2 Makabhewu 12
12
Judha a ngu pala mayigo nya vaakelane
(1 Makabhewu 5:9-34)
1Na va vbedzide gu gira sidzumeledzwano sesi, Lisiya a di wuya ga mufumeli. Vajudha va di dzi ningedzela mithumoni ya marembweni gwawe. 2Aholu vathangeli nya masotshwa ya malanga yoyo, nya nga Thimoti, Apoloniyo, mwamana wa Genewu, Jeronimo ni Dhemofonti gumogo ni Nikanori muthangeli wa vathu va Kipra, va di si va digi va mana gurula ni guhefemula. 3Khu limbe liphuvbo, vathu va vbanyago dhoropani ga Dzope va di gira ndrwadza yeyi nya yikhongolo: Va di ramba vaakelane vawe nya Vajudha, gasi va bela gumogo ni vagadzi vawe ni sanana mudzingalavani dzi nga bani dzi dongisedwe khu avo, va yeyedza gukhwatshi wu mwalo wulala vbakari gwawe. 4Va giride esi khu gu landrisa pwanano va nga bani va wu hungide dhoropani. Vajudha, nyamba pimisa gilo, va di dzumela, gasi gu yeyedza gukhavo va gu vbweta gu vbanya navo khu gurula nyamba thava gilo. Aholu, na va vbohide vbakari nya nondrwa, va di va dzamisa, khu sayo nya guenele mazana mavili (200) vathu.
5Gikhati Judha a wu tidego wughevenga wu giridwego ga vathu va tigoni gwaye, a di ramba masotshwa yaye. 6Hwane nya gu na va giride nombelo ga Nungungulu Mulamuli nya gululame, va di hongola gu ya dwana ni sighevenga si nga songago vandriyaye, ni wutshigu a di vbisa lisiwo, a gu khondrisa dzingalava dzi nga bani dzi romo vbale, a gu songetela khu litshari avo va ga bani va thavede vbale. 7Kha nga olu lidhoropa li nga bani li segidwe, a di ndreya hwindzo, aholu ni mapimo nya guwuye a ta mbembisa vavbanyi va dhoropani ga Dzope. 8Na tivisidwe gupwani vavbanyi va dhoropani ga Jaminiya va di gu vbweta navo gu songa khu magirelo ya mamowo Vajudha va nga bani va gu vbanya navo, 9a di va dhumela ni wutshigu wowo, a gu vbisa lisiwo ni dzingalava. Gudzura nya nilo wakone gu di wonega gukhugela Jerusalema, gu manegelago gipimo nya mazana mavili ni magumana (240) mipfhuka.#12:9 240 Mipfhuka yi ranwago pwani estadhiyu, gu ningana gipimo nya 45Km.
Litunga nya gudwane ni Thimoti
10Na gimbide gipimo nya livbandre na mina mipfhuka,#12:10 gu ningana 1Km na gu lundra Thimoti, a di dhumedwa khu Vaarabhi na vari khu tengo nya livbandre magumi mazana (5.000) masotshwa nya gugimbile khu mawundru ni livbandre mazana (500) vakhileli nya dzikavalu. 11Gu di dwanwa litunga nya likhongolo, aholu khu giphaso gya Nungungulu, masotshwa ya Judha ma di va pala, na va sudwe Vaarabhi, va di lomba gurula, va tumbisa gu ninga tshambi Vajudha ni gu va phasa khu satshavbo. 12Nari ni gitumbo nya gukhuye, khu lisine, avo va ngu dzi kodza gu khala giphaso gwaye, Judha a di va ninga gurula, na va hungide pwanano wowu, va di bwelela mitshatshani gwawe. 13Khu hwane nya esi, Judha a di wugela lidhoropa limwedo nya tshivba li ranwago pwani Kasipini, li bhiyidwego khu makhokhola, gu vbanya umo mafumbu nya vathu nya guhambanelane. 14Na va gu tumba gutiya nya mabhiyo yawe ni talo nya guhodza va nga bani va hengeledzede ndrani nya libhiyo, avo va randredwego va di gorosela ngudzu masotshwa ya Judha va gu rinya sipoyilo nya guvale ni magana nya guvivbe. 15Avo va Judha, va di rana Nungungulu, Pfhumu nya yikhongolo ya tigoni, uye matshiguni ya Josuwa a nga khungumulago mabhiyo ya Jeriko, nyambana mitshizelo mwendro makina nya nyimbi, va di dhumela khu kanu makhokhola. 16Na va khade vamune lidhoropa, khu gugola ga Nungungulu, va di gira thumo nya gusongetele, nyamba kodza gu wu ganela, gu nga vboha avbo nya gu litshiva la vbafuvbyana mule, li nga bani liri ni pimo nya mipfhuka mivili guanama, li wonega gukhwatshi li di tala khu novba wu nga vbaladzwago.
17Hwane nya gu na va gimbide livbandre na mavili mazana ni livbandre magumi (750) mipfhuka, va di vboha dhoropani ga Karaka, va nga bani va vbanya umo Vajudha va ranwago pwani Vatubhiyani. 18Aholu, kha va nga ya mu mana umo Thimoti, uye a di dugide tigoni mule nyamba kodza gu gira gilo, a gu vega wulanga nya gukari vakhedziseli nya tshivba nya yikhongolo. 19Dhositewu ni Sosipatro, vathangeli nya masotshwa ya Makabhewu, va di ya dhumela wulanga wule nya tshivba, va songetela vama vatshavbo va nga bani va vegidwe vbale khu Thimoti, khu tengo nya guvbindre likhumi magumi mazana (10.000). 20Khu guralo, Makabhewu a di kabanisa masotshwa yaye khu sikwata, a gu vega vama va vavili gu thangela sikwata, va yela Thimoti a nga bani a randredwe khu lizana ni magumavili magumi mazana (120.000) masotshwa nya gugimbile khu mawundru ni magumavili na livbandre mazana (2.500) vakhileli nya dzikavalu. 21#Wona gambe: 1 Sam 31:10; 1 Dzipf 11:5-33. Gikhati Thimoti a tugudego gu vboha gwa Judha, a di gimbidzisa vanyamayi, sanana ni mirwalo, va hongola ga likhokhola nya gukari li ranwago pwani Karimiyoni, nya gugaradze gu dhumedwa, kholu ndzila yakone yi di hongide, gu garadza ngudzu guvbindra khu kotani nya siwindri si nga bhiyago kheno ni eno.
22Gikhati gi vbohidego gikwata nya guhegule gya Judha, valala va di tala khu hwanga ni rerema, kholu uye a wonago silo satshavbo a di dzi wonegisa mahoni gwaye. Va di tutuma nyamutume va thavela maphuvbo yatshavbo, va gu bayisana khu gyawe, va gu dzi paya khu matshari yawe. 23Judha a di lundra va nya guvivbedwa khu myonyo vava, a gu tsayisa ni gu songa magumararu magumi mazana (30.000) vama. 24Ni uye mune Thimoti, thegede mandzani ga masotshwa ya Dhositewu ni Sosipatro, a nga va lombago khu wugengeli gukhuye va vbulugise womi waye, kholu mandzani gwaye a diri ni vavelegi ni vandruye nya vangi nya Vajudha. Vatshavbo vovo va di hadza gu tshaniswa ni gu songwa khu guphodzela uye, va gu mu songa. 25Na ganede magana yaya ni gu tumbisa khu gusambanya gukhuye a na tshula sibotshwa nyamba si gira guvivba, va di mu tshula gasi gu vbulugisa vandriyawe. 26Na gu giregide esi, Judha a di khuga a hongola Kariniyoni ni nyumbani ga nungungulu nya malipha, Atarigati, a di ya songa magumavili na livbandre magumi mazana (25.000) vama.
Judha ni madhoropa ya Efroni ni Kitopoli
27Hwane nya gulundre ni gu songa gogu, Judha a di gimbidzisa masotshwa yaye gu ya dwanisa Efroni, lidhoropa nya tshivba, umo a nga bani a vbanyela umo Lisiya gumogo ni gidzemo nya vathu nya mayigo yatshavbo. Madzaha nya tshivba, ma fodego mbeli nya likhokhola, ma di dwana na ma tiyide; ndrani nya lidhoropa gu di bani guri ni matshari nya gutale, ni makina nya nyimbi ni siwindri sakone. 28Vajudha va di lombelela ga Mune nya Tshivba Yatshavbo a gu na ni tshivba nya guvbedze dzitshivba ya valala, va di wandra lidhoropa, va gu songa magumavili na livbandre magumi mazana (25.000) vama;
29khu vbale, va di khuga va gu hongola dhoropani ga Kitopoli,#12:29 Kitopoli khu Gigreki lina nya lidhoropa li nga bani li tidwa khu Gihebheru pwani Bhetisani. A disiri hwindzo ni Jerusalema, lizana ni likhumi dzikilometro (110Kms) basi. li manegelago gipimo nya livbandre na limwedo mazana (600) mipfhuka gukhugela Jerusalema. 30Aholu Vajudha, va nga bani va vbanya dhoropani momo, va di fakaza gukhavo vathu va Kitopoli va di gu va phara khu wuwadi, gambe va di gu va sayisa khu lihaladzo gikhatini va nga bani va gu tshaniswa. 31#Wona gambe: Eks 34:22; Levh 23:15-22. Judha ni vathu vaye a di va bonga ni gu va laya gu va sayise khu lihaladzo vathu nya lihundzu laye; khavbo avbo, va di bela Jerusalema, kholu mibuzo nya dzisemana yi di gu vboha.
Judha a ngu lundra Gorigiya
32Na wu vbindride buzo nya Pentekosta, a di hongola gu ya dwanisa Gorigiya, muthangeli nya masotshwa ya Idhumeya, 33oyu a di mu yela nari ni magumararu mazana (3.000) masotshwa nya gugimbile khu mawundru ni mazana mana (400) vakhileli nya dzikavalu. 34Gu di dwanwa litunga, Vajudha nya gukari va songidwe avbovbo. 35Dhositewu, moyo nya vakhileli nya dzikavalu dza Bhakenori, mwama nya gutiye ngudzu a di mola Gorigiya khu gifenengelo a mu ndrindra khu tshivba ni tshivba, gasi gu mu mola na nga gu vbanya muthu wule nya guvivbedwe khu monyo. Aholu, moyo nya mukhileli nya kavalu wa Trasiya,#12:35 Trasiya litigo li manegago vbakari, eno khu Makedhoniya eno khu Yiphwa nya Gusivbale. Vathu va Trasiya va di thumiswa ngudzu khu vafumeli va Selewusidha kha nga masotshwa nya gulivbwe khu dzitsapawu. a di mu ndragela, a mu koka likhata limwedo. Khu magirelo yaya Gorigiya a di thava a gu hongola Maresa. 36Kha nga ulo masotshwa ya Esidhiriya, ma nga vbedzago gikhati nya gulaphe na ma gu dwana, ma di garade. Khavbo avbo, Judha a di rana Pfhumu a gu mu lomba gu va vhikela ni gu thangela litunga. 37Na va phede gu embelela dzindzimo nya nyimbi khu lidimi lawe nya mavelego, khu githugedza, a di dhumela masotshwa ya Gorigiya a gu ma pala, a ma phalalegisa.
Miphaso nya gualakanye vafi
38 # Wona gambe: Jos 12:15; 1 Sam 22:1; 2 Dzik 11:7. Khu hwane nya esi, Judha na tombaniside masotshwa yaye, a di vboha ga lidhoropa la Odholami, na li vbohide litshigu nya livbandre na mavili nya semana, va di dzi agisa kha nga guruma nya gihena ni gu alakanya Sabhadho.
39Khu litshigu li landrelago, Judha gumogo ni vabangaladzi vaye, va di hongola va ya dzega sirumbi sa vale va nga songwago, gasi gu ya va dzinga lithowoni vbafuvbi ni vavelegi vawe. 40#Wona gambe: Dhet 7:25. Khu guralo, vbavbatshi nya libhadzi la moyo ni moyo nya vale va fudego, va di ya mana sombo si phasedwego sifananiso sa vanungungulu nya malipha va Jamina, si himbedzedwago khu nayo ga Vajudha, vatshavbo va di tugula gukhavo egi khigyo givangelo nya gusongwe gwawe. 41Khavbo avbo, va di rungudza mandza ya Pfhumu, mulamuli nya gululame a nga tumbulugisago silo si sihadego. 42Va di bela milombeloni, gasi gu Mu lomba lidivalelo nya guvbelele nya gighoho va giridego. Judha nya guthavisege a di ramba gidzemo, a gi laya gu dzi vegisa nyamba ndraga nayo mwendro gu dzi bedza ga pfilupfilu nya gukari, na va gu wona khu maho yawe guvivba gu nga manegago ga vale va songidwego khu kotani nya sighoho. 43A di ruma gu girwa mihengo, va gu mana gipimo nya magumavili mazana (2.000) dzidrakima, a gu dzi rumela Jerusalema gasi gu ya gira miphaso nya dzimhamba nya guhandze sighoho. Owu i thumo nya wuzundzo ni gukatega, a wu pimisidego khu kotani nya gukhodwe gwaye, mayelano khu guwuga ga avo va fudego. 44Kholu nari gukhwatshi a di si khodwi ni gu lindrela gukhuye avo vafudego va na wuga, a diri thumo nya mahala, nyamba phasa gilo gulombelela khu avo vafudego. 45A di gu khodwa gukhuye va ngu lindrela tshatshazelo nya gumbure ngudzu avo vafago na va giride gululama. A diri mipimiso nya gukatege ni wululamo. Khu kotani nya isoso, lombide miphaso nya ditshedzo gasi va nya gufa va vbuluge ga sihoso sawe.
Currently Selected:
2 Makabhewu 12: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.