2 Makabhewu 11
11
Lisiya a ngu rumela nyaluphye masotshwa
(1 Makabhewu 4:26-35; 6:57-61)
1Aholu, hwane nya matshigwana, Lisiya, mutshikedzi ni nongo wa mufumeli, a gu muthangeli nya mufumo, na pwide gulemela nya gukhongolo khu iso si giregidego, 2a di tshanganisa gipimo nya livbandre na mararu magumi magumi mazana (80.000) vama gumogo ni vakhileli vatshavbo nya dzikavalu, va di hongola guya dwana ni Vajudha. Va di hungide gikungo nya guvbindrugedze lidhoropa la Jerusalema a li gira lidhoropa la Vagereki, 3ni gu lemedza Nyumba ya Nungungulu khu mikhupo nya gufanane ni dzinyumba nya mahedheni ni gu rengisa khu dzitsapawu, khu mwaga ni mwaga, wulanga nya wuzundzo ni thumo wa khongolo nya vaphasi nya mhamba. 4A di si pimisi tshivba ya Nungungulu, aholu a di dzi gugumugisa khu gu tumba wuwungi nya masotshwa yaye nya gugimbile khu migondro ni mazanazana nya vakhileli nya dzikavalu, ni livbandre na mararu magumi (80) dzindzofu dzaye. 5Khavbo avbo, na bede Judheya, a di hidzimela Bheti-Suri, a gu likhokhola nya tshivba li manegelago gipimo nya livbandre mipfhuka vbavbandze ga Jerusalema, a gu li dhumela. 6#Wona gambe: Eks 3:2; 14:19; 23:20-30; Mit 1:10; Tobh 5:22; Mat 28:3. Aholu, gikhati a dzitidego Makabhewu gumogo ni avo a nga bani ari navo va pwidego gupwani Lisiya a di gu randrela makhokhola yawe, va di patana gumogo ni vathu va lombelela ga Pfhumu khu gugaradzega ni gulila, gukhavo Nungungulu a va rumele ngilozi nya yadi, gasi guta vbulugisa Israyeli. 7Uye abune Makabhewu khuye guphela khuye gu phara matshari, a gu kutsedzela vatshavbo gukhuye va dzi ningele ga mhango kha nga uye, gasi gu phasa vandriyawe. Vatshavbo va di hongola khu ligolo na va tade khu tshivba.
8Va di ngari vbafuvbi ngudzu ni Jerusalema, gikhati va wonidego mbeli gwawe mukhileli nya kavalu na ambade dzingandzu nya guage, na gu kutsunga matshari yaye nya ndralama. 9Khavbo avbo, vatshavbo khu gumogo va di rungudza Pfhumu gumogo, na va tade khu gutiya, va di dzi emisela gu ya dwanisa nasiri vathu basi, aholu ni sirengo nya gigaha ngudzu, kala ni mabhiyo nya dzisimbi. 10Khu guralo, va di hongola nyimbitunu na va somide, na va gu tiyisedwa khu muphasedzeli yoyu a rumedwego khu ndzadzini khu wuhindzi wa Pfhumu. 11Kha nga dzinghala, va di ndragela valala, va gu songa likhumi na limwedo magumi mazana (11.000) masotshwa nya gugimbile khu migondro ni livbandre na limwedo mazana (600) vakhileli nya dzikavalu, vambe vatshavbo va tshadego va di va tutumisa. 12Nya vangi vawe, na va bayisedwe, nyambana matshari, va vbulugide. Uye nuye Lisiya vbulugide a gu thava na tade khu dzitshoni. 13Kha nga a nga bani a si keneledwi khu wugengeli, Lisiya a di khala a pimisa idzo a nga padwago khidzo, a di wona gukhuye Vahebheru khandri vathu nya gupadwe khu matshari, kholu Nungungulu nya Tshivba Yatshavbo a di ema navo a va dwanela. 14A di va rumela mwango gu ya va ninga mawonelo nya yadi nya gugire navo pwanano khu dzindzila dzi lulamidego; a di va tumbisa gukhuye a na gira satshavbo gasi mufumeli a dzumele gu khala pari yawe. 15Makabhewu a di dzumela mawonelo yatshavbo ya Lisiya, ngudzungudzu khu gu pimisa esi nya sadi si nga hadza gu phasa vatshavbo. Khu lisine, mufumeli a di dzumela satshavbo iso Makabhewu a nga bani na gu lomba khu lidangalila ga Lisiya, na si gu ganela khu gukhadzisega ni dzifanelo dza Vajudha.
16Lidangalila la Lisiya a nga lovelago Vajudha la gu ganela kharati, khilo: 17“Eni Lisiya nyi ngu lovela Vajudha, nyi ngu losa. Seweni! Sirumwa sanu, Johane ni Abhisalamo, si nyi ningide lidangalila li gu na ni mawonelo yanu, gambe si nyi lombide gukhiso nyi dzumele dzindrima dzatshavbo mu dzi sasamedzidego. 18Khu guralo, nyi bikede ga mufumeli satshavbo iso si nga vbwetega gu mu tivisa, uye dzumede gu gira satshavbo, gukhedza khu avbo a na gu kodzago. 19Enu mwa gu simama gu khala na mu tumbegide ga mufumo, eni neni nyi na mi emelani, mu kodza gu mana wuhindzi. 20Gasi khu esi simbe satshavbo si vbwetegago gu lulamisedwa, eni nyi embede sirumwa sanu ni esi sangu gukheni va hevbula nanu dzindrima nya pwanano ni satshavbo si yelanago nadzo. 21Vbanyani gwadi. Li lovidwe khu litshigu nya magumavili na mana nya ngima nya Dhiyosikoro, nya mwaga nya lizana ni magumana na livbandre na miraru (148).”
22Lidangalila la mufumeli li diri ni magana yaya: “Mufumeli Antiyoko a ngu lovela ndriyaye Lisiya. Sewe! 23Na khugide babe wathu mafuni momo, a hongola ga vanungungulu, hi ngu gola gukhethu vathu nya mayigo yatshavbo ma lumbago mufumo wathu va vbanye khu gurula, va dzi kodze guthuma mithumo yawe na va tshulegide. 24Khu guralo, hi dzitide gukhethu Vajudha va ngu bomba gu dzega sihena nya mavbanyelo ya Vagereki, kha nga gudzina ga babe wathu, aholu va gu vbweta gu vegedza sihena nya tumbunugo wawe, va gu hi lomba gukhavo hi va tshule gasi va kodze gu vbanya kha nga idzo wu rumago khidzo nayo wawe. 25Khu guralo, na hi gu vbweta gukhethu vathu vava navo va vbanye khu gurula, hi vegide nayo nya gukhethu va bweledzedwe Nyumba ya Nungungulu, gasi va vbanye gukhedza khu milayo ya vakokwe vawe. 26U na bani u giride gwadi wa gu va rumela sirumwa, gasi guya vbedzisa gu hunga gurula navo, gasi gu, na va tide gugola gwathu, va khale na va tshulegide, va dzi ningedzele nyamba kanakana ga mithumo yawe.”
27Lidangalila la mufumeli a lovedego vathu li di gu ganela, khilo: “Mufumeli Antiyoko a ngu lovela huwo nya madhota gumogo ni Vajudha vatshavbo. Seweni! 28Hi ngu mi suvela gukhethu mu vbanye gwadi! Ethu hi ngari vadi. 29Menelawu a hi tiviside gukhuye enu mwa gu vbweta gu bwelela tigoni gwanu muya vbanya ni valongo vanu. 30Ga vatshavbo avo va na bwelelago kala litshigu nya magumararu nya ngima nya Tsantiko,#11:30 Ngima nya Tsantico gu thudwa ngima nya Wuraru ni nya Wuna (Marsu-Abrili). hi ngu va dzumedzisa, hi wuya hi tumbisa gu va agisela dzindzila, va gimbila khu gurula ni gukhadzisega. 31Nyi ngu dzumedzisa gambe, Vajudha gu hodza esi va dzumedziswago ni gu landrisa milayo yawe ni sihena nya mavbanyelo nya tumbunugo wawe kha nga gale. Mwalo na moyo a na tsayiswago khu pfilupfilu yi vbindridego. 32Nyi ningide nayo Menelawu gasi a ta tiyisa gurula gogu vbakari gwanu. 33Vbanyani gwadi! Mwaga nya lizana ni magumana na livbandre na miraru (148) khu litshigu nya likhumi na livbandre nya ngima nya Tsantiko.”
34A navo Varoma va rumede lidangalila ga Vajudha va gu ganela, khavo: “Khinto Memiyo ni Tito Maniyo, sirumwa sa Varoma, ga vathu va Judheya, hi ngu losa. Seweni! 35Hi ngu mi dzumedzisa silo satshavbo esi Lisiya, nongo wa mufumeli a mi tshudego. 36Gasi khu mahungu nya sile uye a wonidego nari gwadi guphela khu gu si bikela ga mufumeli, hi rumeleni khu guvbiredza muthu nya gukhari, gasi hi ta si lulamisa khu edzi gu vbwetegago khidzo, gasi si mi dugela gwadi, kholu ha gu hongola tigoni gwa Antiyokiya. 37Khu guralo, vbiredzani gu hi rumela sirumwa, gasi hi ta pima gwadi khu gwevbini gugola gwanu. 38Vbanyani gwadi! Mwaga nya lizana ni magumana na livbandre na miraru (148), litshigu nya likhumi na livbandre nya ngima nya Tsantiko.”
Currently Selected:
2 Makabhewu 11: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.