Éxodo 5

Moiséswan Aarón Faraónman aywayanqan

1Tsaypitanam Faraónman aywaykur Moiséswan Aarón niyarqan: <<Israel runakunata kuyaq Tayta Diosmi nin: <Kuyanqä runakunata dëjay desiertuman aywaykur noqata adorayämarnin fiestata rurayänanpä> >>.

2Tsaynö niyaptinmi Faraón nirqan: <<¿Pitä Tayta Diosnikiqa payta cäsur Israel runakunata <ayway ari> ninäpäqa? Tayta Diosnikitaqa manam reqïtsu. Israel runakunataqa aywakuyänanpä manam dëjapäshätsu>>.

3Tsaynö niptinmi Moiséswan Aarón niyarqan: <<Hebreo runakunapa#5.3 Hebreo runakunaqa Israel runakunam kayarqan. Tsaymi Moiséspis hebreo runa karqan. Tayta Diosninmi yuripayämashqa. Tsaymi kimsa junaq aywayta desiertuman aywar sacrificiuta rupatsir Tayta Diosnïta adorayäshä. Tsaynö mana rurayaptïqa qeshyawanpis o guërrawanpis ushakätsiyämanqam>>.

4Tsaymi Egipto nacionpa mandaqnin reyqa nirqan: <<Moisés y Aarón, ¿imanirtä runakuna alli arukuykäyaqta tiempunta perdiykätsiyanki? ¡Juklla aruq aywayay! 5Kaytsika Israel runakuna alli arukuykaqta ¿imanirtä willapaykäyanki?>>

Israel runakunata mana jamatsiypa arutsiyanqan

6Tsaynö nirmi tsay junaq capatazninkunatawan yanapaqninkunata Faraón nirqan: 7<<Kananpitaqa Israel runakuna adöbita sutayänanpä amana päjata alistapäyaynatsu. Kikinkunana päja ashimuq aywayätsun. 8Peru puntata adöbita sutayanqannölla rurayänanpä obligayay. Tsay runakunaqa aruyta qelanarninmi nikäyan: <Desiertuman aywar Diosnïkunapä sacrificiuta rupatsiyäshä>. 9Kanan junaqpita Israel runakunata mana jamatsiypa arutsiyay. Aruywan ñitipakashqa karmi parlapäyanqankunatapis cäsupäyanqanatsu>>.

10Tsaymi capatazkuna y yanapaqninkuna aywar Israel runakunata niyarqan: <<Faraónmi niyämashqa kananpita päjata manana alistapäyänäpä. 11Kananpitaqa adöbita sutayänaykipä kikikikunam päjatapis ashiyämunki. Tsaypita ñöpata sutayanqaykinölla jukllayllapis mana faltaqta adöbita sutayanki>>.

12Tsaymi Israel runakunaqa entëru Egiptupa mashtakäyarqan päjapa rantin raströjukunata ashirnin.

13Capatazkunanam niyarqan: <<Listu päjawan adöbita sutayanqaykinölla kananpis rurayay>>.

14Yanapaqninkuna cumplitsiyta mana puëdiyaptinmi capatazkuna castigayarqan: <<Qanyanpis ni kananpis ¿imanirtä ñöpata sutatsiyanqaykinö cumplitsiyankitsu?>>

(Capatazkunapa yanapaqninkunaqa Israel runakunam kayarqan.)

15Tsaymi capatazkunapa yanapaqninkunaqa Faraónman quejakuq aywar niyarqan: <<Taytay, sirviqniki kaykäyaptïqa ¿imanirtä pasaypa ñakatsiyämanki? 16Capataznikikunaqa päjatapis mana alistaykämurmi ñöpata sutatsiyanqänölla cumplitsiyänäta munayan. Tsaynö cumpliykätsiyaptïpis pasaypam maqayäman. Taytay, päjata mana alistamurmi capataznikikuna jutsayuq kaykäyan adöbi sutayta mana cumplitsiyänäpä>>.

17Faraónnam nirqan: <<¡Qela runakunam kayanki! Tsaymi <Tayta Diospä sacrificiuta rupatsiq aywayäshä> nir puriykäyanki. 18Tsaynö puriyänaykipa rantin juklla aruq aywayay. Päjata manana alistapäyäshuptikipis juktapis mana faltaqta adöbita sutatsiyay>>.

19Imanöpapis tareata cumplitsiyänanpä niptinmi capatazkunapa yanapaqninkuna pasaypa llakikuyarqan. 20Capatazkunapa yanapaqninkuna Faraónwan palaciunchö parlayanqanpita yarqayämurmi Moiséstawan Aarónta shuyaraykaqta tariyarqan. 21Tsaymi niyarqan: <<Kaynö ñakatsiyämänanpä qamkunam Faraónta rabyanätsiyarquyki. Wanutsiyämänanpä cutsilluta aptapaqnömi achäquita ashipäyarquyki. ¡Tsaynö rurayanqaykipita Tayta Dios qamkunata castigayäshuy!>>

22Tsaynö niyaptinmi Tayta Diosta mañakur Moisés nirqan: <<Tayta Dios, ¿imanirtä pasaypa ñakatsinki akranqayki runakunata? ¿Tsaypäku mandamarqayki? 23Faraónwan parlaq aywanqä junaqpitam kuyanqayki runakunata maqa maqarkur arutsirnin pasaypa ñakaykätsiyan. Tsaynö ñakaykätsiyaptinpis manam paykunata salvaykunkitsu>>.

Currently Selected:

Éxodo 5: qxo

Highlight

Copy