Matewu 22

Gipimaniso nya dzegano wa mwamana wa mufumeli

(Luka 14:15-24)

1Khavbo avbo, Jesu a di engedza gambe gu va embela khu sipimaniso, khuye: 2“Mufumo wa Ndzadzini wu ngu fanana ni mufumeli moyo a nga dongiselago buzo nya dzegano wa mwamana waye. 3A di ruma sithumi saye guya rana vathu a nga bani a va rambide, aholu avo va di bomba. 4A di ruma nyaluphye simbe sithumi, a si embela, khuye: ‘Indrani muya va tivisa, khenu: Guhodza gu vidzidwe; nyi songetede dzimombe dzangu ni sifuyo nya gunone; satshavbo si dongisedwe. Deluni buzotunu.’ 5Aholu avo kha va nga thela kota. Mumbe a di ya petoni gwaye, mumbe a di ya thumisa wugwewo waye. 6Gasi vambe va di wugela sithumi sile, va si songa. 7Mufumeli wule a di garadzega ngudzu, a gu rumela masotshwa maya songa sighevenga sile, gumogo ni gu si vbisela lidhoropa lawe. 8Khavbo avbo, a di embela sithumi saye, khuye: ‘Guhodza gu vidzidwe aholu avo nyi nga bani nyi va rambide kha va yedwa khu guta. 9Khu kharato, indrani mahandzakanyani nya dzindzila mu gimbila mu gu rana vathu vatshavbo mu na va manago.’ 10Sithumi, na si phalalegide ni dzindzila, si di rana vatshavbo si nga va manago: Nya vadi navo nyamba vadi, kala gu tadza nyumba nya buzo khu vathu. 11Na bede mufumeli gasi guta wona avo va nga rambwago, a di wona moyo a nga bani a sa ambala gipani nya buzo nya dzegano. 12A di mu wudzisa, khuye: ‘Ama sawu, u bede kharini omu nyambana gipani nya buzo nya dzegano?’ Uye a di degula, nyamba hakha gilo. 13#Wona gambe: Mat 8:12; 25:30. Khavbo avbo, mufumeli a di embela sithumi saye, khuye: ‘Mu hungeni mawogo ni mawundru, mu mu dzudzuga vbavbandze, mugidemani. Avbovbo a na ya lila ni gu ketsa magwaha.’ 14Khu lisine vangi va ranidwego, gani olu vadugwana va hathidwego.”

Gukhupha ga Sezari

(Marko 12:13-17; Luka 20:20-26)

15Khavbo avbo, Vafarisi va di gira gikungo, gasi gu hevbula mano nya gu mu ganedzise, na va gu lindrela gukhavo a na hoheta likana limwedo, va kodza gu mu mola. 16Va di rumela vapizane vawe, gumogo ni va na Herodhi, gasi guya mu wudzisa, khavo: “Muhevbudzi, hi ngu dziti nya gukhethu u muthu nya lisine, ni gukhethu u ngu hevbudza ndzila ya Nungungulu kha nga idzo li lombago khidzo lisine; khu thavi muthu, kholu khu khedzi giemo nya muthu. 17Nga hi embela, na: Khu mawonelo yago, hi na ni fanelo mwendro hi mwalo nya gulivbe khupho ga Sezari?” 18Jesu, na gu guti guvivba nya mahingigedzo yawe, a di va hakha, khuye: “Vapfhadzi! Mwa gu nyi lingela ginani? 19Nga nyi yeyedzani dzitsapawu dzakone mu livbago khidzo khupho.” Va di mu ninga tsapawu mweyo. 20A di va wudzisa, khuye: “Gasi mufananiso yoyu ni lina leli khya mani?” 21Va di hakha, khavo: “Khya Sezari.” Khavbo avbo, a di va embela, khuye “Ina kha, ningani ga Sezari iso si gu sa Sezari, ni ga Nungungulu iso si gu sa Nungungulu.” 22Na va pwide phindrulo yeyi, va di liwuga ngudzu, va gu mu diga va hongola.

Guwuga nya vafi

(Marko 12:18-27; Luka 20:27-40)

23Litshigu lolo la limwedo, vasadhusi, a gu tsawa nya vale va gukhavo gu mwalo guwuga ga va nya gufa, va di hidzimela gwaye vaya mu wudzisa, khavo: 24#Wona Dhet 25:5. “Muhevbudzi, Mosi a hi rumide, khuye: ‘A gufa mwama nyamba tshiya sanana, ndriyaye a na hambele namu waye nya noni, gasi gu wusa livelego la ndriyaye.’ 25Va diromo livbandre na vavili vandruye. Koma wakone a di koka ndranga, afa nyamba tshiya sanana. Mwangadzi waye a di tshala ni ndriyaye. 26Oyu nuye si di mu dugela idzosaye, uye nya wuraru nuye, kala uye nya livbandre na wuvili. 27Na va fude vatshavbo a difa nuye nyamayi wule. 28Guwugani ga va nya gufa, nyamayi wule a na lumba wevbini wakone, ulo vatshavbo va mu dzegidego kha nga mwangadzi wawe?” 29Jesu a di va hakha, khuye: “Mu dzi pembide, khu gumbatini Milowo nya Guage ni tshivba ya Nungungulu. 30Kholu guwugani ga va nya gufa vama kha a dzega, vanyamayi kha va na dzegwa; aholu vatshavbo va na fanana ni dzingilozi Ndzadzini. 31Gasi khu mahungu nya guwuge ga va nya gufa, kha mwa hevbulani iso a nga ganelago Nungungulu, gikhati a nga khuye: 32#Wona gambe: Eks 3:6. ‘Eni kheni Nungungulu wa Abrahama, Nungungulu wa Isaki ni Nungungulu wa Jakobe,’ gani? Uye khandri Nungungulu wa va nya gufa, aholu, khwa va nya guvbanya!” 33Gidzemo, na gi mu pwide, gi di liwuga ngudzu khu sihevbudzo saye.

Nayo a gu khongolo ga milayo yatshavbo

(Marko 12:28-34; Luka 10:25-28)

34Vafarisi, na va pwide nya gupwani Jesu a di degudza vasadhusi khu dziphindrulo dzaye, va di gira tshangano; 35avbovbo a di duga moyo wawe a nga bani ari muhevbudzi nya Nayo, aya mu wudzisa, gasi gu mu tshunganisa, khuye: 36“Muhevbudzi, khu wevbini nayo a gu koma ga milayo yatshavbo?” 37Jesu a di mu phindrula, khuye: “ ‘Haladza Pfhumu Nungungulu wago khu monyo wago watshavbo, khu hefemulo wago watshavbo ni mapimo yago yatshavbo.’ 38Oyu khuye a gu khongolo ga milayo yatshavbo; khuye nya guphele wakone. 39#Wona gambe: Levh 19:18. Uye nya wuvili wu ngu fanana noyu. Wa gu ganela, kharati: ‘Haladza muthu kwanu kha nga idzo u dzi haladzago khidzo.’ 40#Wona gambe: Luk 10:25-28. Milayo yeyi ya mivili khiyo yi gu litshina nya Nayo watshavbo wa Mosi ni sihevbudzo sa vaprofeti.”

Kristo gyanana gya mani?

(Marko 12:35-37; Luka 20:41-44)

41Jesu a di wudzisa Vafarisi va nga bani va tshanganide, khuye: 42“Nga nyi embelani: Kristo gyanana gya mani?” Va di mu hakha, khavo: “Gyanana gya Dhavhidhe.” 43A di va wudzisa, khuye: “Khu ginani uye Dhavhidhe abune, khu tshivba nya Liphuvbo nya Guage, a nga mu ranago Pfhumu, khuye: 44#Wona gambe: Dzind 110:1. Pfhumu a di embela Pfhumu yangu, khuye:

Khala khu nyamudye gwangu,

kala nyi gu thesa valala vago vbavbatshi nya migondro yago?

45Olu Dhavhidhe a mu ranago Pfhumu, gu ngu kodzega kharini gu Pfhumu a khale gambe gyanana gyaye?” 46Mwalo a nga dzi kodzago gu mu phindrula. Gukhugela avbovbo kha va mu tiyela gambe gu mu wudzisa gilo.

Currently Selected:

Matewu 22: BGG2014

Highlight

Copy