Popular Bible Verses from Efesios 6

Share

Noqantsik manam runa mayintsikwantsu pelyaykantsik, sinöqa munayyuq supaykunawanmi. Paykunaqa mana rikakaq karpis entëru patsachömi llutankunata rurayan.

Imay hörapis Espíritu Santu tantiyatsiyäshunqaykinö Tayta Diosta mañakuyay. Imaypis mana ajayaypa rugakuyay. Yärakuq mayikikunapäpis mana qonqaypa mañakuyay.

Diablupita defiendikuyänaykipä Tayta Dios alistapäyäshunqaykiwan tsapakuyay.

Tsaynö kaykaptinqa Tayta Dios alistapäyäshunqaykikunawan tsapakuyay. Tsaywan tsapakuyaptikim supaykuna shamurpis vinciyäshunkitsu.

Escüduykiqa Tayta Diosman llapan shonquykikunawan yärakuyanqaykim. Tsay escüduwanmi nina tsariykaq flëchawannö Satanás atacayäshuptikipis tsapakuyanki. Cascuykiqa Tayta Dios salvayäshunqaykim. Espädaykiqa Tayta Diospa palabranmi. Tsaywanmi Espíritu Santu imaypis yanapayäshunki.

Wachukuykiqa rasun kaqta parlayanqaykim. Chalëcuykiqa allikunata rurayanqaykim. Bötasnikiqa Jesucristupa willakuyninta willakuyanqaykim.

Wawqikuna y panikuna, Señornintsik Jesucristo poderninwan yanapaykäyäshuptikiqa firmi kawayay.

Promësayuq punta kaq mandamientum nin: <<Mamaykita y papänikita alli rikanki. Tsaynöpam kay patsachö atska wata kawanki>>.

Wamrakuna, Señornintsik Jesucristuman criyikuqna kaykarqa papänikikunata mamaykikunata imaypis cäsuyay. Tsaynö cäsuyänaykitam Tayta Dios munan.