Éxodo 11

Punta yuriqkuna wanuyänanpä kanqanta tantiyatsinqan

1Tsaymi Moisésta Tayta Dios nirqan: <<Yapayrämi Faraónta y Egipto runakunata castigashä. Tsaynö castigaptïmi kaypita aywakuyänaykipä kikin qarquyäshunki. 2Kananqa Israel runakunata ollqutapis warmitapis ninki Egipto runakunata qellaypita y qoripita rurashqa alhäjakunata cada ünu mañakuyänanpä>>.

3 Tayta Diosmi Egipto runakunapa yarpayninman churarqan Israel runakunata alli rikayänanpä. Tsaynöllam Faraónpa mandar yanapaqninkunawan wakin Egipto runakunapis Moisés imaykapäpis poderyuq kanqanta yarpäyarqan.

4Tsaymi Faraónta Moisés nirqan: <<Tayta Diosmi nishqa: <Pullan paqasmi päsashä entëru Egiptupa. 5Tsaypa päsaptïmi llapan Egipto runakunapa mayor kaq ollqu tsurinkuna wanuyanqa. Faraónpa mayor tsurinpita qallaykurmi maraychö aqakuq esclävu warmipa mayor wamranpis wanunqa. Tsaynöllam llapan malta ashmakunapa punta yuriq orqu wawankunapis wanur ushakanqa. 6Tsaynö wanuyaptinmi Egiptuchö runakuna pasaypa llakikur waqayanqa. Tsaynöqa Egiptuchö manam imaypis waqayarqantsu y yapayqa manam waqayanqanatsu> >>.

7<<Egipto runakuna tsaynö waqayaptinpis Israel runakuna täyanqanchöqa manam allqullapis aullanqatsu. Israel runakuna kaqchö runapis ni ashmapis mana wanuyaptinmi musyayanki Israel runakunata Tayta Dios kuyanqanta. 8Tsayrämi mandar yanapashuqnikikunapis ñöpäman qonqurikuykur niyämanqa: <Israel runakunata kaypita pushakurkur aywakuy>. Tsaynö mana niyämaptinqa manarämi yarquyäshätsu>>.

Tsaynö niskirmi Faraónpa puntanpita pasaypa rabyashqa Moisés aywakurqan.

9Tsaypitanam Moisésta Tayta Dios nirqan: <<Qamkuna imata niyaptikipis Faraónqa manam cäsuyäshunkitsu. Tsaymi kay Egiptuchö mantsariypä castïgukunawan castigashä>>.

10Faraónpa puntanchö Moiséswan Aarón mantsariypä kaqkunata rurayaptinpis Tayta Diosmi Faraónpa shonqunta chukruyätsirqan. Tsaymi Israel runakuna Egiptupita yarquyänanta Faraón dëjarqantsu.

Currently Selected:

Éxodo 11: qxo

Highlight

Copy