Génesis 32

Esaúwan tinkuyänanpä Jacob alistakunqan

1 1 (2) Tsaypita aywakuptinmi Tayta Diospa angelninkuna Jacobwan tinkuq aywayarqan. 2 2 (3) Angelkunata rikaykurmi Jacob nirqan: <<Kayqa Tayta Diospa soldädunkunapa campamentunmi>>.

Tsaynö nirmi tsay partipa jutinta churarqan Mahanaim#32.2 Mahanaim ninanqa ishkay campamentu ninanmi. jutin kananpä.

3 3 (4) Tsaypitanam willakuqninkunata Jacob mandarqan kutiykanqanta wawqin Esaúta willayänanpä. Esaúqa täkurqan Seirchö kaykaq Edomchömi. 4 4 (5) Manarä mandarmi tsay willakuqninkunata yätsirqan kaynö niyänanpä: <<Tayta Esaú, wawqiki Jacobmi nin: <Aywakunqäpitam Labánpa makinchö tärarqü. 5 5 (6) Kananqa kannam wäkäkuna, ashnükuna, üshäkuna y cabräkunapis. Tsaynöllam ollqupis warmipis sirvimaqnïkuna kaykäyan. Tsaynö willakatsimü kuyapämänaykipämi> >>.

6 6 (7) Mandanqan willakuqninkuna kutimurnam Jacobta niyarqan: <<Wawqiki Esaúta willaq aywayanqäpitam kutiykäyämü. Chaskishunaykipämi chusku pachak (400) runakunata pushakurkur shamuykan>>.

7 7 (8) Tsaynö willayaptinmi Jacobqa pasaypa mantsarirnin yarpachakurqan. Tsaymi paywan kaykaq runakunata ishkay grüpuman rakirqan. Tsaynöllam ishkay majädaman üshankunata, cabrankunata, wäkankunata y camëllunkunatapis rakirqan. 8 8 (9) Jacob tsaynö rurarqan Esaú jukaq grüputa atacaptin jukaq grüpullapis qeshpiyänanpä kanqanta yarparmi.

9 9 (10) Tsaypitanam Tayta Diosta mañakur nirqan: <<Awilü Abrahamwan papänï Isaac yärakunqan Tayta Dios, kikikim nimarqayki castäkuna täyanqan partiman kutikamunäpä. Tsaynöllam nimarqayki yanapamänaykipä kanqanta. 10 10 (11) Mana cäsukuq kaptïpis kuyapämarmi yanapamarquyki. Kaypita aywakur Jordán mayuta tukrü aptashqallam päsarqä. Kananqa ashmäkuna y noqawan aywaqkuna ishkay grüpuman rakinäpäpis atskanam. 11 11 (12) Taytay, wawqï Esaúpita salvaykallämay. Warmïkunata wamräkunatawan juntu wanutsimänanpä kanqanta yarparmi pasaypa mantsarï. 12 12 (13) Taytay, qammi nimarqayki yanapamänaykipä kanqanta. Tsaynöllam nimarqayki lamar kuchunchö yupaytapis mana atipaypä arënanörä noqapita miraqkunapis kayänanpä kanqanta>>.#Gén. 22.17.

13 13 (14) Tsay paqas tsayllachömi Jacob punurqan. Patsa waraskiptinnam ashmankunapita rakirqan wawqin Esaúta qarananpä. 14 14 (15) Wawqinpä rakinqan ashmakunam kayarqan ishkay pachak (200) cabrakuna, ishkay chunka (20) chïvukuna, ishkay pachak (200) üshakuna, ishkay chunka (20) carnërukuna, 15 15 (16) kimsa chunka (30) camëllukuna wawankunantin, chusku chunka (40) wäkakuna, chunka torïtukuna, ishkay chunka (20) china ashnukuna y chunka orqu ashnukunapis. 16 16 (17) Tsaynö rakiskirmi ashmakunata qatiyänanpä sirviqninkunata nirqan: <<Rakinqä ashmakunata karu karuman qatikurkur puntayay>>.

17 17 (18) Punta qatiq kaqta yachatsirmi nirqan: <<Capazchi Esaú tapushunkiman: <¿Pitä patronniki? ¿Maypatä aywaykanki? ¿Pipa ashmantatä qatiykanki?> 18 18 (19) Tsaynö tapushuptiki ninki: <Tayta Esaú, wawqiki Jacobmi kay ashmakunata qampä qatiykätsiman. Qepatam kikinqa shamuykan> >>.

19 19 (20) Punta aywaq sirviqninta yachatsinqannöllam wakin kaq sirviqninkunatapis Jacob yachatsirqan.

20 20 (21) Jacobmi yarparqan apatsinqan ashmakunata rikaykur wawqin Esaúpa rabyaynin päsaptin kushishqawanna tinkunanpä kanqanta. Tsaynöllam sirviqninkunata Jacob yätsirqan Esaúwan tinkur <<qepatam Jacob shamuykan>> niyänanpä.

21 21 (22) Tsaymi Esaúta qarananpä rakinqan ashmakunata puntanta qatitsirqan. Despachaskirnam Jacobqa patsakunqan kaqllachö quëdakurqan.

Angelwan Jacob pelyayanqan

22 22 (23) Tsay paqasmi Jacobqa ishkan warminkunata, ishkay sirviqnin warminkunata y chunka juk tsurinkunata Jaboc mayu vädupa päsatsirqan. 23 23 (24) Tsaynöllam llapan imaykantapis päsatsirqan. 24 24 (25) Tsaypitam kikillanna quëdakurqan. Tsay paqasmi Jacobwan juk runa warat pelyayarqan. 25 25 (26) Jacobta imanöpapis vinciyta mana puëdirmi tseqllaman tinkuq raku chanka moqunta moqaskatsirqan. 26 26 (27) Tsay runanam Jacobta nirqan: <<Patsa waraykannam. ¡Dëjamayna!>>

Tsaynö niptinmi Jacob nirqan: <<Bendicionta manarä qomaptikiqa manam dëjashaykitsu>>.

27 27 (28) Tsaymi Jacobta tapurqan: <<¿Imatä jutiki?>>

Tsaymi nirqan: <<Noqapa jutï Jacobmi>>.

28 28 (29) Tsay runanam nirqan: <<Kananpitaqa manam Jacobnatsu jutiki kanqa, sinöqa Israelnam.#32.28 Israel ninanqa Tayta Dioswan pelyaq ninanmi. Tsaynö jutiki kanqa Diostapis runakunatapis pelyar vincinqaykipitam>>.#Gén. 35.10.

29 29 (30) Tsaypitanam Jacob tapurqan: <<Taytay, qampaqa ¿imatä jutiki?>>

Tsaynö tapuptinmi tsay runa nirqan: <<¿Imapätä jutïta tapumanki?>>

Tsaypitanam Jacobta bendisarqan.

30 30 (31) Aywakuptinnam Jacob nirqan: <<Tayta Dioswanmi cära cära tinkurqü. Tsaynö tinkuykarpis manam wanurqütsu>>.

Tsaypitam tsay partipa jutinta churarqan Peniel kananpä.#32.30 Peniel ninanqa Diospa cäran ninanmi. 31 31 (32) Peniel partipita Jacob aywaykaptinmi rupay yarqamurqan. Raku chankan moqashqa kaptinmi weqruyllapa aywaykarqan. 32 32 (33) Tsaynö moqatsishqa kaptinmi Israel runakunaqa ashmata pishtar kananyaqpis tseqllanman tinkuq anku aytsanta mikuyantsu.

Currently Selected:

Génesis 32: qxo

Highlight

Copy