2 Makabhewu 9
9
Gufa gwa Antiyoko Epifaniyo
(1 Makabhewu 6:1-17; 2 Makabhewu 1:11-17)
1Khu gikhati gegi gya gimwegyo, Antiyoko a di gu wuya khu mayigoni ya Perisiya, na tade khu dzitshoni nya dzikhongolo, kholu, 2na bede khu dhoropani ga Perisepoli, ni gikungo nya guye phanga nyumba ya nungungulu, ni gu wandra lidhoropa, vathu va di mu wugela, va gu phara matshari va dzi vhikela. Khavbo avbo, Antiyoko a di gurumedzwa khu vavbanyi va tigoni momo gu bwelela hwane na tshisidwe vbavbatshi. 3Na romo vbafuvbi ni lidhoropa la Ekibhatana, a di tiviswa gupadwa ga Nikanori ni masotshwa ya Thimoti. 4Na khondride khu likhulo, Antiyoko a di pimisa khu guvbiredza gu tshikulela Vajudha, a dzi phodzela khu guvivba gwatshavbo a nga giredwago khu avo va nga mu gurumedza gu thava. Khu guralo, a di ruma mugimbidzisi nya kareta yaye, gu simama aya mbeli nyamba ema, gasi gu kodza gu gira khu guvbiredza iso a nga bani a gu si vbweta; khu lisine, gulamula gwa Ndzadzini gu di bani gu mu thegede vbatshani gwaye. Wupumbuni nya matshandza yaye a di bani a ganede gukhuye: “Avbo, nyi na ya vbohago, nyi na ya vbindrugedza Jerusalema gu khala lithowo nya Vajudha.” 5Aholu Pfhumu, Nungungulu wa Israyeli, a wonago satshavbo, a di mu bayisa khu ngumbe nyamba hawuluga.
Me ni gu vbedza gu ganela magana yaya, a di phela gu tshaniswa khu guvbisa nya gukhongolo nya mahembe ni gu payapaya nya gukhongolo ndrani. 6#Wona gambe: Mith 12:23. Khu lisine, yi di gu mu yela tshanisa yoyo, kholu a nuye kamwe a di gu pferula mahembe ya vathu vakwawe khu dzitshanisa nya guthise a nga bani a dzi gira. 7Ambari ulo, kha nga vbungula wupumbu waye, na tade khu matshandza, a di rinyela Vajudha nilo nya likhulo laye, a di ruma gu vhulela kareta khu guvbiredza. Khavbo avbo, a di thega khu karetani gwaye, yi nga bani yi tutuma khu tshivba ni tshivba, a gu fanyelegela sivbango saye satshavbo. 8Mwama wule, gikhatinyana hwane, muwupumbuni gwaye a nga bani a gu dzi pimisa gukhuye a na ni tshivba nya gurume mavimbi ya linene ni gu pima gulemela nya sigomo gikaloni gwaye, olu, na ghwimbidwe mafuni, a di rwadwa khu lithatho, gu wonegiswa gwadi mahoni ga vatshavbo tshivba ya Nungungulu. 9Gu di vboha avbo nya gu khu mahoni gwaye gu duga siwungu. Na nga gu vbanya, a di tshaniswa khu wuvi nya wukhongolo ngudzu, givili gya muthu nya guvivbedwe khu monyo gi di dugela siwungu ni nyama yaye yi di gu thegelela khu sitsuwu. Lizumboni gwatshavbo va di si vbweti gilo gambe khu gununga nya guhine gwaye. 10Wule gikhatinyana hwane, a nga bani a gu lora na gu kuha dzinyeledzi dza ndzadzini khu mandza yaye, olu mwalo muthu a mu tiyelago gu mu vbohela vbafuvbi, khu kotani nya gununge nya mili waye!
11Na tshisidwe vbavbatshi matshandzani gwaye nya makhongolo ngudzu, na gu pwiswa wuvi nya wukhongolo khu Nungungulu, Antiyoko a di vbedza gu dzi gugumugisa gwaye, a phela gu pima lisine nya makhalelo yaye khu gu gurumedzwa khu dzimboma dza Nungungulu. 12#Wona gambe: Job 38:8-11; Dzind 40:12; 65:7-8; 61:1-5. Na si dzi kodzi gu timisela gununga nya gihema gyaye, a di ganela, khuye: “Gu na ni lisine gu dzi vega vbavbatshi ga Nungungulu, kholu muthu nya nyalidede a emedwego khu lufu, kha dzi kodzi gu dzi dinganisa ni Nungungulu.” 13Muthu wule nya guvivbedwe khu monyo, a nga bani a vbindredwe khu gikhati nya gupwedwe wusiwana khu Pfhumu, a di lombelela ga Nungungulu. Uye a nga bani a si vbweti ni gu hakha wuhindzi waye, a di tumbisa gukhuye, 14a na tshula lidhoropa nya gukatege, a nga bani a li yela khu gikungo nya guya bela a li khungumula ni gu li gira lithowo. 15A di ganela gambe khuye a na va ninga wuzundzo nya idzosaye ni vathu va Atena. Vatshavbo Vajudha vale a nga a va wona vari mwalo fanelo nya guningwe lithowo, aholu na vari ni fanelo basi nya gudzudzugwe, gumogo ni sanana sawe, va khala guhodza nya sinyoni ni sirengo sa khabini. 16Nyumba ya Nungungulu, gale a nga yi phangago ni gu yi nyenyezisa, olu a gu tumbisa gu yi mburisela khu siningwa nya lisima, ni gu yi bweledzela nyaluphye mikanvu nya guage, bwelo khavbo a engedzela yimbe nya wumburi , ni gu livbela khu gyuma gyaye satshavbo si vbwetegago umo nya miphaso. 17Gu diga nya isoso, uye mune furi a di sambanya gukhuye a na dzi vbindrugedza a gu khala Mujudha, a gimbilagimbila malangani gu vbanyago vathu, gasi gu huwelela tshivba ni wudhumo wa Nungungulu!
Lidangalila la Antiyoko na gu lovela Vajudha
18Aholu wuvi waye wu di si vbindri, kholu a di lemedwa khu tsayiso nya gululame gwa Nungungulu. Khavbo avbo, na luzide gutumba gwatshavbo, a di lovela lidangalila Vajudha, kha nga gu lomba, li di ganela, kharati:
19“Ga Vajudha nya wuzundzo, eni Antiyoko, mufumeli ni muthangeli nya masotshwa nyi ngu mi suvela womi ni gukhadzisega ni gutsaka. 20Mwa gu vbanya nyadzadi, enu gumogo ni sanana sanu, ni gu silo sanu satshavbo si mi dugela gwadi kha nga idzo mu dzinago khidzo, nyi ngu bonga Nungungulu, nyi vegago gwaye gutumba gwangu gwatshavbo. 21Eni olu nyi thegidego vbavbatshi khu madwali, nyi ngu alakanya khu gutsaka lihaladzo lanu ni githawo ni wuwadi mu nyi girelago gikhati gyatshavbo. Na nyi gu wuya khu Perisiya, nyi di manwa khu madwali nya guthise, nyi pimiside gukheni gwadi nyi khathalela gusayisega ga vatshavbo. 22Sigaradzo nyi gu naso kha si vbedzi gutumba gwangu, kholu nyi ngu tumba ni gu tiya gukheni nyi na hawuluga madwali yaya. 23Aholu, nyi ngu dundruga gukheni babe wangu gikhati gyatshavbo a nga bani na gu duga khu nyimbi a gu gwela sigomoni ga Perisiya, a di emisa muthu nya gutshale a mu tshikedza. 24Khu gu gira kharato, a di vbweta gukhuye ya gu tshuka yi manega mhango, mwendro gu pwala mahungu nya guvivbe, vathu va tigoni va si khunguvanyegi, kholu gu bani va tivisidwe khu gale, va khala na va gu muti oyu a tshidwego ni ndronga nya wufumu. 25Vbavbandze nya isoso, eni nyi ngu dziti gukheni dzindruna dzi nyi randrelago ni vafumeli nya vaakelane nya mufumo wangu vomo va lindrela gikhati nya gyadi gasi guti ginani gi na gu dugelelago.
Khu guralo, nyi emiside mwamana wangu Antiyoko,#9:25 Avba gu thudwa Antiyoko IV (Antiyoko nya wu na), a ranwago pwani Ewupatori. uye, simbe sikhati nyi mu tumbisidego ni gu mu leletela ga enu nya vangi, gikhati hi nga bani hi khuga hi hongola ga simbe sipandrengulu nya sikhongolo sa sigomoni. Nyi mu lovede lidangalila li landrelago khu vbavbatshi.#9:25 Avba mulovi kha namega lidangalila a li thulago, gukhwatshi kha nga li mana. 26Khu guralo, nyi ngu mi lombani gukheni mu alakanye, mu si divaledwi khu esi nya sadi nyi mi giredego, enu mwatshavbo khu gumogo, ni ga moyo ni moyo, sayisani gwadi gyanana gyangu, wonegisani gwaye monyo nya wuhindzi kha nga idzo mu nga bani mu gira gwangu. 27“Nyi ngu khodwa gukheni uye a na landrisa misuvo yangu, a na thuma nanu khu guti ni mapimo.”
28Khu guhegisa, mwama yoyu nya gighevenga ni muvali wa Nungungulu, na bayisedwe gufa, kha nga idzo a nga girago ga vambe vathu nya vangi, a nuye a diya vbeledwa khu womi waye musigomoni nya litigo nya valombo, a gufa khu mafelo nya dzitshoni. 29Filipi, pari yaye gukhugela wudzahani gwaye, a di dzega girumbi gyaye aya dzinga; aholu khu guthava mwamana wa Antiyoko, a di khuga a hongola ga Pitolomewu Filometori, tigoni ga Egipito.
Currently Selected:
2 Makabhewu 9: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.