Matewu 18

Dzifanelo nya gubele mufumoni

(Marko 9:33-37; Luka 9:46-48)

1Khu gikhati gile gya gimwegyo, vapizane va di ya ga Jesu vaya mu wudzisa, khavo: “Khu mani a gu khongolo Mufumo wa Ndzadzini?” 2Uye a di rana gyanana a gi vega vbakari gwawe, khuye: 3“Khu lisine nyi ngu mi embelani, kheni: Mwa gumba vbindrugedza mu khala nga sanana, gima kha mu na bela Mufumoni wa Ndzadzini. 4Khu kharato, uye a dzi sodzisago kha nga gyanana gegi a na bani ari khongolo Mufumoni wa Ndzadzini. 5Uye a hakhago gyanana nya nga egi, khu lina langu, kheni a nyi hakhago.

Gikhunguvanyiso

(Marko 9:42-48; Luka 17:1-2)

6“Gasi uye a khunguvanyisago gimwegyo nya sanana sesi si khodwago gwangu, a diri tshukwana gu a hungwe thamoni giwindri nya gikhongolo nya gitshindro, a rinywa nondrwani nya yiphwa. 7Libango ga litigo khu kotani nya sikhunguvanyiso! Nyi ngu dziti nya gukheni iso si mwalo gu vhikedwa; aholu, libango li na ni wule a si vangago! 8#Wona gambe: Mat 5:30. Khu guralo, wa gu wona nya gukhuwe mandza yago mwendro ngondro wago si ngu gu tshunganisa, si pile u dzudzuga, kholu i tshukwana gu bela guvbanyani nya gupindruge nuri ni gimbobo mwendro na wu ndzodola, guvbindra gu rinywa niloni nya gupindruge nuri ni mandza ni migondro yago ya mivili. 9#Wona gambe: Mat 5:29. Wa gu wona gukhuwe liso lago li ngu gu tshunganisa, li duse u dzudzuga, kholu i tshukwana gu bela guvbanyani nya gupindruge nuri ni gidzogo, guvbindra gu rinywa niloni wa Ghehena nuri ni maho yago ya mavili. 10Dzi woneleni, mu nga nyenyini sanana sesi, ne gimwegyo, kholu nyi ngu mi embelani, kheni: Dzingilozi dzawe khu Ndzadzini gikhati gyatshavbo dza gu wona khovbe ya Babe wangu a guromo Ndzadzini. 11#Wona gambe: Luk 19:10. Kholu Mwamana wa Muthu a tede guta vbanyisa iso si nga bani si dzimede. 12Nga nyi embelani: Ina muthu a gu ni lizana dzinvuta, a gu dzimeledwa khu mweyo, kha ngu diga idzo nya livbandre na mana magumi ni livbandre na dzina mugigomoni, a gimbila a vbweta iyo yi nga dzimela, gani? 13Na yi mane, khu lisine nyi ngu mi embelani, kheni a ngu tsakiswa khiyo guvbindra dzile nya livbandre na mana magumi ni livbandre na dzina dzi ngamba dzimela. 14Kharati nuye Babe wanu a guromo Ndzadzini kha vbweti gukhuye ni gimwegyo nya sanana sesi gi dzimele.

Ndruye a ghohago

(Luka 17:3)

15“Wa gu wona gukhuwe ndriyago a gu ghohede, indra u ya mu kawuka na muri enu mwa vavili basi. A gu gu yingisa, u na bani u vbanyiside ndriyago. 16#Wona gambe: Dhet 17:6; 19:15. Aholu a gumba gu yingisa, dzega muthu moyo mwendro vathu vavili u hongola navo, gasi gu satshavbo si lamudwe khu vafakazi vavili mwendro vararu. 17A gumba va yingisa, mu ningele ga libandla; a gumba vbweta gu yingisa libandla, mu vege kha nga muhedheni mwendro kha nga mukhuphisi.

Gu dzumedzisa ni gu himbedzela

18 # Wona gambe: Mat 16:19; Joh 20:23. “Khu lisine nyi ngu mi embelani, kheni: Satshavbo mu no si hungago mafuni si na hungwa niyo Ndzadzini; niso mu na gu si tshulago mafuni si na tshudwa niyo Ndzadzini. 19Nyi ngu mi embelani gambe, kheni: Va gu tshangana vavili vanu, mafuni, gasi gu lomba gilogyo, va na ningwa khu Babe wangu a guromo Ndzadzini. 20Kholu avbo va manegago vavili mwendro vararu na va tshanganide, khu lina langu, eni nyi na bani nyi romo vbakari gwawe.”

Githumi nya monyo nya guvivbe

21Khavbo avbo, Pedro a di hidzimela ga Jesu a mu wudzisa, khuye: “Pfhumu, nya gu hosedwa khu ndriyangu, nyi na ni fanelo nya gu mu tsetselele nyondro ngani? Nyi na mu tsetselela kala livbandre na dzimbili dzinyondro, gani?” 22Jesu a di mu hakha, khuye: “Kha nyi gu embeli, kheni: Livbandre na dzimbili dzinyondro, aholu, livbandre na mavili magumi ma bweledzedwago livbandre na dzimbili dzinyondro. 23Khu kharato, Mufumo wa Ndzadzini wu ngu fananiswa ni mufumeli moyo a nga vbweta guti magimbidziselo nya thumo ga sithumi saye. 24Githumi a nga phelago khigyo gi diri ni mangava nya likhumi magumi mazana dzitaleta (10.000). 25Kha nga ulo a nga bani ari mwalo dzitsapawu nya gulivbe khidzo, pfhumu yile yi di ruma khiyo a rengiswe uye ni mwangadzi waye, ni sanana, ni thomba yaye yatshavbo, gasi gu mana iso nya gulivbe khiso mangava. 26Githumi gile gi di dzi thesa migondroni gwaye, gi mu lomba, khigyo: ‘Nyi dige nyi ya thuma, nyi nata gu livba mangava yatshavbo.’ 27Pfhumu yile yi di pwa gisiro, yi mu tsetselela mangava yatshavbo. 28Na dugide khu vbale, a di mana mungana waye a nga bani a mu fiyaride lizana dzitsapawu. A di mu dzwinya ngolo, a mu sokhovedza, na gukhuye: ‘Livba mangava yangu!’ 29Wule a di dzi thesa vbavbatshi, a mu lomba, khuye: ‘Nyi timisele, nyi na gu livba mangava yatshavbo.’ 30Aholu uye kha nga dzumela; a di mu khothela pasoni kala a gu livba mangava yatshavbo. 31Vangana vaye, na va wone esi, va di garadzega, vaya tivisa pfhumu yawe iso si nga giregago. 32Khavbo avbo, pfhumu yile, yi di mu ranisa yita mu embela, khiyo: ‘Githumi nya guvivbe! Nyi gu tsetselede mangava u nga bani uri nawo, kholu u nga nyi lombago. 33Ina khwa nga yela nuwe gutsetselela mungana wago kha nga eni nyi nga gu tsetselelago, gani?’ 34Pfhumu yaye, yi di garadzega, yi mu ningela ga vathangeli nya lipaso a khothedwa kala a gu livba mangava yatshavbo. 35Khidzo kharati a na gu mi girago Babe wangu a guromo Ndzadzini, muthu ni muthu a gumba tsetselela khu monyo nya wadi ndriyaye.”

Currently Selected:

Matewu 18: BGG2014

Highlight

Copy