Génesis 31

Labánpita Jacob qeshpinqan

1Tsaypitanam Jacob wiyarqan Labánpa tsurinkuna wasanta rimar niyanqanta: <<Jacobqa papänintsikpa kaqta duëñu tukurmi rïcuyashqa>>.

2Tsaynöllam Jacob tantiyarqan suegrun Labán ajashqa purir ñöpata kanqannö manana kanqanta. 3Tsaypitanam Jacobta Tayta Dios nirqan: <<Papäniki y castaykikuna täyanqanman kutikuy. Qamwanmi imaypis kaykäshä>>.

4Tayta Dios tsaynö niptinmi Raqueltawan Leata mitsikunqan jirkaman Jacob qayatsirqan. 5Paykuna chaykuyaptinnam nirqan: <<Papäniki noqapita ajanashqa puriykanqantam tantiyarqü. Tsaynö kaptinpis papänï yärakunqan Dios manam dëjamashqatsu. 6Musyayanqaykinöpis llapan voluntänïwanmi papänikita aruparqü. 7Tsaynö arupaykaptïpis payqa engañamashqam. Atska kutim arunqäpita pägamänanpä parlayanqänöqa pägamashqatsu. Tsaynö ruraykämaptinpis Tayta Diosmi yanapamashqa. 8Tsaymi <arupämanqaykipita kananqa pägashayki yana muru üshakunawan> nimaptin llapan ashkashkunapis yana murulla yuriyaq. Tsaynöllam <räya räya yuriqkunawan pägashayki> nimaptin llapan ashkashkunapis räya räyalla yuriyaq. 9Tsaynöpam papänikipa üshankunata Tayta Dios entregamashqa.

10<<Ashmakuna calintayanqan witsanmi sueñuynïchö rikarqü räya räya chïvukuna, yana muru chïvukuna y yuraqyuq chïvukuna cabrakunata calintaykätsiqta. 11Tsay sueñuynïchömi Tayta Diospa angelnin qayamar nimarqan: <¡Jacob!> Tsaynö qayamaptinmi <¿imallatä, Taytay?> nirqä.

12<<Tsaymi Diospa angelnin nimarqan: <Rikaykämi Labán imanö ñakatsishunqaykitapis. Tsaymi permitirqü llapan yayankuna räya räyalla, yana murulla y yuraqyuqlla kayänanpä. Tsayta rikar shumaq tantiyakuy. 13Noqam kä Bet-elchö yuripushuqniki Dios. Tsaychömi rumita jawiykur aceitita wiñar sirvimänaykipä awnimarqayki.#Gén. 28.18-22. Kananqa yurinqayki Canaánman kutikuy> >>.

14Tsaynö niptinnam Raquelwan Lea niyarqan: <<Noqakunataqa papänï ima herenciatapis manam rakipäyämanqatsu. 15Jäpatanö rikayämarninmi rantikayämashqa. Noqakuna raykur arupanqaykitapis mana rakipäyämarmi kikillan ushashqa. 16Papänïpa üshankunata Tayta Dios makikiman churamunqanqa noqantsikpä y wamrantsikkunapämi kaykan. Kanan Tayta Dios nishunqaykinölla llapantapis ruray>>.

17-18Tsaymi Jacob alistakurqan papänin Isaac täranqan Canaánman kutikunanpä. Llapan imaykanta chaqnakurkurmi tsurinkunatawan warminkunata camëlluman muntarkatsir Padan-aramchö arunqanpita tarinqan ashmakunatapis qatikurkur aywakurqan. 19Suegrun Labán millwa rutuq aywanqanyaqmi Jacob aywakurqan. Raquelnam papäninpa ïdulunkunata suwakuskir aparqan. 20Suegrun Labánta mana willarmi Arampita Jacob aywakurqan. 21Llapan kikinpa kaqta apakurkurmi qeshpir aywakurqan. Tsaymi Éufrates mayuta päsar Galaad jallqakuna lädupa aywarqan.

Jacobta Labán qatipanqan

22Tsaypita kimsa junaqtarämi Labán musyarqan Jacob qeshpir aywakunqanta. 23Tsaymi castankunata minkakuskir Jacobta qatipäyarqan. Qanchis junaqtarämi Galaad jallqakunachö taripäyarqan. 24Taripänan paqasnam sueñuyninchö Labánta Tayta Dios nirqan: <<Cuidädutä imatapis Jacobta ninkiman>>.

25Galaad jallqakunachö Jacob patsakushqa kaykaptinmi Labán tariparqan. Tsaychömi Labánpis castankunawan patsakuyarqan. 26Jacobtanam Labán nirqan: <<¿Imatätä rurarquyki? ¿Imanirtä mana willamar qeshpimurquyki? ¿Imanirtä guërrapita prësu apaqnö tsurïkunata apamurquyki? 27¿Imanirtä upällalla qeshpir shamurquyki? Aywakamunaykipä willamaptikiqa fiestata rurarmi panderëtakunata arpakunata tukar kushishqa despachamüman karqan. 28Tsurïkunata ni willkäkunata mutsar despidikunalläpäpis manam willamarquykitsu. ¡Tsaytaqa upanömi rurarquyki! 29Tsaynö rabyatsimanqaykipita imatapis rurämanmi karqan. Peru papäniki yärakunqan Diosmi nimashqa: <Cuidädutä Jacobta imatapis ninkiman>. 30Papänikipa wayinman kutikurpis ¿imapätä diosnïkunata suwakamurquyki?>>

31Jacobnam nirqan: <<Tsurikikunata qechumänaykita mantsarmi mana willarniki qeshpir shayämurqü. 32Diosnikikunataqa manam suwakamurqütsu. Mayqanpis diosnikita tsararaq kaqqa wanutsishqa katsun. Castantsikkuna rikaykaptin ashipayämay. Qampa kaqta imatapis tarirqa llapanta kutitsikuy>>.

Jacobqa manam musyarqantsu diosninkunata Raquel suwamunqanta.

33Tsaynö niptinmi Jacobpa toldun rurinman Labán yaykurqan diosninkunata ashinanpä. Tsaychö mana tarirmi tsurin Leapa toldunmanpis ashiq yaykurqan. Tsaypitanam yaykurqan ishkay ashmay kaq warmikunapa toldunkunamanpis. Tsaychö mana tarirnam Raquelpa toldunmanna ashiq aywarqan. 34Raquelnam tsay dioskunata camëllupa sillan rurinman pakaskir tsay jananman jamaskirqan. Tsaymi entëru toldu rurinta ashirpis Labánqa tarirqantsu.

35Raquelnam papäninta nirqan: <<Papä, ama rabyakunkitsu kay jamaraykanqäpita mana shäriptï. Killa qeshyäwanmi kaykä>>.

Tsaymi maytsaypa ashirpis ïdulunkunata Labán tarirqantsu.

36Tsaynö ashirpis mana tariptinmi Jacob rabyakur Labánta nirqan: <<¿Imatatä mana allita rurarqü? ¿Ima jutsatatä rurarqü tsayjinanpa rabyashqa qatipämänaykipä? 37Llapan imaykäkunatanam ashirquyki. Tsaynö ashirpis ¿imatatä qampa kaqta tarirquyki? Tarishqa karqa castantsikkuna rikayänanpä kayman churamuy. Paykunam nimäshun mayqantsikpis rasun kaqta parlanqantsikta.

38<<Ishkay chunka (20) watantin ashmaykikunata mitsiptï manam üshaykikuna, cabraykikuna jukllayllapis shullushqatsu. Tsaynöllam ni juk carnërullatapis mikunäpä pishtarqütsu. 39Manam imaypis jirka ashmakuna wanutsiptin apapämurqütsu. Tsaypa rantinqa kikïmi trokinta churaq kä. Ashmaykikunata tsakaypa o junaqpa suwakuna apayaptinpis llapanpitam qamqa cobramarqayki.

40<<Ashmaykikunata mitsir pasaypam ñakarqü junaqpa achaywan y paqaspa alaywan. Punuytapis manam tarirqätsu. 41Chunka chusku watam ishkan tsurikikunapä aruparqü. Y ashmaykikunapänam joqta wata mas aruparqü. Chämunqä junaqpitam ishkay chunka (20) wata makikichö tärarqü. Atska kutim ashmaykikunata mitsinqäpitapis parlanqantsiknötsu pägamarquyki. 42Awilü Abrahamwan papänï Isaac yärakunqan Tayta Dios mana yanapamaptinqa jinayllatam qarqaramankiman karqan. Pasaypa ñakar y llakikur arunqäpitam Tayta Dios yanapamashqa. Tsaymi qanyan paqaspis sueñuynikichö ollqutupäshurquyki>>.

Labánwan Jacob awninakuyanqan

43Jacob tsaynö niptinmi Labán nirqan: <<Kay warmikunaqa tsurïmi y kay wamrakunapis willkämi. Llapan ashmakunapis ashmäkunapa wawanmi kayan. Llapan kaychö rikanqaykiqa noqallapam kaykäyan. Tsurïkuna y willkäkuna raykur manam ni imatapis rurayäshaykinatsu. 44Pactuta kanan rurashun qampis y noqapis mana qonqaypa cumplinantsikpä>>.

45Tsaynö niptinmi juytu rumita señalpä Jacob jawirqan. 46Tsaypitanam llapan castankunata nirqan: <<Rumikunata qoriyämuy>>.

Tsaynö niptinmi juk muntun rumikunata muntunayarqan. Tsay muntunayanqan rumi ñöpanchömi mikuyarqan. 47Labánnam kikinpa idiömanchö tsay sitiupa jutinta churarqan Jegar Sahaduta jutin kananpä. Jacobnam kikinpa idiömanchö jutinta churarqan Galaad jutin kananpä.#31.47 Tsay jutikunaqa testïgu muntunashqa rumi ninanmi.

48Tsaymi Labán nirqan: <<Kanan kay muntunanqantsik rumikunam señal kanqa awninakunqantsikta imaypis cumplinantsikpä>>.

Tsaypitam tsay sitiupa jutin karqan Galaad.

49Tsaynömi jukaq jutintapis churarqan Mizpa jutin kananpä.#31.49 Mizpa ninanqa rikachakuna törri ninanmi. Tsay jutita churarqan Labán kaynö ninqanpitam: <<Kananpita manana rikanakushqapis Tayta Diosmi rikamäshun imanö kanqantsiktapis. 50Tsurïkunata maqaptiki o paykuna jananman juk warmiwan churakaptiki mana musyaptïpis Tayta Diosmi juzgashunki>>.

51Mastam Labán nirqan: <<Kaychömi kaykan rumikunata muntunanqantsik y jawinqantsik juytu rumipis. 52Tsaykunam señal kanqa kanan awninakunqantsikta imaypis cumplinantsikpä. Kananpitaqa qampis ni noqapis kay lindëruta ama päsapänakushuntsu ni imatapis ama yatapänakushuntsu. 53Awninakunqantsikta mana cumplishqaqa awiluyki Abraham y awilü Nacor yärakuyanqan Diosmi juzgamäshun>>.

Labán tsaynö niptinmi Jacobpis papänin Isaac mantsapakunqan Tayta Diospa jutinchö awnirqan imaypis cumplinanpä.

54Tsaypitanam ashmakunata Jacob pishtaskir wiranta Tayta Diospä rupatsirqan. Aytsatanam llapan castankunawan mikuyarqan. Tsaypitanam tsay jallqallachö punuyarqan.

55 55 (32.1) Patsa waraskiptin shärikuskirnam Labánqa willkankunata y tsurinkunata mutsarqan. Tsaypitanam paykuna alli kawayänanpä bendisaykur markanpa kutikurqan.

Currently Selected:

Génesis 31: qxo

Highlight

Copy