2 Makabhewu 13
13
Lisiya a ngu rumela gambe masotshwa
1Khu mwaga nya lizana ni magumana na livbandre na mina (149), avo nya tsawa wa Judha va di tugula gukhavo Antiyoko Ewupatori a di gu hongola ni masotshwa nya mangi gu ya dhumela Judheya, 2na gu bangaladzwa khu Lisiya, mupharedzeli waye ni muthangeli nya mufumo. Moyo ni moyo a di gu thangela masotshwa nya Vagereki, khu tengo nya lizana ni likhumi magumi mazana (110.000) va nya gugimbila khu migondro, livbandre magumi ni mazana mararu (5.300) vakhileli nya dzikavalu, magumavili na dzimbili (22) dzindzofu ni mazana mararu (300) dzikareta nya nyimbi na dzi thedzedwe sivbwero nya guvbire. 3Menelawu nuye a diya dzi pata gwawe, khu mano nya makhongolo, a di laya Antiyoko, nasiri khu gikungo nya guvbanyise litigo laye, aholu na gu lindrela gu tiyiswa vbawufumutunu. 4Aholu, Mufumeli nya vafumeli a di khondrisa likhulo la Antiyoko, a wugela gighevenga gegi, gi nga thuledzwago khu Lisiya gupwani khigyo givangelo nya guvivbe gwatshavbo gu manegago. Mufumeli a di ruma gukhuye va mu dzege a yiswe Bhereya gasi guya songwa gukhedza khu giolovedzo gya tigoni momo. 5Kholu dhoropani momo gu di romo langwe nya livbandre magumi mikono (50), na yi tade khu nguma, na yiri ni gitshindro nya gudzundrulugele gi wegelela ngumani maphuvbo yatshavbo. 6Khu igyo, a di rinywa ngumani muthu wule a gu ni nandru nya gube sombo nya miphaso mwendro ni gu gira wumbe wughevenga nya guthise. Va di redwa va ya fela ngumani. 7Khavbo vbale, wulangani nya sitshaniso a fudego avbo Menelawu nya guvivbedwe khu monyo, nyamba ningwa lithowo. 8Esi si lulamide, si na ni fanelo, kholu uye giride sighoho nya singi a ghohela giluvelo, gi gu na ni nilo ni nguma wu agisidwego. Khu kotani nya isoso, manide tsayiso nya gufele ngumani.#13:8 Tsayiso nya gufele ngumani, a diri tsayiso yi nga bani yi thumiswa ngudzu khu Vaperisiya gasi gu songa vale va nga bani va gira guvivba nya gukhongolo ngudzu. Va di rinywa ngumani nya wungi vafa umo hwane nya gutshaniseke ni wuvi nya wukhongolo ngudzu. Khidzo kharato Menelawu a nga lamuledwa gu songwa khidzo khu kotani nya guvivbe nya gukhongolo ngudzu a nga girelago vathu va Nungungulu, a di bweledzedwa gukhedza khu pimo nya guvive a giridego. Wona gambe: Guti 16:1.
Nombelo ni gupala ga Vajudha
9Khu vbale, mufumeli a di simama ni ndzila yaye, na gu pimisela makungo nya guvivbe ngudzu, nya gutshanise Vajudha khu sitsayiso nya guthise ngudzu guvbindra esi si nga girwago khu babe waye. 10Na sitide esi, Judha a di ruma vathu vaye gukhuye va lombe ga Pfhumu, wutshigu ni mihani, gasi ata va phasedzela, ngudzungudzu ga gikhati nya nga egi va guromo vbakari nya sigaradzo nya sikhongolo, va wonago mhango nya guluze nayo, litigo ni Nyumba nya Guage ya Nungungulu. 11Va di mu lomba gukhavo a si dzumedzisi gukhuye vathu a nga va tshulago matshigwana hwane, va bwelele nyaluphye gukhoziswani khu mayigo nyambana nayo. 12Va di gira milombelo vatshavbo gumogo, va lomba wuhindzi ga Pfhumu, vbakari nya marongo ni guhala na va khidzimide va kuha vbavbatshi khu khovbe gipimo nya matshigu mararu nya gulandrelane. Judha a di va laya gukhuye va khale na va dzi dongisede. 13Hwane nya gu na va wudziside madhota, va di vega gukhavo va si lindreli gu kala masotshwa ya mufumeli ma bela Judheya, ma wandra lidhoropa, aholu va duge khu guvbiredza va dwana litunga, nyamba kanakana khu giphaso gya Nungungulu. 14Khu magirelo yoyo, a di vega gudugelela nya matshari mandzani ga Muvangi nya litigo latshavbo, a gu tiyisela masotshwa yaye, a ma kutsedzela gu dwana na ma tiyide kala gufa khu gu vhikela milayo, ni Nyumba ya Nungungulu, lidhoropa, litigo ni vathu. A di gimbidzisa masotshwa yaye ma ya zumba vbafuvbi ni Modhini. 15Hwane nya gu na embede masotshwa yaye magana nya gu ma tiyisele, khuye: “Gupala gwa guta khu ga Nungungulu,” a di dzega madzaha nya gutimisele ngudzu vbakari nya masotshwa yaye, a gu ya dhumela lizumbo la mufumeli ni wutshigu, a gu songa gipimo nya magumavili mazana (2.000) vama ni dzindzofu nya dzingi ni vadwani nya nyimbi va nga bani va khilede vbatshani nya idzo. 16Khu guhegisa, va di swaya hwanga ni pfilupfilu livalani, va khuga va hongola na va pade. 17Gukhugani nya lidambo, satshavbo si di vbede, khu tshivba nya wuvhikeli wa Nungungulu a ngata phasa Judha.
Antiyoko a ngu gira pwanano nya gurule ni Vajudha
18Mufumeli, khu gu wona gikanya nya Vajudha a di zama gu wandra makhokhola khu mano. 19A di khuga gasi gu ya randrela Bheti-Suri, likhokhola nya tshivba la Vajudha, aholu va di engedza gu padwa, va bweledzwa hwane, va dzipwa na va gu vbeledwa khu tshivba. 20Judha a di mana ndzila nya guvbohise ga avo va nga bani va randredwe, satshavbo esi si vbwetegago. 21Rodhoko, mudwani wa tsawani nya masotshwa ya Vajudha, a di ya embeledzela valala sihalo nya wuvhikeli wa Vajudha. Aholu na tugudwe, a di modwa aya thedwa pasoni. 22Mufumeli a di engedza gambe nya wuvili, gu tshangana khu mabhulo ni vathu va Bheti-Suri. A di hunga navo pwanano nya gurule, a khuga a hongola, aya dhumela masotshwa ya Judha, aholu a di padwa. 23Khavbo avbo, a di dziti nya gukhuye Filipi a nga mu tshiyago Antiyokiya kha nga muthangeli nya thumo nya wugwewo nya mufumo, a di gu mu wugela, a dipwa wuvi ni marongo. A di ramba Vajudha a va ninga mawonelo yaye nya gugire navo pwanano nya gurule, a va lomba gukhuye va dzumele. A di sambanya gukhuye a na landrisa satshavbo esi va na hungago khu pwanano. Na va giride gidzumeledzwano, uye a di gira phaso nya mhamba, a ningela sihiwa Nyumbani ya Nungungulu ni gu dzi yeyedza wuwadi ga Wulanga nya Guage. 24A di hakha Makabhewu khu ligolo, a gu vega Hegemonidhe gu khala ndruna ni mwamangulu nya gipandre gi khugelago Pitolemayidha kala tigoni ga Vagerenu. 25Aholu, gikhati mufumeli a vbohidego Pitolemayidha, a diya mana vathu na va gorogide, kholu va di si tsaki khu gidzumeledzwano gegi. Na va khuvekide va di vbweta gu tshipisa milayo nya pwanano wu hungidwego. 26Khu guralo, Lisiya a di lita wulangani nya gukhugege, gu ganeledwago avbo milayo, a gu vhikela pwanano khu edzi a dzi kodzidego khidzo. A di tangadzisa ni gu rudzisa vathu, a va wuyisela ga mapimo nya yadi. Khu hwane a di bwelela Antiyokiya. Gu giregide kharato gudhumela ni gubwelela hwane ga mufumeli.
Currently Selected:
2 Makabhewu 13: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.