Éxodo 4

Moisés imanö rurananpäpis tantiyatsinqan

1Tsaynam Moisés nirqan: <<Willaptïpis Israel mayïkuna manam criyiyämanqatsu ni cäsuyämanqatsu. Tsaynöllam niyämanqa: <Qamtaqa ¿imanöpatä Tayta Dios yuripushunkiman?> >>

2Niptinmi Tayta Dios tapurqan: <<¿Imatatä aptaraykanki?>>

Tsaymi Moisés nirqan: <<Taytay, tukrütam aptaraykä>>.

3Niptinmi Tayta Dios nirqan: <<Patsaman jitay>>.

Patsaman jitaykuptinmi culebraman tikrarqan. Tsayta rikaykurmi Moisés mantsakar qepaman saltarqan.

4Tsaymi Tayta Dios nirqan: <<Chupapita tsariy>>.

Chupapita tsariskiptinmi culebraqa tukrunmanna tikraskirqan.

5Tsaypitanam Tayta Dios nirqan: <<Tsayta rikarmi Abrahampa, Isaacpa y Jacobpa Tayta Diosnin yuripunqäta paykuna criyiyanqa>>.

6Mastam Tayta Dios nirqan: <<Kananqa makikita oqllaynikiman jatiy>>.

Niptinmi makinta oqllayninman jatirqan. Jipiriptinnam leprawan rashtanö yuraqashqa kaykänä. 7Tayta Diosnam nirqan: <<Yapay makikita oqllaynikiman jatiy>>.

Tayta Dios ninqannöllam rurarqan. Makinta oqllayninpita jipiskiptinnam sänuna kaykänä.

8Tsaykunata ruraskatsirnam Tayta Dios nirqan: <<Punta kaq señalta mana criyirpis yapay mas jukaq señalta ruraptikim criyiyäshunki. 9Ishkay kaq señaltapis mana criyiyaptinmi mayupita yakuta chaqarkur patsaman jichanki. Jichaptikim yawarman tikranqa>>.

Moiséspa trokin Aarón parlananpä kanqan

10Niptinmi Moisés nirqan: <<¡Ay, Tayta Dios! Noqaqa parlaytapis manam shumaqqa yachätsu. Tsaynö kanqäqa manam kananllarätsu, sinöqa unaypitam. Tsaymi parlarpis shumaq tantiyatsiyta puëdïtsu>>.

11Tsaynö niptinmi Tayta Dios nirqan: <<¿Pitä runapa shiminta kamashqa? ¿Pitä permitin upa kananpä, wiyaq kananpä, qapra kananpä y alli rikaq kananpä? ¿Manaku noqa kä? 12Tsaynö kaykaptinqa Egiptuman ayway. Parlanqayki höram qamwan kaykäshä. Imanö parlanaykipäpis noqam tantiyatsishayki>>.

13Moisésnam yapay nirqan: <<¡Ay, Tayta Dios! Noqapa rantï jukta mandaykullay>>.

14Tsaynö niptinmi Tayta Dios rabyakurnin nirqan: <<Mana valuraptikiqa Leví trïbu wawqiki Aarónmi yanapashunki. Shumaqmi runakunata tantiyatsin. Paymi tinkuyänaykipä shamunqa. Tinkuskiyaptikim pasaypa kushikunqa. 15Paytam tantiyatsinki imata parlananpä kaqtapis. Noqam paytapis qamtapis tantiyatsiyäshayki alli parlayänaykipä. Tsaynöllam tantiyatsiyäshayki imata rurayänaykipä kaqtapis. 16Llapan parlapanqäkunatam Aarónta parlapanki. Qam ninqaykikunatanam Israel runakunata Aarón parlapanqa. 17Tukruykita apanki. Tsaywanmi mantsakaypä kaqkunata ruranki>>.

Egiptuman Moisés kutinqan

18Tsaypitanam suegrun Jetrupa wayinman Moisés kutirqan. Chaykurmi nirqan: <<Papä, Egiptuchö castäkunata watukaqmi aywayta munä. ¿Kawaykäyanrätsurä o mananatsurä?>>

Tsaymi suegrun Jetro nirqan: <<Hïju, allim kanqa. Aywar watukaramuy>>.

19Madiánpita manarä aywaptinmi Moisésta Tayta Dios nirqan: <<Egiptuman kutiy. Wanutsiyäshunaykipä yarpaqkunaqa llapannam wanuyashqa>>.

20Tsaymi Moisésqa warminta wamrankunata ashnuman muntarkatsir tukrunta apakurkur Egiptuman aywarqan. 21Tsaypitanam Moisésta Tayta Dios nirqan: <<Qamtam podernïta qararqü Egiptuman char Faraónpa puntanchö espantaypä kaqkunata ruranaykipä. Tsaykunata llapanta ruranki. Noqam Faraónpa shonqunta chukruyätsishä Israel runakunata mana yarqatsinanpä. 22Tsaymi Faraónta ninki: <Tayta Diosmi nin: Israel runakunaqa mayor tsurïmi kaykan. 23Tsurï adoramaq aywananpä nikaptïpis manam dëjayta munankitsu. Tsaymi mayor kaq tsurikita wanutsishä> >>.#Éxo. 12.29.

24Egiptuman aywaykar tsakäpakuskirmi patsakuyarqan. Tsay paqasmi Tayta Dios yuripaykur Moisésta wanutsiyta munarqan. 25Tsaymi cutsillunö rumiwan wamranpa penqayninpa qaranta Séfora roqurqan. Tsay roqunqan qarata Moiséspa chakinman jitapaykur nirqan: <<Kananqa yawarwan señalashqa runämi kanki>>.

26Tsaynö ruraptinmi Moisésta Tayta Dios wanutsirqannatsu. Wamranpa penqayninpa punta qaranta roqunqanpitam Séfora nirqan: <<Yawarwan señalashqa runämi kanki>>.

27Egiptuchö Aarón kaykaptinmi Tayta Dios nirqan: <<Moiséswan tinkunaykipä desiertuman ayway>>.

Tsaymi Aarón aywar Moiséswan tinkurqan Tayta Dioswan tinkuna jirkachö#Éxo. 3.1.. Moiséswan tinkuskirmi saludarnin mutsarqan. 28Tsaychömi Aarónta Moisés willarqan Tayta Dios ninqankunata y espantaypä kaqkunata rurananpä kanqanta.

29Egiptuman chaykurnam Moiséswan Aarón aywayarqan Israel mayor runakunata qoriyänanpä. 30Paykuna qorikaskiyaptinmi Moisésta Tayta Dios ninqankunata Aarón willarqan. Tayta Dios ninqannöllam paykunapa puntanchö espantaypä kaqkunata Moisés rurarqan. 31Tsaymi llapan runakuna criyirnin niyarqan: <<Imanö ñakar kawanqantsiktapis Tayta Diosqa rikamarquntsikmi>>.

Tsaynö nirmi qonqurikuykur Tayta Diosta adorayarqan.

Currently Selected:

Éxodo 4: qxo

Highlight

Copy