2 Makabhewu 8
8
II. WUWUGELI WA VA NA MAKABHEWU
(8:1—10:8)
Judha Makabhewu a ngu tshanganisa vathu gasi gu dzi dwanela
(1 Makabhewu 3:38—4:27)
1Khu matshigu yoyo, Judha a ranwago pwani Makabhewu, gumogo ni vabangaladzi vaye, va di bela mitalalani khu gisihaledza, va gu ramba valongo vawe gumogo ni avo va nga bani va simama gutumbega ga tumbunugo nya nayo nya Gijudha, va tshanganisa tsawa nya gipimo nya livbandre na limwedo magumi mazana (6.000) vama. 2Va di gu lomba ga Pfhumu gasi a wone vathu va nyenywago khu vatshavbo, a pwe wusiwana khu Nyumba ya Nungungulu yi nyenyezisidwego khu vathu nya guvivbedwe khu myonyo, 3ni gu a pwela gisiro lidhoropa li khungumudwego li guromo vbafuvbi ni gu hadza gu khala marumbi nya guvbelele, a pwe lito nya novba wu vbaladzidwego wu nga bani wu mu rana, 4a alakanye gu songwa nya guthise nya madzaha nyambana nandru ni gu a phodze sipoyilo si giredwego lina laye.
5Judha Makabhewu a di khala muthangeli nya masotshwa yaye, ni va nya mayigo va di dzi wona na vari mwalo maningano nya gu dzi kodze gu mu dwanisa, kholu likhulo la Nungungulu li di vbindrugedzide li gu khala wuhindzi. 6A di gu dhumela khu githugedza madhoropa ni mitalala ni gu ma vbisa; a di gu wandra malanga nya gukhalege gwadi, a di gu pala ni gu tutumisa valala nya vangi. 7A di hatha ngudzungudzu gikhati nya wutshigu gasi gu gira dzinyimbi dzedzi, ndruma nya wungwazi waye yi di gu pwala maphuvbo yatshavbo.
Gupadwa ga Nikanori ni Gorigiya
(1 Makabhewu 3:38—4:27)
8 # Wona gambe: Eks 12:23; 2 Sam 24:15-16; 2 Dzipf 19:35; 1 Mak 1:38—4:58; Dzind 20:8. Filipi,#8:8 Filipi, a diri mwamangulu wa Jerusalema. khu gu wona gukhuye litshigu ni litshigu li gyago, Judha a gu engedzela gu mana tshivba ni gupala gikhati gyatshavbo, a di lovela lidangalila Pitolomewu, mwamangulu wa Kelesiriya ni Finisiya, a mu lomba gu ate a ta phasedzela gu vhikela esi si lumbago mufumeli. 9Uye, khu guvbiredza a di hatha Nikanori, mwamana wa Patrokolo, moyo nya dzipari nya guhegule dza mufumeli, a mu rumela Judheya ni magumavili magumi mazana (20.000) vama nya gute khu mayigoni gwatshavbo gasi gu ya mbembisa lifumbu latshavbo nya Vajudha. Gorigiya nuye, mwama a vidzidwego khu mithumo ya dzinyimbi a di hongola aya dzi pata gwaye. 10Nikanori a di gu lirela gu mana tengo nya magumavili mazana (2.000) dzitaleta nya gulivbe mangava nya khupo wa mufumeli ga Varoma, khu gu rengisela sibotshwa nya Vajudha va nga hadza gu modwa litungani. 11Kharati, a di rumela myango khu guvbiredza, ga madhoropa ya vbafuvbi ni yiphwa, a va ramba guta renga Vajudha, a gu tumbisa gu va ninga livbandre na mana magumi (90) dzikhumbi khu talenta mweyo. Kha nga alakanya gukhuye tsayiso ya Mune nya Tshivba Yatshavbo yi na thegela vbatshani gwaye.
12Gikhati Judha a embedwego gupwani Nikanori a nguta, a di tivisa mahungu yaya ga Vajudha, a nga bani ari navo. 13Avbo va pwidego gupwani nala a ngu hidzimela, vambe khu gumba tumba wulamuli wa Nungungulu, va di thava va phalalega, 14vambe, va di rengisa iso si nga bani si va tshalede, na va gu lomba ga Pfhumu gukhavo a va vbulugise ga Nikanori, mwama nya guvivbedwe khu monyo a nga bani a va rengiside khu gale, na si gu va mani mandzani gwaye. 15A gumba dzina gu gira esi kotani gwawe, i tshukwana basi a va vbulugise khu kotani nya gidzumeledzwano a giridego ni vakokwe vawe, ni gualakanya lina laye nya guage ni wuzundzo va li ranago.
16Khavbo avbo, Makabhewu a di tombanisa masotshwa yaye ma mu randrela, gipimo nya livbandre na limwedo magumi mazana (6.000), a va embela gukhuye va si dzi digi va thavisedwa khu valala, ambari gu thava gidzemo nya mahedheni gitago gi ta va dwanisa nyambana nandru, gasi va dwane khu tshivba ni tshivba; 17va alakanye guvivba nya gunyenyeze gu giridwego khu avo ga Nyumba ya Nungungulu, ni lidhoropa va nga li tshisa vbavbatshi, va li khungumulela, ni gu tshipisa tumbunugo nya milayo ya vakokwe vawe. 18A di ganela, khuye: Vathu vava, va gu tumba matshari yawe ni tshivba yawe, aholu, ethu ha gu vega gutumba gwathu mandzani gwa Nungungulu nya Tshivba Yatshavbo, a kodzago gu phalalegisa avo va hi dhumelago ambari ni sivangwa satshavbo, khu gu khweneta basi. 19Judha a di va dundrugisa thumo nya guliwugise a wu giridego Nungungulu ga vakokwe vawe gasi gu vhikela vathu vaye; a di va ninga giwonelo khu esi si dugeledego matshiguni ya Senakerebhi, gikhati va nga songwago lizana ni livbandre na mararu magumi ni livbandre mazana (185.000) vadwani nya nyimbi, 20ni esi si nga dugelelago tigoni ga Bhabhiloni, litunga nya gudwane ni vagalatiya, avbo livbandre na mararu magumi mazana (8,000) Vajudha va nga dwanago na va patane ni magumana mazana nya (4.000) Vamasedhoniya. Kha nga olu Vamasedhoniya va nga manago sigaradzo nya sikhongolo, vale nya livbandre na mararu magumi mazana (8.000) nya Vajudha va di songa lizana ni magumavili magumi mazana (120.000) ya valala, khu giphaso va gi manidego khu Ndzadzini, va di mana dzithomba nya dzingi.
21Hwane nya gu na tiyisede vabangaladzi vaye ni gu va tangadzisa, a va dongisela gu va songwe khu kotani nya milayo ni gufela litigo lawe, a di kabanisa masotshwa khu mitsawa mina, 22a vega vandriyaye vararu, Simoni, Josefa ni Jonatane, moyo ni moyo a thangela tsawa nya likhumi na livbandre mazana (1.500) vama. 23A di ruma Eleyazari gu hevbula libhuku nya guage, a gu va ninga khu magana nya litunga “Giphaso gya Nungungulu,” uye mune kamwe a di thanga mbeli nya tsawa nya guphele a thonona gu dhumela Nikanori. 24Khu guralo, khu tshivba nya giphaso gya mune nya Tshivba Yatshavbo, va di songa guvbindra livbandre na mana magumi mazana (9.000) valala, va di bayisa ni gu pilela sivbango masotshwa nya mangi ya Nikanori, ma nga thavago. 25Va di wandra dzitsapawu dza avo va nga bani va dzude gu ta va renga. Va di lundra valala gikhati nya gulaphe, aholu va di vbeledwa khu tshivba khu gu kenelela nya gikhati.
26A diri gikhati nya gudongisele Sabhadho, khu kotani nya isoso, va di diga gu va lundra. 27Va di rolela matshari ni silo nya guphangwe sa valala. Va di gira buzo nya Sabhadho na va gu bonga Pfhumu ni gu mu rungudza kholu a nga va vbulugisa litshigu lile, a nga phela gu va yeyedza wuhindzi waye. 28Na yi vbindride Sabhadho, va di ningela gipandre nya sile va nga wandra nyimbitunu ga vale va nga bani va tshanisekide khu gu tutumiswa, ga dzinoni ni sigulungu, esi si nga tshalago va di kabana khu gyawe, gumogo ni sanana sawe. 29Na va vbedzide gu gira esi, va di lombelela gumogo, ni gu lila ga Pfhumu nya wuhindzi gukhavo a wuyelelane khu guvbelela ni sithumi saye.
Gupadwa ga Thimoti ni Bhakidhe
30Ga dzinyimbi va dwanidego ni masotshwa ya Thimoti ni ya Bhakidhe, va songide guvbindra magumavili magumi mazana (20.000) vama, va wandride, va gu khala vamune nya guvbelele nya makhokhola nya mangi nya gubhiywe ni silo nya singi nya guphangwe nyimbitunu, va nga si kabanisa khu sipandre sivili nya gufanane: Gimwegyo gi lumba avo vamune kamwe, gimbe gi lumba vale va lundridwego, dzinoni, sigulungu ni sikhosane. 31Matshari ma roledwego, ma di ya vegwa wulangani nya gusayisege, silo si nga tshalago nya esi va nga phangago nyimbitunu, si di dzegwa si yiswa Jerusalema. 32Va di songa muthangeli nya dzighadhi dza Thimoti, moyo nya vama nya guvivbedwe ngudzu khu monyo, a nga girago guvivba nya gungi ngudzu ga Vajudha.
33Gikhati va nga bani va gira mibuzo nya gupale tigoni gwa Jerusalema va di vbisa Kalisiteni gumogo ni avo va nga vbisago malimba nya Nyumba ya Nungungulu, va nga bani va thavede ga ginyumbana gimwegyo, va gu hakhiswa kharato tsayiso wu yelanago ni mithumo yawe nya guvivbe ni gumba thava sombo nya wukhodwa. 34Nikanori, muthu nya guvivbedwe khu monyo, a nga rumelago guta mazanazana nya varengi, gasi guta va rengisela Vajudha kha nga dzikhumbi. 35Na tshisidwe vbavbatshi khu vale a nga bani a si va woni vari va gilo, aholu va nga ningwa tshivba nya giphaso gya Pfhumu, a di dzi tshulela guambala gwaye nya wufumu, a gu tsemakanya, ekha, litigo latshavbo kha nga moyo a thavago, kala guya vboha Antiyokiya, na vbede tshivba, na tade khu dzitshoni khu kotani nya guluze masotshwa yaye. 36Wule, guhegulani a nga bani a tumbiside gu livba khupo khu dzitsapawu nya gurengise sibotshwa sa Jerusalema, olu a gu ganela gukhuye Vajudha va na ni Muvhikeli nya tshivba, khu kotani nya isoso, va khade va nya dzitshivba kholu va gu landrisa milayo yi hungidwego khu Uye.
Currently Selected:
2 Makabhewu 8: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.