Éxodo 12
12
Punta yuriqkunata Tayta Dios ushakätsinqan
1Egiptullachörä Israel runakuna kaykäyaptinmi Moisésta y Aarónta Tayta Dios nirqan: 2<<Kay killam qamkunapä wata qallaykunan killa kanqa. 3Llapan Israel runakunata willayay kay killa chunka junaqchö carnishta o malta chïvuta karpis cada wayichö alistakuyänanpä. 4Peru juk wayichö wallkaqlla kar llapanta mana ushayänanpä kanqanta tantiyarqa vecïnunkunawan qorikäyätsun pishtayanqan ashmata ushaypa mikuyänanpä. 5Carnish o chïvu kaptinpis juk watayuqta y sänuta akrayätsun.
6<<Tsay akrayanqan ashmata tsararäyätsun kay killa chunka chusku junaqyaq. Tsay tardina llapan Israel runakuna ashmata pishtayätsun. 7Pishtaskir wayikunapa numbralninkunata y marcunkunata ashmapa yawarninwan llushiyätsun. 8Tsaynölla tsay paqas kankashqa aytsata mikuyätsun ayaq jachantawan#12.8 Ayaq jachata mikuyänanpä Tayta Dios nirqan Egiptuchö ñakayanqanta yarpäyänanpämi. y levadüraynaq tantantawan. 9Chawata ni caldushqatapis ama mikuyätsuntsu. Tsaypa rantinqa kankayllapa mikuyätsun aytsanta, umanta, chakinta, pachanta, shonqunta, ñatinninta y rurunnintapis. 10Waraynin wäraypäqa imatapis ama dëjayätsuntsu. Sobraq kaqtaqa llapanta rupatsiyätsun. 11Röpankunatapis llanqinkunatapis jatishqallana tukruntapis aptashqallana tsay kankashqa aytsata ras mikuyätsun. Tsay Pascua fiestataqa#Lev. 23.5; Núm. 9.1-5; 28.16; Deut. 16.1-2; Mat. 26.1-2, 17-29; Mar. 14.1-2, 12-25; Luc. 22.1-2, 7-19; 1Cor. 5.7. noqapa jutïchö rurayätsun.
12<<Tsay paqasmi entëru nacionpa päsar llapan Egipto runakunapa mayor kaq tsurinkunata y ashmankunapa punta yuriq orqu wawankunatapis wanutsishä. Tsaynö wanutsirmi Egipto runakuna adorayanqan diosninkunata manakaqman churashä. Noqaqa Tayta Diosmi kä. 13Wayi punkuykichö yawar llushiraykaqta rikarqa päsakushämi. Tsaymi Egipto runakunata wanutsirpis Israel runakunataqa ni jukllayllatapis wanutsishätsu.
14<<Tsay junaqtaqa cada wata mana qonqaypa noqa Tayta Diosta adoramar jatun fiestata rurayanki. Tsay ninqäkunaqa imayyaqpis leymi qamkunapä y qamkunapita miraqkunapäpis kanqa.
15<<Fiesta qallanqan junaqpita qanchis junaqyaq levadüraynaq tantata mikuyanki. Punta kaq junaqchö wayikipita llapan levadürata jitariyanki. Tsay semäna levadürayuq tantata mikuq kaqtaqa Israel runakunapita qarquyanki. 16Punta kaq junaq y qanchis kaq junaq adorayämänaykipä qorikäyanki. Tsay junaqkunaqa ima aruytapis ama aruyankitsu. Peru mikuyta sïqa mikuyänaykipä kusinakuyanki.
17<<Levadüraynaq Tanta Mikuna fiestata#Éxo. 23.15; 34.18; Lev. 23.6-8; Núm. 28.17-25; Deut. 16.3-8. rurar Egiptupita jipinqäta imaypis yarpäyanki. Tsay fiestata imayyaqpis cada wata rurayanki qamkunapis y qamkunapita miraqkunapis. 18Punta kaq killa chunka chusku junaq tardipita qallaykur levadüraynaq tantata mikuyanki ishkay chunka juk (21) junaq tardiyaq. 19Tsay qanchis junaqyaqqa wayikikunachö levadüra ama katsuntsu. Tsay junaqkuna levadürayuq tantata mikuq kaqtaqa Israel runakunapita qarquyanki Israel mayiki kaptinpis o jäpa runa kaptinpis. 20Tsay junaqkuna levadürayuqtaqa ama imatapis mikuyankitsu. Maychö tarpis levadüraynaq tantallata mikuyanki>>.
21Tsaynam Moisésqa Israel mayor runakunata qayaykatsir nirqan: <<Pascua mikuyta mikuyänanpä carnishta o chïvuta karpis cada wayichö pishtayätsun. 22Pishtayanqayki ashmapa yawarninta juk matiman qoriyanki. Tsay yawarman hisöpu jachata tullpurkur punkuykikunapa numbralninta y marcunkunata llushiyanki. Tsay paqas patsa manarä waraptinqa wayikikunapita ama yarquyankitsu. 23Egipto runakunapa mayor tsurinkunata wanutsinanpä Tayta Dios päsar wayi punkukunatarämi rikanqa. Punkupa numbralninchö y marcunchö yawar llushiraykaqta rikarqa päsakunqam. Payqa manam munanqatsu wanutsikuq ángel tsay wayiman yaykunanta.
24<<Pascua fiestata rurayänaykipä ninqätaqa imaypis mana qonqaypa rurayanki. Qamkunapita miraqkunapis tsaynölla imayyaqpis rurayätsun. 25Tayta Dios awniyäshunqayki nacionman yaykurpis mana qonqaypa Pascua fiestata rurayanki. 26Tsurikikuna <¿imanirtä kay fiestata rurantsik?> niyäshuptiki 27tantiyatsir niyanki: <Cada watam ashmata pishtar Pascua fiestata rurantsik Israel mayintsikkunapa wayinpa Tayta Dios Egiptuchö päsanqanta yarpänantsikpä. Tsaypa päsar Egipto runakunapa tsurinkunata wanutsirpis Israel mayintsikkunapa tsurinkunataqa manam wanutsirqantsu. Tayta Dios tsaynö salvanqanpitam payta adorar Pascua fiestata rurantsik> >>.
Moisés tsaynö niptinmi llapan Israel runakuna qonqurikuykur Tayta Diosta adorayarqan. 28Tsaymi Moisésta y Aarónta Tayta Dios ninqannölla llapanta rurayarqan.
29Tsay tsakay pullan paqasmi Tayta Dios wanutsirqan Egipto runakunapa llapan mayor tsurinkunata.#Éxo. 4.22-23. Tsaynö wanutsirqan Faraónpa mayor ollqu tsurinpita qallaykur hasta carcelchö wichqaraykaq runapa mayor ollqu tsurinyaq. Tsaynöllam wanutsirqan llapan ashmakunapa punta yuriq orqu wawankunatapis. 30Cada wayichö mayor tsurinkuna wanuyaptinmi Faraónpis, mandar yanapaqninkunapis y llapan Egipto runakunapis tsay paqas pasaypa waqayarqan.
Israel runakuna Egiptupita yarquyanqan
31Tsaymi tsay paqas Moisésta y Aarónta qayaykatsir Faraón nirqan: <<Qamkunapis Israel mayikikunapis kay nacionpita juklla aywakuyay. Mañakayämanqaykinö Tayta Diosta adoraq aywayay. 32Munayanqaykinö üshaykikunata, cabraykikunata y wäkaykikunata qatikurkur ras aywayay. Tayta Diosta adorarnin noqapäpis mañakuykuyällanki>>.
33Egipto runakuna llapanpis wanuyänanpä kanqanta mantsarirmi Israel runakunata juklla aywakuyänanpä niyarqan. 34Tsaymi Israel runakunaqa artisantinta levadüraynaq mäsata jakunkunawan piturkullarna aparikurkur aywakuyarqan. 35Moisés ninqannöllam Egipto runakunata imaykatapis mañakuyarqan qoripita y qellaypita kaqkunata. Tsaynöllam mañakuyarqan röpakunatapis. 36Tsaynö mañakuyaptinmi Egipto runakunapa yarpayninman Tayta Dios churarqan imatapis mañakuyanqan kaqta qaraykuyänanpä. Tsaynöpam Egipto runakunapata imaykantapis alli kaqtaqa apakuyarqan.#Éxo. 3.21-22.
37Ramesés partipita aywakurmi Sucot lädupa Israel runakuna aywayarqan. Egiptupita yarquq runakunam joqta pachak waranqanö (600,000) kayarqan, warmikunatawan wamrakunata mana yupayllapa. 38Paykunawanmi mana Israel kaq runakunapis atskaq aywayarqan. Tsaypita yarqurmi üshakunata, cabrakunata y tsaytsika wäkakunatapis qatiyarqan. 39Egipto runakuna nacionninpita qarquyaptinmi Israel runakuna millkapanta rurayänanpäpis tiempu karqantsu. Tsaymi jamapäyanqallanchö apayanqan levadüraynaq mäsapita tantata rurayarqan.
40Israel runakunaqa chusku pachak kimsa chunka (430) watam Egiptuchö täyarqan.#Gén. 15.13; Gál. 3.17. 41Tsay watakuna cumplinqan junaqmi Tayta Dios kuyanqan runakuna trïbunpa trïbunpa Egiptupita yarqayämurqan. 42Tsay paqasmi Israel runakunata Egiptupita yarqayämunanpä Tayta Dios yanaparqan. Cada watam tsay yarquyanqan junaq cumpliptin llapan Israel runakuna Tayta Diosta waraypa adorayanqa. Israel runakunapita miraqkunam imaypis tsaynö rurayanqa.
Pascua fiestata imanö rurayänanpä tantiyatsinqan
43Tsaypitanam Moisésta y Aarónta Tayta Dios nirqan: <<Kaynömi Pascua fiestata rurayanki. Pascuapä pishtayanqayki ashmapa aytsantaqa jäpa runa ama mikunqatsu. 44Peru sirviyäshunaykipä rantiyanqayki runakunam sïqa penqayninta señalakushqa kar mikuyanqa. 45Tsay ashmapa aytsantaqa jäpa ni arupakuqpis ama mikutsuntsu. 46Tsay aytsataqa wayillaykikunachö mikuyanki. Wayipita juklämanqa ama jipiyankitsu ni tulluntapis ama pakiyankitsu.#Núm. 9.12; Juan 19.36. 47Llapan Israel runakuna tsaynölla rurayätsun.
48<<Mayqanpis jäpa runakuna qamkuna kaqchö tarnin Pascua fiestachö mikuyta munarqa wayinchö kaq llapan ollqukuna señalakuyätsun. Señalakurqa paykunapis Israel runanöna karmi Pascuachö mikuyanqa. Peru manarä señalakurqa pipis tsay ashmapa aytsanta ama mikutsuntsu. 49Qamkunachö täraq jäpa runakuna señalakuyanqannölla jinan nacionchö yuriqkunapis señalakuyätsun Pascua mikuyta mikuyänanpä>>.#Núm. 9.14.
50Tsaymi Israel runakuna llapanta rurayarqan Moisésta y Aarónta Tayta Dios ninqannölla. 51Tsay junaqllam Egiptupita Israel runakunata grüpu grüpu Tayta Dios jipimurqan.
Currently Selected:
Éxodo 12: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.
