Efesios 6
6
Papäninkunawan tsurinkuna imanö kawayänanpäpis yachatsinqan
1Wamrakuna, Señornintsik Jesucristuman criyikuqna kaykarqa papänikikunata mamaykikunata imaypis cäsuyay. Tsaynö cäsuyänaykitam Tayta Dios munan.#Col. 3.20. 2Promësayuq punta kaq mandamientum nin: <<Mamaykita y papänikita alli rikanki. 3Tsaynöpam kay patsachö atska wata kawanki>>.#Éxo. 20.12; Deut. 5.16.
4Wamrayuqkuna, wamraykikunata ama rabyatsiyaytsu.#Col. 3.21. Tsaypa rantinqa Señornintsik Jesucristo munanqannö kawayänanpä shumaq tantiyatsiyay.
Esclävuwan patrón alli kawayänanpä yätsinqan
5Esclävukuna, kay patsachö patronnikikunata cäsur mandayäshunqaykita llapan voluntänikikunawan rurayay. Jesucristuta cäsuyanqaykinölla patronnikikunatapis cäsuyay. 6Patronnikikuna rikayäshunqayki hörallaqa ama aruq tukuyaytsu, tsaypa rantinqa Jesucristupa sirviqnin kar llapan voluntänikikunawan aruyay. Tsaynöpam Tayta Dios munanqanta rurayanki.
7Patronnikikuna mandayäshunqaykita llapan voluntänikikunawan rurayay. Manam runakunallapätsu aruykäyanki, sinöqa Señornintsik Jesucristupämi. 8Esclävu o mana esclävu kashqapis allita ruranqantsikpitam Jesucristo gloriachö premiuta qaramäshun.#Col. 3.22-25.
9Patronkuna, qamkunapis esclävuykikunata alli rikayay. Qayapäyänaykipa rantinqa alli shimillaykikunapa parlapäyay. Tantiyakuyay esclävu karpis o patrón karpis ciëluchö kaykaq patronnintsikpa poderninchö kaykanqantsikta.#Col. 4.1. Payqa llapantsiktapis iwalmi rikamantsik.#Deut. 10.17; Col. 3.25.
Supaykunapita defiendikunantsikpä yätsinqan
10Wawqikuna y panikuna, Señornintsik Jesucristo poderninwan yanapaykäyäshuptikiqa firmi kawayay. 11Diablupita defiendikuyänaykipä Tayta Dios alistapäyäshunqaykiwan tsapakuyay.#Rom. 13.12-14; 1Tes. 5.8. 12Noqantsik manam runa mayintsikwantsu pelyaykantsik, sinöqa munayyuq supaykunawanmi. Paykunaqa mana rikakaq karpis entëru patsachömi llutankunata rurayan. 13Tsaynö kaykaptinqa Tayta Dios alistapäyäshunqaykikunawan tsapakuyay. Tsaywan tsapakuyaptikim supaykuna shamurpis vinciyäshunkitsu.
14Wachukuykiqa rasun kaqta parlayanqaykim.#Isa. 11.5.
Chalëcuykiqa allikunata rurayanqaykim.#Isa. 59.17.
15Bötasnikiqa Jesucristupa willakuyninta willakuyanqaykim.#Isa. 52.7.
16Escüduykiqa Tayta Diosman llapan shonquykikunawan yärakuyanqaykim. Tsay escüduwanmi nina tsariykaq flëchawannö Satanás atacayäshuptikipis tsapakuyanki.#Sal. 7.13.
17Cascuykiqa Tayta Dios salvayäshunqaykim.#Isa. 59.17.
Espädaykiqa Tayta Diospa palabranmi. Tsaywanmi Espíritu Santu imaypis yanapayäshunki.#Heb. 4.12.
18Imay hörapis Espíritu Santu tantiyatsiyäshunqaykinö Tayta Diosta mañakuyay. Imaypis mana ajayaypa rugakuyay. Yärakuq mayikikunapäpis mana qonqaypa mañakuyay.
19Noqapäpis Tayta Diosta mañakuykuyällay willakur shumaq parlanäpä y pitapis mana mantsaypa Jesucristupa alli willakuyninta willanäpä. 20Tayta Diospa willakuqnin kar willakuyninta willakunqäpitam prësu wichqaraykä. Tayta Diosta mañakuyay mana mantsaypa pitapis willanäpä.#Col. 4.2-4.
Cartapa ushanan
21Kuyay wawqintsik Tíquico#Hech. 20.4; 2Tim. 4.12. chämurmi imanö kaykanqäta y imata ruraykanqätapis willayäshunki. Paypis Señor Jesucristupa willakuqninmi. 22Tsaymi payta mandaykämü imanö kaykanqätapis willayäshunaykipä. Paymi valuratsiyäshunki Tayta Diosman shumaq yärakuyänaykipä.#Col. 4.7-8.
23Tayta Dios y Señor Jesucristo yanapaykuyälläshuy payman yärakur kuyanakuyänaykipä y alli kawayänaykipä. 24Señor Jesucristuta llapan shonqunwan kuyaqkunata Tayta Dios kuyapar imaypis yanapaykullätsun. [Amén.]
Currently Selected:
Efesios 6: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.
