Munazarenu.” 72Pedro a di danga nyaluphye, a sambanya, khuye: “Kha nyi mu ti muthu yoyo.” 73Khavbo avbo, a di hidzimeledwa khavo va nga bani varomo vbale, va mu embela, khavo: “Khu lisine uwe u moyo wawe, kholu ni maganelelo yago ma ngu gu thuledza.” 74Khavbo avbo, a di phela gu vbenyavbenya ni gu sambanya, khuye: “Kha nyi muti muthu yoyo.” Gikhati gyogyo khonge wu di dzegela gu emba. 75Khavbo avbo, Pedro a di dundruga mahungu ya Jesu, nya gukhayo: “Uwe u na nyi danga nyondro tharu khonge nasi gu embi.” A di duga vbavbandze aya lila khu wuvi waye watshavbo.

Currently Selected:

Matewu 26: BGG2014

Highlight

Copy