Matewu 21

Jesu a ngu bela Jerusalema kha nga Mesiya

(Marko 11:1-11; Luka 19:28-40; Johane 12:12-19)

1Na va guvbweta gu vboha Jerusalema, na varomo Bhetifage, mugigomoni nya Miolivha, Jesu a di ruma vapizane vavili, khuye: 2“Indrani talalani mule mu gu wonago khavba, mu na ya mana buru na yi hungidwe ni giburwana gyaye. Dzi tshuleni dza dzimbili muta nadzo. 3Uye a mu angulago, mu embeleni, khenu: Khu Pfhumu a dzi vbwetago; a na dzi resa nyamba hwela.” 4Esi si giregide gasi gu tadzisega mahungu ya muprofeti, a nga khuye:

5 # Wona gambe: Zak 9:9. “Embelani nyamahegyane wa Siyoni.

Khenu khedza Mufumeli wago,

a gu telago khu gurula,

na khilede giburwana, gyanana nya buru.”

6Vapizane va di ya gira kha nga idzo Jesu a nga va rumago khidzo. 7Va di wuya ni buru ni giburwana; va dzi ladzela myendra yawe, gasi Jesu a khala khavbo. 8Vathu nya vangi va di ladza myendra ndzilani; vambe va di pila matamo nya misimbo va ma ladza. 9Avo va nga bani va thangide mbeli navo va nga bani va guta khu hwane, vatshavbo va di mu kulungela, khavo: “Hosana ga Mwamana wa Dhavhidhe! A na rungudzwe uye a tago linani la Pfhumu! Hosana vbatshani Ndzadzini!” 10Gikhati Jesu a nga belago Jerusalema, lidhoropa latshavbo li di gira nyenganyenga. Vathu va di wudzisa, khavo: “Khu mani Oyu?” 11Gidzemo gi di hakha, khigyo: “Khu Jesu, muprofeti wa Nazareta gwa Galileya.”

Jesu a ngu agisa Nyumba ya Nungungulu

(Marko 11:15-19; Luka 19:45-48; Johane 2:13-22)

12Jesu a di bela Nyumbani ga Nungungulu a tutumisa vatshavbo va nga bani varomo mule va rengisa, navo va nga bani va renga, a gu reda vbavbatshi dzimeza dza va nya dzituruku nidzo nya varengisi nya matuva, a gu va embela, khuye: 13“Gu lovidwe, pwani: ‘Nyumba yangu yi na ranwa, pwani nyumba nya nombelo.’ Gasi enu mu yi vbindrugedzide mu yi gira liphala nya dzimbafa.” 14Ndrani mule nya Nyumba ya Nungungulu a di tedwa khu sikhumu ni sikhurubwa, a gu si vbanyisa. 15Na va wonide siliwugiso a nga bani a gira, ni sanana si nga bani si gulumela Nyumbani ga Nungungulu, khiso: “Hosana ga Mwamana wa Dhavhidhe!” Vaphasi nya vakhongolo ni vahevbudzi nya Nayo va di garadzega, va mu embela, khavo: 16#Wona gambe: Dzind 8:2. “U ngu si pwa iso va ganelago, gani?” Jesu a di va hakha, khuye: “Nyi ngu si pwa.” A di va wudzisa, khuye: “Ina mu si hevbuli milowo yi gu, khiyo: Gidhumo gyaye gi na duga, khu kanani nya sanana nya sidugwana niso sa beleni, gani?” 17A di va diga, a duga khu dhoropani a hongola Bhetaniya aya lala.

Gihevbudzo nya nguyu nyambana na mihandro

(Marko 11:12-14,20-24)

18Ni dzimindru, na va gu bwelela dhoropani, a di pwa ndzala. 19Na wonide nguyu vbafuvbi ni ndzila, a di hidzimela aholu khaya mana gilo, a di ya mana mahagane basi. Khavbo avbo, a di khuye: “Gima khu na nga velega gambe mihandro kala gupindruga!” Wu di dzegela gu banga. 20Vapizane, na va wonide esi, va di liwuga, khavo: “Nguyu yoyu wu di bangisa kharini nugunugu olu?” 21#Wona gambe: Mat 17:20; 1 Kor 13:2. Jesu a di hakha, khuye: “Khu lisine nyi ngu mi embelani, kheni: Mwa gu khodwani, nyamba kanakana, kha mu na gira basi esi nyi nga girago nguyu yoyu, aholu mwa gu ruma gigomo gegi, khenu: ‘Siguga khavbovbo, indra uya dzi dumwega phwani’, gu na girega kamwe. 22Kholu satshavbo mu si lombago khu gukhodwa gwanu, umo nya nombelo, mu na ningwani.”

Tshivba ya Jesu

(Marko 11:27-33; Luka 20:1-8)

23Avbo Jesu a nga vboha Nyumbani ga Nungungulu, nari vbakari nya guhevbudze a dita randredwa khu vakhongolo nya vaphasi nya mhamba ni madhota vaya, khavo: “Wa gu yi mana hayi tshivba nya gugire esi? Khu mani a nga gu ninga tshivba yoyo?” 24Jesu a di va hakha, khuye: “Eni neni nyi na ni giwudziso gwanu. Mwa gu nyi phindrulani, nyi na mi embela umo nyi yi manago tshivba yeyi. 25Nga nyi embelani: Ina gubhapatisa ga Johane gwa guta khu evbi? Khu ga Nungungulu mwendro khu gwa vathu?” Aholu va di phela gu temarisana khu gyawe, khavo: “Ha gukhethu khu ga Nungungulu, a na, khuye: ‘Khu ginani mu ngamba khodwa gwaye?’ 26Gasi ha gukhethu: Khu gwa vathu, hi na wugedwa khu vathu, kholu vatshavbo va ngu muti Johane kha nga muprofeti nya gutale.” 27Khavbo avbo, va di mu hakha, khavo: “Ahati.” Uye nuye a di va hakha, khuye: “Eni neni kha nyi mi embelini umo nyi yi manago tshivba nya gugire esi!”

Gipimaniso nya sanana sivili

28“Nga wonani: Babe moyo a diri ni sanana sivili. A di ruma igyo nya guphele, khuye: ‘Mwanangu, indra gundze muhuno uya limela miuvha.’ 29Aholu igyo gi di hakha, khigyo: ‘Nyi wowe.’ Hwane nya gikhati gi di dzi laya, gi hongola. 30Na yede oyu nya wuvili aya mu ruma nuye, a di hakha, khuye: ‘Ina, nyi na hongola.’ Aholu kha nga hongola. 31Khu wevbini nya ava va vavili a nga girago guhaladza ga babe wule?” Va di hakha, khavo: “Khuye nya guphele.” Jesu a di va embela, khuye: “Khu lisine nyi ngu mi embelani, kheni: Vakhuphisi ni maphuphulu va na mi thangela Mufumoni wa Ndzadzini. 32#Wona gambe: Luk 4:12; 7:29-30. Kholu Johane dzude vbakari gwanu ata mi hevbudza ndzila nya gululame; kha mwa khodwa gwaye. Aholu vakhuphisi ni maphuphulu va khodwe gwaye. Na mu wonide esi, kha mwa dzi sodzisani, mu khodwa gwaye.”

Valimi nya sighevenga

(Marko 12:1-12; Luka 20:9-19)

33 # Wona gambe: Isa 5:1-2. “Yingisani gimbe gipimaniso: Babe moyo nya ndranga a di lima lithembwe, a yala miuvha, a gu bhiya, a gira gitshindro nya dziuvha ni gikoli nya gughadhe khavbo. Na vbedzide, a di li tshiyedza valimi a gu endra a hongola hwindzo. 34Na yi vbohide nango, a di rumela sithumi saye ga valimi vale, gasi guya hakha mihandro yi mu lumbago. 35Aholu valimi va di wugela sithumi sile: Va gu veta gimwegyo, va songa gimbe, va pfara gimbe khu siwindri: 36A di engedza gambe gu va rumela simbe sithumi nya singi guvbindra iso nya guphele; va di ya si gira idzosaye. 37Guhegisani a di va rumela mwanaye, na gu pimisa, kharati: ‘Va na ya ninga githawo mwamana wangu.’ 38Aholu valimi, na va wone mwamana waye, va di embeledzelana, khavo: ‘Khuye oyu a na gu tshalago ni thomba. Hongoleni hi mu songe, gasi hi na tshala nayo ethu.’ 39Va di mu pfinya, va hongola naye vbavbandze nya lithembwe vaya mu songa. 40Ina litshigu a na tago mune lithembwe, ginani a nata girago ga valimi vale?” 41Va di hakha, khavo: “A nata va songa vatshavbo, nyamba kanakana, a dzega lithembwe a tshiyedza vambe valimi avo va na mu ningago mihandro khu gikhati gi vbwetegago.” 42#Wona gambe: Dzind 118:22-23. Jesu a di va wudzisa, khuye: “Ina mu si hevbulini milowo, yi gu, khiyo:

‘Giwindri gi nga nyenywago khu vavbahi

khigyo gi khadego hungo nya gutshanganise,

Silo sesi si giridwe khu Pfhumu;

siliwugiso mahoni gwathu.’

43“Khu kharato, nyi ngu mi embelani, kheni: Mu na dzegedwani Mufumo wa Nungungulu wu ningedwa ga lihundzu li na gu thelago mihandro.

44[“Uye a na thegelago vbatshani nya giwindri gegi, a na pferuga a gu khala sipandryana, uye a na thegedwago khigyo, gi na mu kuya a gu khala kudzudzwane.”]

45Na va pwide sipimaniso saye, vakhongolo nya vaphasi nya mhamba ni vafarisi va di tugula gukhavo a gu thula avo. 46Va di vbweta lipindru nya gu mu mole, va li hamuga, kholu va di gu thava gidzemo gi nga bani gi muti kha nga muprofeti.

Currently Selected:

Matewu 21: BGG2014

Highlight

Copy