Matewu 15

Tumbunugo nya Vajudha

(Marko 7:1-13)

1Khavbo avbo, vafarisi nya gukari ni vahevbudzi nya Nayo va nga bani va dzude khu Jerusalema, va dita ga Jesu vata mu wudzisa, khavo: 2“Khu ginani vapizane vago va si landrisigo tumbunugo wa gale, olu va hodzago nyamba hamba mandza?” 3Gasi Jesu a di va wudzisa, khuye: “Ahati enu, khu ginani mu si landrisigo nayo wa Nungungulu khu kotani nya tumbunugo wanu? 4Kholu, Nungungulu layide, khuye: ‘Rungudza babe ni mayi’, ni gukhuye: ‘Uye a hembululago babe waye, mwendro mayi waye, fanede gu songwa.’ 5Gasi enu mwari, khenu: ‘Ni wevbini uye a embelago babe waye, mwendro mayi waye, khuye: Iso nyi nga bani nyi fanede gu gu phasa khiso si phasedwe ga Nungungulu’, 6muthu yoyo tshulegide mahoni gwanu. Mwalo gambe giguruvedzo nya guphase babe mwendro mayi waye. Mu tshipisa, kharati, nayo wa Nungungulu khu kotani nya tumbunugo wanu. 7Vapfhadzi! Khidzo kharati a nga profetago khidzo Isaya na gu thula enu, khuye:

8Vathu vava va gu nyi rungudza khu likana,

aholu myonyo yawe yomo hwindzo ni eni.

9 # Wona gambe: Isa 29:13. Milombelo va nyi girelago khya malipha,

kholu milayo va hevbudzago khya vathu.”

Igyo gi nyenyezisago muthu

(Marko 7:14-23)

10Khavbo avbo, a di rana gidzemo, gasi gi hidzimele gwaye. A di gi embela, khuye: “Nyi yingiseni, gasi mu si pime gwadi. 11Khandri gile gi belago khu kanani gi nyenyezisago muthu, aholu igyo gi dugago khu kanani gwaye khigyo gi mu nyenyezisago.” 12Vapizane vaye va di mu yela vaya mu embela, khavo: “Ina u ngu dziti nya gukhuwe Vafarisi va gorogide khu maganelelo yale u nga ganelago khayo, gani?” 13Uye a di va hakha, khuye: “Simbo watshavbo wu ngamba yadwa khu Babe wangu a guromo Ndzadzini wu na sigudwa. 14Va digeni; sikhumu si vbwetago gu phara kunga sikhumu sikwawe! Kholu gikhumu gya guvbweta gu phara kunga gikhumu gikwawe, sa sivili si ngu ya thegela phalani.” 15Pedro a di khusa lito, khuye: “Hi tshamusele gipimaniso gegi.” 16Jesu a di mu hakha, khuye: “Gasi enu nenu mungari ni mihungo nya gulemele? 17Ina kha mu dziti nya gukhenu gyatshavbo igyo gi belago khu kanani gya gu hongola kala gisusuni, gi hegisa khu gu duga vbavbandze khu ndzila yaye, gani? 18Gasi gyatshavbo igyo gi dugago khu kanani gya guta khu monyoni; egi khigyo gi nyenyezisago muthu. 19Khu monyoni ma ngu duga mahingigedzo nya guvivbe, wughevenga, wubhayi, wuphuphulu, wuvafa, gusingedza ni magana yatshavbo nya guhembulule Nungungulu. 20Esi khiso si nyenyezisago muthu. Gasi gu hodza nyamba hamba mandza, isoso kha si nyenyezisi muthu.”

Gukhodwa ga nyamayi nya Mukhanani

(Marko 7:24-30)

21Jesu a di khuga khu vbale a gu hongola phuvbo ga Tiro ni Sidhoni. 22Khavbo avbo, nyamayi moyo nya mukhanani, a nga bani a guta khu phuvbo ga iyoyo, a di phela gu gulumela, khuye: “Pfhumu, Mwamana wa Dhavhidhe, nyi pwele wusiwana. Nyamahegyane wangu a ngu saniswa ngudzu khu liphuvbo nya guvivbe.” 23Aholu uye kha mu hakha gilo. Vapizane va di ya ga Jesu, vaya mu lomba, na va mu khongotela, khavo: “Mu embele, a hongole, kholu a ngu hi gulumela.” 24Uye a di va hakha, khuye: “Eni nyi di rumedwa guta vbanyisa basi dzinvuta dzi dzimedego dza Israyeli.” 25Aholu nyamayi wule a dita khidzima migondroni gwaye, khuye: “Nyi phase, Pfhumu.” 26Uye a di mu hakha, khuye: “Khandri gwadi gu dzega guhodza nya sanana u ninga simbwana.” 27Nyamayi a di khuye: “Khidzo u ganelago, Pfhumu. Aholu dziti nya gukhuwe simbwana si ngu roledzela dzitshetana dzi thegelago khu vbamezatunu ga vamune ndranga.” 28Khu kharato, Jesu a di mu hakha, khuye: “Nyamayi, gukhodwa gwago gukhongolo! Gu na girege kha nga guhaladza gwago.” Gukhugela gikhati gile nyamahegyane waye a di hawuluga.

Jesu a ngu hawulugisa vathu nya vangi

29Na khugide khu vbale, Jesu a di hongola vbafuvbi ni phwani gwa Galileya, a gwela gigomoni aya khala iyo. 30A di tedwa khu vathu nya vangi ngudzu, va mu resela sikhurubwa, silima, sikhumu, sidudu ni vambe vadwali, va ta va vega migondroni gwaye. Uye a di va hawulugisa vatshavbo. 31Vathu vale va di liwuga khu gu wona sidudu na si gu ganela, silima na si gu gimbila gwadi na si lulamide, sikhurubwa na si gimbila, sikhumu na si gu wona. Va di dhumisa Nungungulu wa Israyeli.

Jesu a ngu hodzisa magumana mazana vathu

(Marko 8:1-10)

32Jesu, na ranide vapizane vaye, a di va embela, khuye: “Nyi ngu pwa gisiro khu vathu vava, kholu va na ni matshigu mararu na nyiri navo, nyamba hodza gilo. Kha nyi vbweti gu va diga va hongola nyamba hodza gilo, va nga rereka ndzilani.” 33Vapizane va di mu phindrula, khavo: “Hi na va ninga ginani va hodza giwulani momu nyambana ndranga, olu a gu vathu va tadego kharati?” 34Jesu a di va wudzisa, khuye: “Sibaba singani mu gu naso?” Va di hakha, khavo: “Livbandre na sivili, ni sindzandzyanyana sidugwana.” 35A di ruma vathu vatshavbo va khala vbavbatshi, 36a dzega sibaba sile nya livbandre na sivili ni sindzandzyana sakone, a bonga, a si pilela, a si ningela ga vapizane, vapizane va si kabanisela vathu. 37Vatshavbo va di hodza, va khura, va bwelo khavbo va rolela iso si nga tshalago, va gu tadza livbandre na sivili situndru khu sipandre si nga tshalago. 38Avo va nga hodzago va diri tengo nya magumana mazana (4.000) vathu, nyamba sayela vanyamayi ni sanana. 39Na vbanganide gidzemo, Jesu a di bela ngalavani a gu hongola tigoni ga Magadhani.

Currently Selected:

Matewu 15: BGG2014

Highlight

Copy